Jesus—aantu ohaye mu popi ngiini?

“Jesus Omunasaret . . . nopwaahe na omalimbililo, oye ta dhana onkandangala mondjokonona ayihe.”—H. G. Wells, omunandjokonona Omwiingilisa osho a ti.

“Kristus . . . okwa yooloka ko komapendafule agehe mondjokonona.”—Philip Schaff omuteolohi nomunandjokonona omvalele yaSwitzerland osho a ti.

OLYE a gwana okwiithanwa omuntu omunenenene ngoka a li ko nale? Uunene womuntu ohawu monikila koshike? Mbela okoondunge dhe dhopaukwiita? Okoonkondo dhe dhopalutu? Okoondunge dhe dha dhenga mbanda? Nenge otawu vulu okuyelekwa kunkene oohapu dhe niilonga ye ya nwetha mo aantu nosho wo koshiholelwa shoka e ya tulila po?

Tala shoka aanandjokonona, aanongononi, aalongwantu, aanyoli yiileshomwa, aawiliki yopapolotika nosho wo yalwe mboka ya li ko nale noyokunena ya ti kombinga yomulumentu Omunasaret, Jesus Kristus:

“Owu na okugoyokitha lela oshili opo wu tinde kutya Jesus Omunasaret ka li ta dhana onkandangala uule womimvo 2 000 nosho wo mondjokonona ayihe yaantu.”—Reynolds Price, omunyoli gwomatotwahokololo Omuamerika nomulongwantu gwOmbiimbeli osho a ti.

“Omulumentu ngoka a li kee na ondjo yasha okwa li i igandja e li eyambo omolwuuwanawa wayalwe, mwa kwatelwa aatondi ye nokwa ningi iikulila yuuyuni auhe. Shoka osha li oshilonga sha dhenga mbanda.”—Mohandas K. Gandhi, omuwiliki gwopapolotika nogwopambepo gwaIndia osho a ti.

“Sho nda li okanona, onda li handi longwa Ombiimbeli nosho wo embo lyoompango dhOshijuda hali ithanwa Talmud. Ngame mwene Omujuda, ihe onda tuntulwa kuukwatya wa dhenga mbanda wOmunasaret.”—Albert Einstein, omunongononi omvalele yaNdowishi osho a ti.

‘Kungame, Jesus Kristus oku na aluhe uukwatya wa dhenga mbanda mondjokonona ayihe, e li Omwana gwaKalunga nOmuna gwOmuntu. Kehe shimwe a li a popi nenge a ningi oshi na oshilonga kutse kunena noinashi ningwa nale komuntu kutya nduno oku li momwenyo nenge okwa sa nale.’— Oohapu ndhoka odha popiwa kuSholem Asch, omunyoli gwomatotwahokololo, omvalele yaPoland, ngaashi dha nyolwa moshifo Christian Herald.

“Uule woomvula omilongo ndatu nantano monkalamwenyo yandje onda kala inaandi itaala musha. Oomvula ntano dha pita, onda li nda tompwa ndi itaale kutya Jesus omuntu gwolela. Onda li ndi itaale omalongo agehe gaJesus Kristus nonkalamwenyo yandje oya li ya lunduluka nziya.”—Count Leo Tolstoy, omunyoli gwomatotwahokololo nomufilosofi Omurusia osho a ti.

“Mondjokonona kapu na omuntu gumwe a nwetha mo aantu ngaashi Jesus, nenwethomo lye otali indjipala.”—Kenneth Scott Latourette, omunandjokonona nomunyoli Omuamerika osho a ti.

“Mbela otu na okudhiladhila kutya ondjokonona yaJesus oyi li ehokololo lyowala? Odhoshili kutya kapu na shoka tashi ulike kutya oyi li ehokololo lyowala. Mepingathano naashoka, nonando ondjokonona yaSokrates oyi itaalwa kwaayehe, kapu na omauliko ge na uunzapo tawu shi ulike ngaashi yaJesus Kristus.”—Jean-Jacques Rousseau, omufilosofi Omufulaanisa osho a ti.

Ngele opu na ngoka a gwana okukala oshiholelwa shetu monkalamwenyo, osha yela kutya oJesus Kristus. Omulongwantu gwomethelemimvo lyotango Paulus ngoka a hogololwa kuJesus okukala omulanduli gwe nokulombwela iigwana kombinga ye, okwe tu ladhipike ‘tu tale’ kuJesus. (Aahebeli 12:2; Iilonga 9:3) Jesus ote tu longo shike kombinga yankene tu na okukala monkalamwenyo? Ongiini onkalamwenyo ye tayi vulu oku ku nwetha mo?