Aaleshi yoshifo shetu taya pula
Mbela Iiponga Yopaunshitwe Egeelo Lya Za Kukalunga?
Kalunga iha longitha iiponga yopaunshitwe okugeela aantu. Ine shi ninga nando onale, ye ite ke shi ninga nando. Omolwashike? Omolwaashoka muJohannes gwotango 4:8 Ombiimbeli otayi popi kutya “Kalunga oye ohole.”
Ohole oyi li onzo yakehe shono Kalunga ha ningi. Ohole ihayi ehameke nando omuntu ngoka kee na ondjo, molwaashono Ombiimbeli otayi popi kutya “ngoka e hole mukwawo, ita vulu oku mu ningila uuwinayi.” (Aaroma 13:10) MuJob 34:12 Ombiimbeli otayi ti: “Kalunga iha puka.”
Oshoshili kutya Ombiimbeli oya hunganeka kutya iiponga ngaashi “omakakamo gevi omatilithi” otayi ka ningwa pethimbo lyetu. (Lukas 21:11) Ihe Jehova haye e na ondjo omolwehanagulo ndyoka hali etwa kiiponga mbyoka ngaashi owala omutengeneki gwonkalo yombepo haye e na ondjo yeyonagulo ndyoka hali etwa koshikungulu shoka a tengeneka. Onkee ano, ngele Kalunga haye he etitha iiponga yopaunshitwe mbyoka hayi eta okumona iihuna kwaantu, mbela oshike hashi yi etitha?
Ombiimbeli otayi ti kutya “uuyuni auhe ou li mepangelo lyomuhindadhi,” Satana Ondiaboli. (1 Johannes 5:19) Okwa kala nokudhipaga aantu okuza sho a ningi omunashipotha sigo okunena. (Johannes 8:44) Satana okwa tala ko omwenyo gwa fa gu na ombiliha nokagu na oshilonga. Okwi iholele esimano, onkene itashi kumitha sho a tota po onkalo ndjoka tayi humitha komeho okwiihola mwene. Muuyuni kunena aantu mboka yi ihole ohaya thiminikile yalwe okukala pomahala ngoka ga nika oshiponga kashi na mbudhi kutya iiponga yopaunshitwe nenge mbyoka hayi etithwa kaantu otayi vulu okuholoka nuupu pomahala ngoka. (Aaefeso 2:2; 1 Johannes 2:16) Onkee ano, aantu mboka aanalwiho oyo ye na ondjo omolwiiponga yimwe mbyoka hayi adha aantu. (Omuuvithi 8:9) Omolwashike mbela?
Iiponga yimwe mbyoka tayi halutha aantu kunena ombinga yawo yimwe oye etithwa kaantu. Pashiholelwa, tala koshiponga shefundja li li mumwe noshikungulu shoka sha li sha adha aantu mboka haya kala moshilando New Orleans shi li muAmerika, nenge komagumbo ngoka ga li ga hanagulwa po komunoko ngoka gwa zi moondundu ndhoka dhi li popepi nefuta muVenzuela. Miiponga ayihe mbyoka nayilwe, iinima yopaunshitwe ngaashi ombepo nomvula oyo ya li ye etitha oshiponga oshinene omolwokwaahe na ontseyo miinima yi na ko nasha nuunshitwe, okutunga omatungo inaga kola nenge pomahala ga puka, okwiipwililikila omalondodho nosho wo omapuko ngoka haga ningwa kwaamboka ye na oonkondopangelo.
Dhiladhila koshiponga shoka sha ningilwe pethimbo lyaJesus. Aantu 18 oya li ya gwilwa koshungongulu e taya si. (Lukas 13:4) Oshiponga shika otashi vulika sha li sha holoka omolwepuko lyopantu nenge ‘omolwethimbo neadhiko,’ ihe kasha li nando egeelo lya za kuKalunga.—Omuuvithi 9:11, OB-1954.
Mbela opwa li iiponga mbyoka ye etithwa kuKalunga? Eeno, ihe inayi fa mbyoka yopaunshitwe nenge mbyoka hayi etithwa kaantu, molwaashoka inayi hanagula po aantu ayehe. Okwa li e yi etitha nelalakano lyontumba noya li ya pumba. Iiholelwa iyali yomuyo, Eyelu lyopethimbo lyatatekulululwa Noowa nehanagulo lyoshilando shaSodom noshaGomorra pethimbo lyaLot. (Genesis 6:7-9, 13; 18:20-32; 19:24) Kalunga okwa li a hulitha po aakolokoshi mboka inaayi iyela ombedhi yopethimbo ndyoka ihe okwa li a hupitha mboka a li e wete kutya aayuuki.
Odhoshili kutya Jehova Kalunga oku na oonkondo nehalo okuhulitha po okumona iihuna akuhe nosho wo okweeta epepelelo kiilanduliko mbyoka hayi etithwa kiiponga yopaunshitwe. Episalomi 72:12 olya hunganeka kombinga yOmukwaniilwa, Jesus Kristus ngoka a langekwa po kuKalunga tali ti: “Ota hupitha ohepele ngo te mu lilile, omuthiminikwa ngo kee na ngo te mu kwatha.”