Oohapu dhaJehova odhi na omwenyo
Omanenedhiladhilo okuza membo lyaMaleaki
SHO pwa piti oomvula 70 okuza sho otempeli muJerusalem ya pu okutungululwa mo 515 K.E.N., uupambepo wAajuda owa li wa nkundipala noonkondo. Nokuli naasaaseri oya li ya yonuka. Mbela olye a li te ke ya tseyithila kutya onkalo yawo oya yonuka noku ya kwathela ya hedhe ishewe popepi naKalunga? Oshinakugwanithwa shoka Jehova okwa li e shi pe omupolofeti Maleaki.
Embo lyahugunina lyOmanyolo gOshihebeli olya nyolwa momukalo tagu tsu omuthindo kuMaleaki noli na omahunganeko ga nwethwa mo kuKalunga. Okugandja eitulomo koohapu dhopahunganeko dhaMaleaki otaku vulu oku tu kwathela tu ilongekidhile “esiku ndyoka enene netilithi lyOMUWA,” sho onkalelo yongashingeyi yuukolokoshi tayi ka hulithwa po.—Maleaki 4:5.
AASAASERI OYA LI YA “FALA OYENDJI MOKULONGA IIHUNA”
(Maleaki 1:1–2:17)
Jehova okwa li a popi nkene e uvitile Aaisraeli, ta ti: “Ondi mú hole.” Ihe aasaaseri oya li ya dhina edhina lyaKalunga. Ngiini mbela? ‘Omokuyamba poshiyambelo she iikulyandjambo inaayi yogoka’ nomokuyamba ‘eyambo lyoshimuna oshilema nenge tashi alukwa.’—Maleaki 1:2, 6-8.
Aasaaseri oya li ya “fala oyendji mokulonga iihuna.” Aantu oya li ‘yi itekathana.’ Yamwe oya li ya hokana aakiintu aakwiilongo. Yalwe oya li yi iteka ‘aakiintu yuugundjuka wawo.’—Maleaki 2:8, 10, 11, 14-16, yelekanitha OB-1954.
Omapulo gopamanyolo taga yamukulwa:
2:2 (OB-1954)—Omomukalo guni Jehova a li a “tula omayambeko omutima” gaasaaseri mboka ya li inaaya dhiginina ompango ye? Okwa li e shi ningi meityo kutya omayambeko ngoka ga li ga nuninwa aasaaseri otaga ka tulwa omutima.
2:3 (OB-1954)—‘Okuumbila oonyata’ miipala yaasaaseri otaku ti shike? Pampango yaMoses, ehoho lyoshinamwenyo shoka sha yambwa olya li li na okufalwa kondje yontanda nokulungunithwa po. (Levitikus 16:27, OB-1954) Okuumbila ehoho miipala yaasaaseri otaku ti kutya Jehova ka li a hokwa omayambo gawo nosho wo mboka ya li taye ga yamba okwa li e ya tonde.
2:13—Omahodhi goolye ga li ga hipike oshiyambelo shaJehova? Omahodhi ngoka oga li gaakulukadhi mboka ya li ye ya kotempeli nokupimpila omitima dhawo kuJehova. Oshike sha li she ye etele oluhodhi ndoka? Aasamane yawo Aajuda oya li yi ikongele oombapila dhokuteya oondjokana shaa he li paveta noya li ye ye etha po opo ya hokane aakulukadhi aagundjuka mboka ya li aakwiilongo.
Iiyilongomwa kutse:
1:10. Jehova ka li nando a nyanyukilwa omayambo gaasaaseri aanalwiho mboka ya li taya futitha nokuli iilonga yanathangwa ngaashi okweedhila omiyelo nokutema omulilo koshiyambelo. Mbela inashi simana tuu opo iilonga yetu yokulongela Kalunga, mwa kwatelwa uukalele wetu wopaKriste, tu yi longe tatu inyengithwa kohole yashili yokuhola Kalunga nosho wo aantu ooyakwetu, ihe hakokwiikongela nando iimaliwa!—Mateus 22:37-39; 2 Aakorinto 11:7.
1:14; 2:17. Jehova oku tonde iihelele.
2:7-9. Mboka ye na uuthembahenda wokulonga aantu megongalo oye na okushilipaleka kutya elongo lyawo oli li metsokumwe nOohapu dhaKalunga, Omanyolo Omayapuki nolya kankamena kiileshomwa yOmbiimbeli ‘yelenga edhiginini.’—Lukas 12:42, OB-1954; Jakob 3:11.
2:10, 11. Jehova okwa tegelela aalongeli ye ya dhiginine ekumagidho kutya oye na okuhokana owala “mOmuwa.”—1 Aakorinto 7:39, OB-1954.
