Omolwashike aantu ya ngwangwana kutya ombepo ondjapuki oshike?
OMBEPO ondjapuki oshike? Epulo ndyoka otali monika lya fa lya nathangwa, ihe otashi vulika li kale edhigu okuyamukulwa. Omupapa Benedict omuti-16 okwa li a lombwele ongundu yaantu muAustralia a ti: “Konyala itatu vulu okuuva ko nando Ombepo” ondjapuki.
Osha yela kutya opu na omataloko nomalimbililo ogendji uuna taya pulwa kutya ombepo ondjapuki oshike? Yamwe ohaya yamukula taya ti:
• Omuntu gwolela ngoka ha kala momitima dhaalongwa yaKristus.
• Okukala po kwiilonga yaKalunga muuyuni.
• Omuntu omutitatu palongo lyUukwatatu.
Engwangwano ndyoka olya tameke uunake? Olya tameka methelemumvo eti-4 sho aateolohi yamwe ya ti kutya ombepo ondjapuki oya li omuntu ngoka aniwa e thike puKalunga. Edhiladhilo ndyoka kali mo mOmanyolo naalanduli yaKristus inaya longa aantu ngaaka. Embo New Catholic Encyclopedia otali yelitha tali ti: “Etestamendi Ekulu otali ulike sha yela kutya ombepo yaKalunga kayi shi omuntu . . . Ombepo yaKalunga oyo owala oonkondo dhaKalunga.” Embo ndyoka olya gwedha ko tali ti: “Oovelise odhindji mEtestamendi Epe otadhi ulike kutya ombepo yaKalunga oyo oshinima shontumba, ihe hamuntu gwontumba; shika oshi iwetikile unene tuu mokufaathanitha ombepo [ondjapuki] noonkondo dhaKalunga.”
Oshi shi okuuviwa ko sho shi li oshidhigu kaantu okudhiladhila kutya oonkondo otadhi vulu okukala omuntu. Ekonakono ndyoka opo lya ningwa mIilongohangano olya holola kutya aantu oyendji yamo itaya tsu kumwe nedhiladhilo kutya ombepo ondjapuki oyi li omuntu gwolela. Mbela oye li mondjila? Nenge natu itaale ngaa aateolohi mboka taya komangele aniwa kutya “Ombepo Ondjapuki omuntu gwolela a yooloka ko kuHe nokOmwana”?
Opo tu mone eyamukulo lya yela, otu na okutala mOohapu dhaKalunga, Ombiimbeli, ndjoka tayi popi nawanawa ombepo ondjapuki. Omuyapostoli Paulus okwa nyola a ti: ‘Enyolo kehe olya nyolithwa kOmbepo yaKalunga noli na oshilonga shokulonga oshili nokukumagidha.’—2 Timoteus 3:16.
Omolwashike twa pumbwa okutseya oshili kombinga yombepo ondjapuki? Molwaashoka mokutseya oshili ndjoka oto ka vula okumona ekwatho okuza kuKalunga. Mbela omathimbo gamwe oho kala wu uvite wa tyololoka? Jesus oku uvanekele aalongwa ye a ti: “Indileni, e tamu pewa . . . Ne mboka aawinayi ngele omu shi okupa aana yeni omagano omawanawa, unene tuu Ho yeni yomegulu ota gandja Ombepo Ondjapuki kumboka taye mu indile.”—Lukas 11:9, 13.
Iitopolwa tayi landula ko otayi ke tu kwathela tu mone shoka Omanyolo taga ti kombinga yombepo ondjapuki. Otatu ku ulukilwa wo nkene tayi vulu oku tu kwathela monkalamwenyo yetu.
[Oohapu dha simana pepandja 3]
Omanyolo otage tu lombwele kutya ombepo ondjapuki oshike