Omolwashike omayele gOmbiimbeli taga longo nokunena?

“Enyolo kehe olya nyolithwa kOmbepo yaKalunga noli na oshilonga shokulonga . . . omuntu ondjila yu uka.”—2 TIMOTEUS 3:16.

OMATHELEMIMVO ga pita, Ombiimbeli oyi inyengitha aantu yomaputuko ogendji ya lundulule nokuhwepopaleka onkalamwenyo yawo. Enyolo ndyoka li li pombanda otali yelitha kutya omayele gayo oga za kuKalunga nomolwaashoka oyi li kapyoko moshinima shika. Nonando oya nyolwa kaantu, mOmbiimbeli omu na omadhiladhilo gaKalunga. Ombiimbeli otayi yelitha tayi ti: “Aantu mokupopya elaka lya za kuKalunga oya wilikwa kOmbepo Ondjapuki.”—2 Petrus 1:21.

Ombiimbeli otayi vulu oku tu wilika momikalo mbali. Gwotango, otayi tu yelithile shoka tashi tu etele onkalamwenyo yi li hwepo. Omutiyali, oyi na oonkondo okwiinyengitha aantu ya ninge omalunduluko ga pumbiwa opo ya kale nonkalamwenyo yi li hwepo. Natu tale omikalo ndhoka mbali.

Ombiimbeli otayi tu longo tu adhe omalalakano taga ti sha

Kalunga oku uvaneka mOmbiimbeli ta ti: “Ongame nda hala, ndi ku longe nondi ku tseyithile ondjila u na okweenda nayo, otii ku pukulula noku ku tonatela nomeho gandje.” (Episalomi 32:8, OB-1954) Ndhindhilika kutya Kalunga oha gandja omayele nelongo ndyoka tali tu kwathele tu kale twa kotoka. Ngele otwa pewa epukululo kombinga yomalalakano ngoka tage tu etele uuwanawa lela monkalamwenyo otashi ke tu kwatha katu ihepeke niinima kaayi na oshilonga.

Pashiholelwa, aantu oyendji otaya lalakanene esimano nuuyamba monkalamwenyo yawo. Opu na omambo ogendji gokwiikwathela ngoka taga pe aantu omayele nkene taya vulu okukala ye vule yalwe nenge ya ninge aayamba. Ihe Ombiimbeli otayi tu lombwele tayi ti: “Okusilathana efupa . . . owaleelela nokutidha ombepo.” Otayi ti wo: “Nakuhola iimaliwa ihe yi kuta.” (Omuuvithi 4:4; 5:10) Mbela omayele ngoka otaga longo nokunena?

Opo tu mone kutya omayele gOmbiimbeli oge na oshilonga, natu tale koshiholelwa shaAkinori gwokuJapani. Nonando Akinori okwa li e li methigathano lya kwata miiti kombinga yelongo, okwa li e shi pondola e ta mono onkatu ye mounivesiti yimwe ndjoka ya dhenga mbanda nokwa mono iilonga mehangano ndyoka lya simana. Onkalamwenyo ye oya li ya fa tayi ende nawa. Ihe nonando ongaaka, elongo niilonga ye inayi mu etela ombili ndjoka a li a tegelela. Pehala lyaashono, iimpwiyu yonkalamwenyo nomvulwe oye mu etele uunkundi. Ookuume ke kiilonga inaye mu kwathela naanaa. Okwa kwatwa kepolimano e ta ningi ombwii yomalovu nokwa li a hala okwiidhipaga nokuli. Konima okwa tameke okukonakona Ombiimbeli nOonzapo dhaJehova. Shoka i ilongo osha lundulula etaloko lye lyaashoka sha simana monkalamwenyo. Konima yokathimbo uupyakadhi mboka a li e na omolwiimpwiyu yonkalamwenyo owa ti po hwepo. Pehala lyokulalakanena uuntsa nesimano, Akinori okwa li a mono uushili weyeletumbulo lyOmbiimbeli ndyoka tali ti: “Omutima gwa gundjila ogwo omwenyo gwolutu.”—Omayeletumbulo 14:30.

