Omapulo ga za kaaleshi

Otu shi shi ngiini kutya uunongo mboka tau hokololwa mOmayeletumbulo 8:22-31 otau popi Jesus Kristus manga a li inee ya kombada yevi?

Ehokololo lyuunongo ndyoka lya nwethwa mo tali adhika membo lyOmayeletumbulo, otali ti: “OMUWA okwa shiti ndje omutango gwiilonga ye, okuza konalenale. . . . [Oondundu manga inaadhi dhikilwa mo, niikulundundu inaayi shitwa, ongame nda valwa, OB-1954] . . . Oko nda li nale, sho a yala egulu, . . . oko nda li nale engomba nda tegama naye, onde mu nyanyudha esiku nesiku, naaluhe nda dhanene koshipala she, . . . nenyanyu lyandje olya li okunyanyukilwa aana yaantu.”

Enyolo ndika itali popi owala uunongo wopakalunga nenge uunongo wopantu. Omolwashike? Omolwaashoka uunongo mboka tau popiwa mpaka owa li wa ‘shitwa’ u li omutango gwiilonga yaJehova. Jehova Kalunga ke na etameko nokwa kala aluhe omunongo. (Episalomi 90:1, 2) Uunongo we kau na etameko, molwaashoka inau shitwa. Inau “valwa.” Natango, uunongo mbuka okwa tiwa ohau popi nohau longo, shoka tashi ulike kutya ou lile po omuntu.—Omayeletumbulo 8:1.

Embo lyOmayeletumbulo otali ti kutya uunongo owa kala ethimbo ele u li pOmushiti Jehova, u li “engomba” wa tegama naye. Nopwaahe na omalimbililo, shoka otashi popi Jesus. Nalenale omanga Jesus inee ya kombanda yevi, okwa li a longo pamwe naJehova, nomolwaashoka Oohapu dhaKalunga tadhi ti: “Kalunga okwa shititha Kristus iinima ayihe . . . Kristus okwa li ko manga iinima ayihe ya li yaa ko.”—Aakolossa 1:16, 17; Ehololo 3:14.

Oshi li she eleka sho Omwana gwaKalunga ta popiwa e li uunongo, molwaashoka oye Ngoka a li a holola omalalakano gaJehova gopandunge niipango ye. Manga Jesus inaa ninga omuntu kombanda yevi, okwa li Ohapu yaKalunga nenge Omupopikalelipo gwe. (Johannes 1:1) Ota hokololwa e li “oonkondo dhaKalunga nuunongo waKalunga.” (1 Aakorinto 1:24, 30) Omwana gwaKalunga ita hokololwa tuu nawa e li ngoka okunyanyukilwa kwe oyana yaantu kwe mu inyengitha a gandje omwenyo gwe molwawo gu li ekulilo!—Johannes 3:16.