2:15, 16. Aalongelikalunga yashili oye na okusimaneka euvaneko lyokudhiginina omukulukadhi gwomuugundjuka wawo.
‘OMUWA OTE KE YA KOTEMPELI YE’
(Maleaki 3:1–4:6)
‘OMUWA [Jehova Kalunga] ote ke ya ohaluka kotempeli ye’ e li ‘nomutumwa gwehangano [Jesus Kristus].’ Kalunga ‘ota ka holoka mokati koshigwana she oku shi pangula’ nokutompa mbala mboka haya longo ashihe shoka sha puka. Kakele kaashona, ye oku na ‘embo moka a nyola’ mboka haye mu tila.—Maleaki 3:1, 3, 5, 16, yelekanitha OB-1954.
Esiku ndyoka “lya tema ngomulilo gweziko” otali ya nokuletheka po aakolokoshi ayehe. Manga esiku ndyoka inaali ya, omupolofeti ota ka tumwa ‘okuhanganitha oohe noyana, noyana noohe.’—Maleaki 4:1, 5, 6, OB-1954.
Omapulo gopamanyolo taga yamukulwa:
3:1-3 (Yelekanitha OB-1954.)—Uunake “OMUWA” nosho wo ‘omutumwa gwehangano’ ya li ye ya kotempeli nolye ngoka a li e ya tetekele? Jehova okwa li e ya kotempeli ye okupitila momukalelipo gwe nokwa li e yi opaleke momasiku 10 gaNisan mo 33 E.N. Shoka osha li sha ningwa sho Jesus a li e ya motempeli e ta tidha mo mboka ya li taya landa notaya landitha. (Markus 11:15) Shika osha li sha ningwa konima yoomvula ndatu netata sho Jesus a li a gwayekwa a kale Omukwaniilwa ngoka a tulwa po kuKalunga. Konima yoomvula ndatu netata konima yokulangekwa po kwe e li omukwaniilwa megulu, Jesus okwa li a yi pamwe naJehova kotempeli yopambepo noya li ya adha oshigwana shaKalunga sha pumbwa okuyelithwa. Methelemumvo lyotango, Johannes Omuninginithi okwa li a tumwa okulongekidhila Aajuda okuya kwaJesus Kristus. Pethimbo lyonena, omutumwa okwa tumwa manga kuyele opo a longekidhile Jehova ondjila sho te ya kotempeli ye yopambepo. Nokuli nale momumvo 1880 nasha, ongundu yaakonakoni yOmbiimbeli oya li ya tameke okukutha ombinga miilonga yokulonga mboka ye na omitima dhu uka ooshili dhOmbiimbeli dhopetameko.
3:10—Mbela okweeta “iitimulongo ya gwana” otaku thaneke okugandja ashihe shoka tu na kuJehova? Ompango yaMoses oya li ya hulithwa po kekankameno lyeso lyaJesus, onkee ano kunena inashi pumbiwa we okugandja iitimulongo yopashimaliwa. Ihe okugandja iitimulongo oku na natango eityo lyopathaneko. (Aaefeso 2:15) Itaku thaneke okugandja po ashihe shoka tu na. Nonando oshitimulongo osha li hashi gandjwa omvula kehe, tse ohatu gandja ashihe shoka tu na kuJehova lumwe aluke owala, ngele tatu mu iyapulile noku shi ulika mokuninginithwa kwetu momeya. Okuza mpono, ayihe mbyoka tu na ohayi ningi yaJehova. Nonando ongaaka, Jehova ohe etha tu hogolole oshitopolwa shaa shoka tu na, sha hala okutya, oshitimulongo shopathaneko, tu shi longithe miilonga ye. Shika oshi ikolelela koonkalo dhetu nosho wo kunkene omitima dhetu tadhi tu inyengitha tu shi longithe. Omayambo ngoka hatu etele Jehova oga kwatela mo ethimbo, oonkondo niiniwe mbyoka hatu longitha miilonga yokuuvitha Uukwaniilwa noyokuninga aantu aalongwa. Niishewe oya kwatela mo okukala pokugongala kwopaKriste, okutalela po aavu nooitaali ooyakwetu mboka ya kulupa nosho wo okuyambidhidha elongelokalunga lyashili pashimaliwa.
4:3 (OB-1954)—Opamukalo guni aalongeli yaJehova taya ka “lyatagula aakaanakalunga”? Oshigwana shaKalunga kombanda yevi itashi ka “lyatagula aakaanakalunga” lelalela, sha hala okutya, itashi ka kutha ombinga moku ya hanagula po. Pehala lyaashono, otashi ti kutya aapiya yaJehova yokombanda yevi otaye ke shi ninga pathaneko mokukutha ombinga nomutima aguhe moshituthi shesindano shoka tashi ka landula ehulilo lyuuyuni waSatana.—Episalomi 145:20; Ehololo 20:1-3.