Oto dhiladhila okulalakanena shike monkalamwenyo yoye? Oshike tashi ku etele enyanyu lyashili? Mbela ondjokana tayi ende nawa? Nenge okusila aanona yoye oshimpiiyu palutu? Okukala wu na ookuume oyendji? Ongele wa nyanyukwa monkalamwenyo? Ayihe mbika omalalakano ge na oshilonga. Ombiimbeli otayi popile shili omalalakano ngoka, ihe hago tu na okupititha komeho monkalamwenyo yetu. Molwaashoka Ombiimbeli oyi na omayele taga longo, otayi ulike koshitegelelwa sha simana opo omuntu a kale nonkalamwenyo tayi ti sha, sho tayi ti: “Tila Kalunga nou dhiginine iipango ye, oshoka aantu ayehe osho ye na okuninga.” (Omuuvithi 12:13) Ngele ihatu tila Kalunga, onkalamwenyo otayi kala kaayi na elalakano lyasha noyiyemateka. Kombinga onkwawo, Ombiimbeli otayi tu shilipaleke tayi ti: ‘Ngoka ti inekele OMUWA, ota kala e na elago.’—Omayeletumbulo 16:20.

Nkene Ombiimbeli hayi inyengitha aantu ya lunduluke

Omuyapostoli Paulus okwa nyola a ti: “Oohapu dhaKalunga odhi na omwenyo nodhi na oonkondo.” Ngaashi egongamwele lyoongenge mbali lya tsa, otayi vulu okwaadha omadhiladhilo gomuule gomuntu nomahalo ge. (Aahebeli 4:12) Ombiimbeli oyi na oonkondo dhokulundulula onkalamwenyo yaantu molwaashoka ohayi ya kwathele yi ikonakone nawa lela, ihe hangaashi taya dhiladhila ye li. Onkee ano, aantu mboka ye na iikala yokomutima yu uka, otaya ka mona kutya oya pumbwa okuninga omalunduluko. Pashiholelwa, Paulus okwa popya Aakriste yomegongalo lyAakorinto shonale mboka ya li aafuthi, oonkolwi naahondeli a ti: “Yamwe yomune osho mwa li mwa tya ngaaka. Ihe omwa yogwa oondjo . . . okOmbepo Ondjapuki yaKalunga.” (1 Aakorinto 6:9-11) Ombepo ondjapuki yaJehova otayi longo nokunena noyi na oonkondo notayi vulu okwiinyengitha aantu ya ninge omalunduluko ngoka ga pumbiwa.

Mario ngoka a kala muEuropa okwa li omuhahu ha hili omakaya, ye oha landitha epangwe. Oshikando shimwe sho omupolisi e mu kutha iingangamithi, okwa li a geye noonkondo noku mu ponokela nokuningila uushadha oshihauto shopolisi. Natango iishewe, Mario ka li e na iilonga nokwa li e na oondjo dhaantu oyendji. Sho a mono kutya ita vulu okukandula po uupyakadhi we, okwa zimine okukonakona Ombiimbeli. Sho ta humu komeho, okwa tameke okwiiyopaleka nawa kolutu nokweetha po okulongitha nokulanditha iingangamithi nosho wo elongithonkondo. Mboka ye mu shi oya li haya kala ya kumwa. Ngele ye mu mono ohaye mu pula taya ti: “Ongoye ngaa Mario ano?”

Oshike shi inyengitha Akinori naMario ya lundulule onkalamwenyo yawo noya mone ombili nenyanyu monkalamwenyo yawo? Osha yela kutya osha li ontseyo yaKalunga ndjoka ya mono okupitila mekonakonombiimbeli. Kalunga oye owala ta vulu okugandja elongo ndyoka tali tu kwathele tu pondole monkalamwenyo yetu ngashingeyi nokukala netimaumbwile lyomwenyo gwaaluhe monakuyiwa. E li Tate yetu, Jehova Kalunga ota popi natse okupitila mOmbiimbeli ta ti: “Pulakena, mumwandje, ngoye u taambe oohapu dhandje, nena omimvo dhokukalamwenyo kwoye otadhi lelepalekwa. . . . Ngele to katuka, oonkatu dhoye itadhi katekwa, nongele to matuka, ito ka tengenya. Dhiginina eputudho, ino li etha tuu, li pungula, oshoka olyo omwenyo gwoye.” (Omayeletumbulo 4:10-13) Mbela opu na ngaa omayele ngoka taga longo ge vule gOmushiti gwetu?

