4 Ino kala nomalimbililo
“Omwiitaali ngoye omunkundi, omolwashike wa limbililwa?”—Mateus 14:31.
OPU NA ESHONGO LINI? Aalongwa yaJesus omathimbo gamwe oya li ya limbililwa. (Mateus 14:30; Lukas 24:36-39; Johannes 20:24, 25) Ombiimbeli otayi hokolola okwaahe na eitaalo ku li ngaashi ‘uulunde tawu tu idhingilile.’ (Aahebeli 12:1) Omuyapostoli Paulus okwa nyola a ti: “Haantu ayehe yi itaala.” (2 Aatessalonika 3:2) Shika itashi ti kutya opu na yamwe mboka itaaya vulu okukala ye na eitaalo. Ihe aantu oyendji ihaye li lalakanene. Kalunga ota ka yambeka oonkambadhala dhaamboka taye shi ningi.
ONGIINI TO VULU OKUSINDA ESHONGO NDIKA? Tseya iinima mbyoka tayi ku etele omalimbililo. Pashiholelwa, omulongwa Tomas okwa li a limbililwa ngele Jesus okwa yumudhwa, nonando aalongwa yamwe oya ti kutya oye mu mona. Tomas okwa li a hala euliko. Oshizemo osha li shike? Jesus okwe mu pe uuyelele mboka a li a pumbwa opo Tomas a kale neitaalo lya kola.—Johannes 20:24-29.
Okupitila mOmbiimbeli, Jehova Kalunga okwe tu pa omayamukulo ngoka twa pumbwa opo tu ze momalimbililo. Pashiholelwa, oyendji oya kanitha eitaalo muKalunga nohaye mu pe uusama omolwiita, omuyonena nomaudhigu ngoka taga hepeke aantu. Mbela Ombiimbeli otayi ti ngiini moshinima shika?
Kalunga iha pangele okupitila momapangelo gopantu. Jesus okwa popi kutya oshishitwa shopambepo ihashi monika Satana oye e li “omupangeli guuyuni mbuka.” (Johannes 14:30) Satana okwa li a hala okuninga Jesus omupangeli gwuuyuni auhe ngele ote mu longele. Satana okwa ti: “Otandi ku ningi omupangeli gwaayihe notandi ku pe omauyamba agehe, oshoka ayihe mbika otandi vulu oku yi pa kehe ngoka nda hala.” Jesus ina patana kutya Satana ke na oonkondopangelo ndhoka. Pehala lyaashoka okwa ti: “Okwa nyolwa: ‘Omuwa Kalunga koye oye awike wu na oku mu galikana noku mu longela.’” (Lukas 4:5-8) Satana naapangeli yopantu oyo ye na okupewa uusama omolwokumona iihuna akuhe muuyuni, ihe haKalunga.—Ehololo 12:9, 12.
Masiku Jehova Kalunga ota ka hulitha po okumona iihuna akuhe. Okwa longekidha nale Uukwaniilwa nenge epangelo kohi yOmwana Jesus Kristus okulela aantu. (Mateus 6:9, 10; 1 Aakorinto 15:20-28) Onkundana ombwanawa kombinga yUukwaniilwa mboka otayi uvithwa kevi alihe, shoka shi li egwanitho lyehunganeko lyOmbiimbeli. (Mateus 24:14) Masiku Uukwaniilwa mbuka otawu ka hulitha po ayehe mboka taye wu kondjitha notawu ka kutha po okumona iihuna.—Daniel 2:44; Mateus 25:31-33, 46; Ehololo 21:3, 4.
OTATU KA MONA ONDJAMBI YASHIKE? Mboka ye na omalimbililo oya fa omakuthikuthi ngoka taga tengatengithwa “kombepo kehe yomalongo gaantu aafundja.” (Aaefeso 4:14; 2 Petrus 2:1) Mepingathano naashoka, mboka taya mono omayamukulo taga mbilipaleke komapulo gawo otaya vulu ‘okukala ya kola meitaalo.’—1 Aakorinto 16:13.
Aanyanyangidhi yoshifo shika, Oonzapo dhaJehova otadhi vulu oku ku kwathela wu mone omayamukulo komapulo ngoka ge ku limbilika. Otadhi ku hiya wu gongale pamwe nadho nowu konakone omalongo gadho paumwene. Ngele to shi ningi, eitaalo lyoye muKalunga otali ka kala lya kolelela.
Ngele owa hala okumona uuyelele wa gwedhwa po, tala ontopolwa 8, “Uukwaniilwa waKalunga oshike?” nosho wo ontopolwa 11, “Omolwashike Kalunga e ethele okumona iihuna ku kale po?” membo Omalongo gashili gOmbiimbeli ogeni naanaa?a
[Enyolo lyopevi]
a Lya nyanyangidhwa kOonzapo dhaJehova.
[Ethano pepandja 9]
Mboka taya mono omayamukulo taga mbilipaleke komapulo gawo, otaya vulu okukala neitaalo lya kola