Mbela ngele omuntu okwa hepa otashi ulike kutya ina hokiwa kuKalunga?

KALUNGA okwa li a lombwele Aaisraeli yonale a ti: “Moshigwana shoye itamu ka kala ohepele.” Shika osha li ngaaka, molwaashoka mOmpango ndjoka a li e ya pa, okwa li e ya lombwele kutya oye na okusila oshimpwiyu mboka ya hepa nokudhimina po nokuli yalwe oongunga dhawo. (Deuteronomium 15:1-4, 7-10) Onkee ano, moshigwana shaIsraeli kamwa li mu na ngoka a hepa, oshoka Jehova okwa li u uvaneka kutya ote ke shi laleka nuuyamba. Nonando ongaaka, elaleko nuuyamba ndyoka olya li lyi ikwatelela kokuvulika kwawo kuJehova, shoka Aaisraeli ya nyengwa okuninga.

Ihe shika itashi ti kutya ando mboka ye na omaliko omashona kaya li ya hokiwa kuKalunga, omanga mboka ye na oshindji ya lalekwa nuuyamba kuKalunga. Oyendji yomaapiya yaKalunga aadhiginini oya li ya hepa pamaliko. Omupolofeti Amos okwa li owala omusita gwoonzi noha shata oonkwiyu. (Amos 1:1; 7:14) Pethimbo lyomupolofeti Elia, sho muIsraeli mwa li mu na oshikukuta, Elia okwa li a silwa oshimpwiyu komuselekadhi ohepele, ngoka uusila we nomagadhi ge ga li ge ya hupitha pashikumithalonga pethimbo lyoshikukuta. Elia nomuselekadhi kaya li ya ningi aayamba, ihe Jehova okwa li owala e ya pe shoka ya pumbwa.—1 Aakwaniilwa 17:8-16.

Ethimbo neuthilo otali vulu okuninga omuntu ohepele inaashi tegelelwa. Oshiponga nenge uuwehame otayi vulu okukeelela omuntu kaa longe sha pakathimbo nenge sigo aluhe. Eso otali vulu okuninga aantu oothigwa nenge aaselekadhi. Nokuli oonkalo ndhoka oombwinayi itadhi ulike kutya aantu inaya hokiwa kuKalunga. Ehokololo lyaNaomi naRut oli li oshiholelwa tashi tsu omukumo shi na ko nasha nankene Jehova ha sile oshimpwiyu pahole mboka ya hepa. Nonando Naomi naRut oya li ya thigwa moluhepo olunene omolwomaso gaasamane yawo, Jehova okwa li e ya laleke nuuyamba nokwe ya sile oshimpwiyu.—Rut 1:1-6; 2:2-12; 4:13-17.

Osha yela kutya oluhepo italu ulike kutya omuntu ina hokiwa kuJehova. Aantu mboka aadhiginini kuJehova Kalunga otaya vulu okukala ye na einekelo moohapu dhomukwaniilwa David ndhoka tadhi ti: “Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOMUWA, nenge oyana taa hehela iikulya.”—Episalomi 37:25.

[Ethano pepandja 8]

Nonando Naomi naRut oya li ya hepa noonkondo, Kalunga okwe ya laleke nuuyamba nokwe ya sile oshimpwiyu pahole