Egumbo lye egulukila aayenda nelalakano
“OHAYA ningi shike moka?” Oyendji mboka haya piti petungo enenenene lyOonzapo dhaJehova moMogale City (Krugersdorp) popepi naJohannesburg moSouth Africa, ohaya pula epulo ndyoka. Mo 12 no 13 gaKotoba 2007, Oonzapo odha li dha tokola opo oshitayimbelewa shi kale she egulukila aayenda ayehe. Shoka osha li sha ningwa nomalalakano gaali: okukutha po omapopyo giifundja nokuulukila aakwashigwana shoka hashi longwa moshitayimbelewa okuyambidhidha iilonga mbyoka Jesus Kristus a gandja elombwelo yi longwe.—Mateus 28:19, 20.
Mboka haya longo moshitayimbelewa oya li ya tula pomweelo omandhindhiliko gokuhambelela aakwashigwana noya li wo ya hiya aashiinda nehiyo lyi ikalekelwa. Aanangeshefa nomaukwanegumbo gawo oya li ya hiwa. Oya li yi inyenge ngiini? Aatalelipo ye vulithe 500 mboka kaaye shi Oonzapo oya li yu ulikilwa mehala.
Eshina hali ithanwa MAN Roland Lithoman ndyoka hali nyanyangidha iifo 90 000 mowili olya li lya kumitha noonkondo aatali. Oshikondo oshinene shokupakela nokutuma iileshomwa ya konda pootona 14 mesiku nosho wo oshikondo shokutula omambo iipeko oya li ya kumitha aatali. Oonzapo miikondo yi ili noyi ili odha li dhu ulike iinima tayi hokitha mwa kwatelwa ondjokonona paufupi yeshina lyokunyanyangidha iileshomwa momukalo gwonale sigo oongoka gwoshinanena. Euliko limwe olya li tali ulike nkene oshitayimbelewa hashi sile oshimpwiyu omudhingoloko. Pashiholelwa, oshikondo shi ikalekelwa ohashi kutha po omiku dhuuzigo nomazimba ngoka haga zi momashina gokunyanyangidha naangoka gokuthipa po ontsi yoombapila.
Oshifokundaneki shomoshitopolwa osha ti kutya aaiyambi 700 yomoshitayimbelewa moka “oye li aakalele yi igandjela Jehova.” Osha pandula wo “omuthika gwopombanda gwuuyogoki nosho wo elandulathano ewanawa lyokumana iinima ayihe pethimbo” poshinyanyangidho. Omulumentu gumwe ngoka a li ha pataneke Oonzapo dhaJehova okwa li e ya okutala ehala. Konima okwa li a nyola ontumwafo a ti: “Otandi mu halele omayambeko. Osha pumba okumona aantu oyendji taya longo nawa ngaaka.”
Aatalelipo oyendji oya li ya pandula okuulukilwa mehala noya li ya kumwa okumona kutya moshitayimbelewa omu na iileshomwa ya kankamena kOmbiimbeli momalaka ge li 151 nohayi nyanyangidhilwa iilongo 18 yaAfrika lyokuumbugantu nolyopokati. Iitayimbelewa yOonzapo dhaJehova muuyuni auhe oye egulukila kehe gumwe ngoka a hala okuya a tale poowili dhiilonga. Omolwashike itoo kongo ethimbo wu ka tale oshitayimbelewa nenge ombelewa yokutoloka moshilongo sheni?
[Omathano pepandja 10]
Oshitayimbelewa shaSouth Africa moMogale City
[Ethano pepandja 10]
Eshina lyokunyanyangidha iileshomwa hali ithanwa MAN Roland Lithoman
[Ethano pepandja 10]
Oshikondo shokutula omambo iipeko
[Ethano pepandja 10]
Oshikondo shokupakela nokutuma iileshomwa
[Ethano pepandja 11]
Aatalelipo taya thiki poshitayimbelewa
[Ethano pepandja 11]
Ehiyo