4:4 (OB-1954)—Omolwashike tu na ‘okudhimbulukwa ompango yaMoses’? Nonando Aakriste inaya tegelelwa ya landule Ompango ndjoka, yo oyi li “omuzizimba gwowala guuwanawa wokomeho.” (Aahebeli 10:1, OB-1954) Onkee ano, okugandja eitulomo kOmpango yaMoses otaku vulu oku tu kwathela tu mone nkene iinima mbyoka ya nyolwa mo tayi gwanithwa. (Lukas 24:44, 45) Kakele kaashono, mOmpango omu na “efano lyaambiyaka yomegulu.” Osha simanenena tu yi konakone opo tu uve ko omalongo neihumbato lyopaKriste.—Aahebeli 9:23.
4:5, 6—“Omuhunganeki Elia” ota thaneke lye? Osha hunganekwa kutya “Elia” ota ka longa iilonga yokulongekidha omitima dhaantu. Methelemumvo lyotango E.N., Jesus Kristus okwa li u ulike kutya Johannes Omuninginithi oye “Elia.” (Mateus 11:12-14; Markus 9:11-13) Ngoka ta thaneke Elia nena okwa tumwa nale ‘manga esiku ndyoka enene netilithi lyOMUWA inaali ya.’ Elia gwonena oye “omupiya omudhiginini nomunandunge.” (Mateus 24:45, KB) Ongundu ndjoka yAakriste aagwayekwa oya kala nokulonga nuulaadhi iilonga mbika yokukwathela aantu ya kale ishewe nekwatathano naKalunga.
Iiyilongomwa kutse:
3:10. Ngele itatu pe Jehova ayihe mbyoka tatu vulu, itatu ka lalekwa nuuyamba kuye.
3:14, 15. Molwaashoka aasaaseri oya tula po oshiholelwa oshiwinayi, Aajuda oya li ya tameke okutala ko iilonga yokulongela Kalunga kutya kayi na oshilonga. Mboka ye na iinakugwanithwa megongalo lyopaKriste, oye na okutula po oshiholelwa oshiwanawa.—1 Petrus 5:1-3.
3:16. Jehova oha dhimbulukwa mboka haye mu tila noye li aadhiginini muye. Ote ke ya gamena uuna ta ka hulitha po uuyuni waSatana wuukolokoshi. Onkee ano, inatu sa nando uunye mokukala twa tokola toko kwetu okukakatela uudhiginini wetu muKalunga.—Job 27:5.
4:1, OB-1954. Mesiku lyokwiihokolola kuJehova, “oshitayi” nosho wo “omudhi” otayi hulithwa po pamukalo gwa faathana, sha hala okutya, aanona otaa ka pangulwa epangulo lya faathana nolyaavali yawo. Aavali kaye na tuu oshinakugwanithwa oshinene shi na ko nasha naanona yawo aashona! Aavali Aakriste ootate noomeme oye na okulonga nuudhiginini opo ya kale ya hokiwa kuKalunga nokukala ye na edhina ewanawa kuye.—1 Aakorinto 7:14.
“Tila Kalunga”
Oolye taya ka hupithwa ‘mesiku ndyoka enene netilithi lyOMUWA’? (Maleaki 4:5) Jehova ota ti: “One mboka hamu vulika kungame, otamu ka pitilwa ketango lyuuyuuki tali mú aludha [nomawawa galyo, OB-1954]. Otamu ka manguluka e tamu nyanyukwa ngaashi uutaagona tau dhana omalondo.”—Maleaki 4:2.
“Etango lyuuyuuki,” Jesus Kristus, otali pitile mboka haya tila nesimaneko edhina lyaKalunga noya hokiwa kuye. (Johannes 8:12) Otaya ‘aludhwa wo komawawa galyo,’ sha hala okutya, ngashingeyi otaya aludhwa pambepo nomuuyuni uupe waKalunga tawu ya, otaya ka aludhwa thiluthilu palutu, pamadhiladhilo nopamaiyuvo. (Ehololo 22:1, 2) Oya tuntukwa noya nyanyukwa “ngaashi uutaagona tau dhana omalondo.” Manga twa tegelela omalaleko nuuyamba ga tya ngawo, natu pulakeneni kekumagidho lyomukwaniilwa Salomo ndyoka tali ti: “Tila Kalunga nou dhiginine iipango ye, oshoka aantu ayehe osho ye na okuninga.”—Omuuvithi 12:13.
[Ethano pepandja 28]
Omupolofeti Maleaki, omupiya gwaKalunga omulaadhi nomudhiginini
[Ethano pepandja 31]
Shono hatu longo aantu oshi na okukala metsokumwe nOmbiimbeli
[Ethano pepandja 31]
Aapiya yaJehova oye na okusimaneka oondjokana dhawo