Mbela oho popi sha gwana nakuume koye kopandjokana?

“ONTUMWAFO yohole okuza kugumwe ngoka e na oomvula 60.” Shika osha li oshipalanyolo shethigathanopo lyuudhano mboka wa li wa shilipalekwa kombaanga yimwe muJapani oomvula dhimwe opo dha piti. Uudhano owa li wa ladhipike Aajapani mboka ye na oomvula dha konda po 50 no 60 opo ya tseyithile mboka ya hokana nayo ‘omaiyuvo gawo gashili.’ Omusamane gumwe ngoka a li a kutha ombinga, okwa li a nyolele omukulukadhi gwe ta ti: “Otashi vulika to yolo, ihe otandi ki ipa ombedhi ngele inandi shi ku lombwela, onkee ano otandi popi newi lyopombanda te ti: Tangi sho twa hokana nangoye.”

Momaputuko ogendji, mwa kwatelwa gamwe gomiilongo yokUuzilo, aantu ihaya ladhipikwa ya popye omaiyuvo gawo ya manguluka. Ihe nonando osho shi li ngawo, aantu ye vulithe po 15 000 oya li ya kutha ombinga methigathanopo ndyoka lyokunyola oontumwafo dhohole. Molwaashoka ethigathanopo ndika olya li lyi holike apuhe, opwa li pwa longekidhwa natango ethigathanopo lilwe lya fa ndyoka nopwa li pwa nyolwa omambo ga kankamena koontumwafo ndhoka. Shika otashi gandja edhiladhilo kutya aantu oyendji momitima dhawo oye na ehalo okutseyithila ookuume kawo kopandjokana nkene ye yu uvitile. Ihe yalwe inaya hala oku shi ninga. Omolwashike? Otashi vulika molwaashoka ohashi pula oonkambadhala nowino opo yalwe, ngaashi ookuume kopandjokana, yu uve ko nkene yo ye uvite.

Hitoshi Kato, ngoka a nyola embo kombinga yokuya moshipundi shevululuko, ota ti kutya mokati kaaihokani mboka ya kulupa yomuJapani, oyendji yomuyo oondjokana dhawo ohadhi tewa kaakiintu molwonkone ndjoka ya kala ye na uule woomvula odhindji. Ihe okwa ti: “Ohashi etithwa wo kaaihokani mboka ihaaya kundathana nkene ye na okukandula po omaupyakadhi ngoka ge ya taalela.”

Uuna omusamane ta yi moshipundi shevululuko, inaashi tegelelwa otashi vulika omukulukadhi gwe e mu tseyithile kutya ote mu henge po. Otashi vulika aaihokani mbaka ya kala uule woomvula odhindji inaaya kundathana nkene ye uvitilathane. Omusamane nomukulukadhi otashi vulika ya li ya ningi oonkambadhala okulombwelathana omaiyuvo gawo, ihe inaya vula okutsikila oonkundathana dhawo pamukalo gwombili. Pehala lyokutunga po ekwatathano ewanawa, oya kala haya tamanana olundji.

Ongiini omusamane nomukulukadhi taya vulu okukandula po okwaahauvathana momukalo gwombili nokulombwelathana omaiyuvo gawo momukalo omwaanawa? Oto ka kala u na ohokwe okutseya kutya omikalo ndhoka tadhi kwathele unene moshinima shika, itadhi adhika membo ndyoka opo lya nyolwa komugandjimayele gwontumba ge na ko nasha nondjokana, ihe omembo lya nyolwa nalenale ndyoka lya kala lya simanekwa koyendji uule womathelemimvo ga piti, Ombiimbeli.