[oshimpungu/Ethano pepandja 7]

Omayele ngoka taga longo nokunena

Ombiimbeli oyi na omayele ge na oshilonga ngoka taga vulu oku tu wilika mokanima kehe monkalamwenyo yetu. Tala kiiholelwa yimwe po:

• Okukala wu na ekwatathano ewanawa nayalwe

“Onkee ano shaa shoka mwa hala aantu ye mú ningile, osho ya ningileni wo.”—Mateus 7:12.

“Ngoka gwomokati keni omudhinwa kwaayehe, oye mukuluntu.”—Lukas 9:48.

“[Yakuleni] oondjendi momagumbo geni.”—Aaroma 12:13.

• Nkene wu na okuyanda omikalo omiwinayi

“Enda pamwe naanawino, u likole owino, ihe ngoka ta kala paagoya, ota likola uuwinayi.”—Omayeletumbulo 13:20.

“Ino kala mokati kaamboka haya finyuna yomaviinu.”—Omayeletumbulo 23:20, KB.

“Ino endathana nomugeyentu.”—Omayeletumbulo 22:24.

• Okutunga ondjokana ya kola

“Omulumentu kehe oku na okuhola omukiintu gwe, ngashika i ihole ye mwene, nomukiintu kehe oku na okusimaneka omulumentu gwe.”—Aaefeso 5:33.

“Kaleni mu na olukeno, ohenda, eifupipiko, ombili neidhidhimiko. Kwathathaneni, dhiminathanii po oondjo ethimbo kehe.”—Aakolossa 3:12, 13.

• Nkene tu na okuputudha aanona

“Putudha omumati pandjila ndjoka e na okweenda nayo, nena nomuukulupe ita gamuka mo muyo.”—Omayeletumbulo 22:6.

“Aakuluntu, inamu hinda aana yeni noku ya geyitha, ihe ya putudheni ne mu ya kumagidhe paukriste.”—Aaefeso 6:4.

• Okuhenuka oompata

“Eyamukulo etalala otali loteke ondjahi, ihe elaka lyoshikanyeko otali tukula ongeyo.”—Omayeletumbulo 15:1.

‘Lalakaneneni okusimanekathana.’—Aaroma 12:10.

Nokuli nomokati kookuume, oontamanana otadhi ka yandwa uuna ya nyola euvathano lyawo miinima yopangeshefa. Omupiya gwaKalunga Jeremia okwa nyola a ti: “Onda nyola onzapo yelando noku yi shaina montaneho yoombangi nonda yalula iimaliwa noku yi yeleka koshiviha.”—Jeremia 32:10.

• Kokeka iikala yu uka

“Kaleni nokudhiladhila iinima mbyoka iiwanawa noya gwana okusimanekwa: iinima mbyoka yoshili . . . , ya yogoka noyi na epopilo ewanawa.”—Aafilippi 4:8.

Ombiimbeli otayi tu ladhipike tu yande omadhiladhilo omawinayi nokungungutulila ‘iipewa yetu mbyoka tu na.’ Otayi ti: “Etegameno nali mú nyanyudhe.”—Judas 4, 16, OB-1954; Aaroma 12:12.

Ngele tatu tula miilonga omakotampango ngaka omawanawa, itatu ka kala owala tu na ombili notwa gwanenwa, ihe otashi ke tu kwathela wo tu ninge ngaashi Kalunga a hala note ke tu laleka nuuyamba. Ombiimbeli otayi ti: “Aayuuki otaa ka thigulula evi e taa kala mo sigo aluhe.”—Episalomi 37:29.

[Omathano pepandja 5]

Akinori sho a li miilonga (kolumoho) nosho wo nomukulukadhi gwe kunena tayu uvitha oshili yOmbiimbeli nenyanyu