“Onkundana yeni onde yi pulakene owala molwokamati hano koomvula omugoyi”
NGELE Oonzapo dhaJehova dhe ya posheelo shegumbo lyaWiesława, ngoka a kala muumbugantu waPoole, okwa li he dhi pandula nombili ihe iha pitike dhi kundathane naye. Esiku limwe, okamati koomvula omugoyi kedhina Samuel nayina oka li ke ya pegumbo lye. Oshikando shika Wiesława okwa li a pulakene ketumwalaka ndyoka hali uvithwa kOonzapo nokwa li a taamba oshifo shoka sha li tashi popi kombinga yoparadisa kombanda yevi.
Molwaashoka Edhimbuluko lyeso lya Jesus Kristus olya li li li popepi, Samuel okwa li a hala okuhiya Wiesława koshiningwanima shika shi ikalekelwa. Onkee ano, okamati haka oka li ka yi pamwe nayina ye ke mu talele po ishewe, noshikando shika oka faalele okambapila kehiyo. Wiesława sho a mono kutya okamati okazala nawa okwe ya pula nombili ye mu pe okathimbo okafupi a ye a ka zale nawa. Sho a galuka, okwa li a pulakene kuSamuel nokwa li a taamba okambapila kehiyo e ta pula ta ti: “Nandi ye ongame awike nenge onomusamane gwandje?” Okwa gwedha ko a ti: “Ngele omusamane gwandje ite ya, ngame otandi ya. Otandi ke shi ninga.” Opo a nyanyudhe Samuel okwa li a gwanitha po euvaneko lye.
Pethimbo lyoshipopiwa shEdhimbuluko, Samuel okwa li a kutuumba pamwe naWiesława nokwa li te mu ulukile omanyolo ngoka ga li taga kundathanwa. Shika osha li she mu kumitha noonkondo. Okwa li a nyanyukilwa Edhimbuluko nokwa li a pandula omadhiladhilo ngoka ga li ga yelithwa noohapu oompu. Okwa li wo i inyengithwa kokutaambwa ko nohole nosho wo omukalo gwombili moka egongalo lya li lya kala naye. Okuza mpono, Wiesława okwa li u ulike olupandu olunene kiinima yopambepo nokwa li a tameke okweendathana aluhe nOonzapo dhaJehova. Ethimbo opo lya piti okwa li a ti: “Onda sa ohoni sho nale nda li ihaandi pulakene kune sho mwa li hamu ya paandjetu. Onda zimina kutya etumwalaka lyeni onde li pulakene owala omolwokamati koomvula omugoyi, Samuel.”
Ngaashi Samuel gwokuPoole, aagundjuka oyendji yOonzapo dhaJehova ohaya tanga Kalunga nomilungu dhawo nosho wo okupitila meihumbato lyawo nomomikalo dhawo omiwanawa. Ngele ngoye omugundjuka, oto vulu wo okukwathela mboka ye na omitima dhu uka opo yu ulike ohokwe miinima yopambepo.