“Eso lyandje kalya li lya thika”
Omuhingi gwololi enene yiiyagaya okwa li a nyengwa oku yi pangela. Ololi oya nuka ko kopate e tayi pumu omusamane nomukulukadhi gwe nosho wo omulumentu gwoomvula 23 mboka ya adhika taye ende kooha dhopate. Oshifokundaneki shaNew York City osha ti kutya omusamane nomukulukadhi oya sile poshiponga mpoka nomulumentu okwa li e ehamekwa nayi noka li e shi mpoka e li. Sho a penduka e ta mono shoka sha ningwa po, okwa ti: ‘Itandi shi itaale kutya osho sha ningwa po shika. Kalunga, kwathela ndje ndi pite muupyakadhi mbuka.’ Okwa ti: “Eso lyandje kalya li lya thika.”
OTASHI vulika nangoye wu uva nale oohapu dha fa ndhoka. Ngele omuntu a hupu moshiponga aantu ohaya ti: ‘Eso lye kalya li lya thika,’ ihe ngele gumwe a sile moshiponga shombaadhilila ohaya ti: ‘Eso lye lya thika’ nenge: ‘Ehalo lyaKalunga.’ Kutya nduno otaya ti kutya oshizemo osha nunwa, elago nenge oKalunga, shoka yi itaala osha faathana owala. Aantu oyendji oyi itaala kutya shoka tashi ya ningilwa monkalamwenyo osha nunwa nale nokaye na sho taya vulu okuninga po. Aantu osho haya dhiladhila ngaaka nokunena uuna pwa holoka uudhigu nenge oshiponga shontumba, naashika osha za nale.
Pashiholelwa, Aababilonia yonale oya li yi itaala kutya shoka hashi ningilwa aantu osha nunwa nale koonyothi nomainyengo gadho. Onkene oya li haya tala kegulu nokomandhindhiliko gontumba ge ya wilike. Aagreka nAaroma oya li haya galikana iikalunga mbyoka yi na oonkondo oku ya kwathela ya mone kutya onakuyiwa yawo otayi ka kala yi na elago nenge omupya, mbyoka omathimbo gamwe esimano lyayo hali kala li vule lyiikalunga yawo iinene Zeus naJupiter.
Aaindia nAabuddha yokuuzilo oyi itaala kutya shoka omuntu ta ningilwa ngashingeyi monkalamwenyo oshi li oshizemo shonakuziwa ye naashono ta ningi ngashingeyi otashi utha shoka ta ka ningilwa monakuyiwa. Omalongelokalunga gamwe mwa kwatelwa oongeleka odhindji dhUukwakriste oga taamba ko wo eitaalo ndyoka momalongo gago.
Onkee ano, itashi kumitha sho aantu oyendji mboka ya longwa pethimbo lyetu yi itaala natango kutya onkalamwenyo yawo, iizemo yaashoka haya ningi esiku kehe nuuthikilo wawo wahugunina owa nunwa nale noitaa vulu okuninga po sha naanaa. Mbela nangoye osho wu uvite ngawo? Mbela iinima mbyoka hayi ningwa monkalamwenyo ngaashi okupondola, omipya, okuvalwa nosho wo okusa oya nunwa nale shili? Mbela onkalamwenyo yoye nayo oya nunwa nale? Natu taleni nkene Ombiimbeli tayi vulu oku tu kwathela okuyamukula omapulo ngaka.
[Edhina lyomuthaneki gwethano pepandja 3]
Ken Murray/New York Daily News