Mbela Kalunga okwe ku uvanekela uuyamba?
‘Kalunga okwa hala wu kale omuyamba, wu na iihauto oyindji noongeshefa tadhi humu komeho. Itaala owala muye, patulula ondjato yoye e to mu pe ashihe shoka to vulu oku mu pa.’
OSHIFOKUNDANEKI shoka hashi nyanyangidhwa moBrasilia osha ti kutya oohapu ndhoka odha kala hadhi popiwa komalongelokalunga gontumba moBrasilia. Etumwalaka ndika olya li lya taambiwa ko kaantu oyendji. Shi na ko nasha neyalulo lyaantu mboka hayi iti Aakriste mIilongo yaHangana, oshifo Time osha gandja olopota tayi ti: “Oopelesenda 61 dhaantu odhi itaala kutya Kalunga okwa hala aantu ya kale ya yambapala. Omanga oopelesenda 31 dhaantu . . . dha zimina kutya ngele owa gandja iimaliwa yoye kuKalunga, ote ke ku laleka nuuyamba niimaliwa oyindji.”
Eitaalo lya tya ngeyi hali ithanwa uulinawa wuuteolohi, otali indjipala nokweendelela, unene tuu miilongo yokolukadhi lwaAmerika, ngaashi Brasilia noongundu dhaantu otadhi matukile koongeleka ndhoka hadhi uvanekele aantu kutya otaya ka lalekwa nuuyamba kuKalunga pamaliko. Ihe mbela Kalunga ohu uvanekele ngaa shili mboka haye mu longele uuyamba? Mbela aapiya yaKalunga ayehe yonale oya li aayamba?
Oshoshili kutya mOmanyolo gOshihebeli, olundji ohatu lesha mo kutya aantu mboka Kalunga a li a laleke nuuyamba oya li aayamba. Pashiholelwa, muDeuteronomium 8:18 otatu lesha mo taku ti: “Dhimbulukweni kutya OMUWA Kalunga keni oye he mu pe oonkondo dhokuninga aayamba.” Shika osha li sha shilipaleke Aaisraeli kutya ngele oya kala nokuvulika kuKalunga, ote ke ya ninga oshigwana oshiyamba.
Mbela ongiini kombinga yaapiya yaKalunga? Omulumentu omudhiginini Job okwa li e na eliko olindji, nokonima yethimbo Satana okwa li e mu etele oluhepo, Jehova okwa li a galulile Job ayihe a li e yi na “lwaali.” (Job 1:3; 42:10,OB-1954) Abraham naye okwa li omuyamba. Genesis 13:2 ota ti kutya okwa li “omuyamba unene e na oonzi, iikombo noongombe, osho wo oshisiliveli noshingoli.” Sho omatangakwiita giilongo ine yaakwaniilwa yokuuzilo ga li ga kwata po omutekulu gwaAbraham, Lot, Abraham ‘okwa homateke aapiya ye aainekelwa ayehe mboka ya valelwa megumbo lye, mboka ye shi okukondja, ye li 318.’ (Genesis 14:14, yelekanitha OB-1954) Shoka otashi ulike kutya Abraham okwa li e na uukwanegumbo uunene sho a li a kutha aalumentu 318 “aainekelwa” mboka ye shi okukondja nawa. Molwaashoka okwa li a vula okusila oshimpwiyu uukwanegumbo mboka uunene, osha li shu ulike kutya okwa li omulumentu omuyamba e na oonzi, iikombo noongombe odhindji.
Aapiya yaKalunga oyendji yonale aadhiginini oya li aayamba, ngaashi Abraham, Isak, Jakob, David naSalomo. Mbela shika osha hala okutya Kalunga ota ka ninga ayehe mboka haye mu longele aayamba? Mepingathano naashoka, mbela gumwe ngele okwa hepa, otashi ti kutya ina hokiwa kuKalunga? Oshitopolwa tashi landula otashi ka kundathana omapulo ngaka.