Mbela owi itulila po ethimbo lyokukonakona Ombiimbeli?
OMUMVO gwa zi ko, Olutuwiliki olwa tseyitha elunduluko lyokugongala opo shi pe omaukwanegumbo ethimbo olindji lyokukonakona nokukundathana Ombiimbeli. Ngele owu li omutse gwuukwanegumbo, shilipaleka kutya oho konakona aluhe Ombiimbeli nomukulukadhi gwoye naanona yoye. Aaihokani mboka kaaye na aanona oye na okulongitha ethimbo ndyoka mokukonakona Ombiimbeli pamwe. Aamwatate naamwameme mboka kaye na iinakugwanithwa yuukwanegumbo oye na okulongitha nawa ethimbo ndyoka mokukonakona Ombiimbeli paumwene.
Oyendji oya pandula elongekidho ndyoka lyEkonakono lyuukwanegumbo lyokongulohi. Pashiholelwa, Kevin omukuluntugongalo, okwa nyola a ti: “Katu na iitya nomatumbulo opo tu gandje olupandu nkene tu uvite megongalo. Tu li aakuluntugongalo, otwa kundathana nkene tatu vulu okulongitha ongulohi ndjoka okukonakona Ombiimbeli nomaukwanegumbo getu, ngaashi naanaa Olutuwiliki lwa ti.”
Jodi omukulukadhi gwomukuluntugongalo, okwa nyola a ti: “Otu na oyanakadhona yetu yatatu, gumwe oku na omimvo 15, gumwe 11 nomukwawo 2. Opo owala twa adhika twa tembukile kegongalo lyokuudhika. Ohashi tu pula ethimbo olindji noonkambadhala tu ilongekidhile okugongala kehe. Ihe omolwelunduluko ndyoka, ngashingeyi otu na ongulohi ndjoka twa gwedhelwa po tu gandje eitulomo kekonakono lyuukwanegumbo.”
John naJoAnn aaihokani mboka ye li aakokolindjila yondjigilile, oya nyola ya ti: “Katwa li hatu ningi aluhe ekonakonombiimbeli lyuukwanegumbo molwaashoka otwa li hatu li thininike pokati komaipyakidhilo gegongalo gi ili nogi ili. Elongekidho ndika epe oli li shili omagano taga talaleke pambepo ga za kuJehova, ngele otatu longitha ethimbo ndyoka momukalo ngoka ngaashi shi na okukala.”
Tony omumwatate ngoka inaa hokana gwomimvo 20 nasha, oha ningi ekonakono lye kongulohi yEtiyali kehe. Oha longitha omasiku galwe moshiwike okwiilongekidhila okugongala. Okwa ti: “Ohandi kala nda tegelela unene Etiyali nondjuulukwe.” Omolwashike mbela? “Molwaashoka ongulohi ndjoka oyi li esiku lyandje lyi ikalekelwa naJehova.” Okwa yelitha a ti: “Konyala uule woowili mbali ohandi konakona iipalanyolo mbyoka tayi koleke ekwatathano lyandje naJehova. Okukala ndi na ethimbo lya gwana okuninga ekonakono, ohashi pe ndje ompito ndi tedhatedhe koovelise dhOmbiimbeli ndhoka nda lesha.” Uuwanawa washike a mona? Okwa ti: “Shoka tandi ilongo kombinga yaJehova oha shi ningine muule womutima gwandje shi vulithe nale.” Okwa gandja oshiholelwa shimwe a ti: “Onda lesha kombinga yuukuume mboka wa li pokati kaDavid naJonatan membo Insight. Ondi ilonga oshindji kuJonatan ngoka a li ki ihole ye mwene. Oshiholelwa she osha kwathela ndje ndi mone kutya otashi ti shike okukala kuume kashili. Natango onda tegelela okwiilonga iinima iipe mongulohi ndjoka yEtiyali.”
Nopwaahe na omalimbililo, aapiya yaJehova ayehe otaya ka mona uuwanawa mokulongitha nawa ethimbo ndyoka lya gwedhwa po okukonakona Ombiimbeli paumwene nokuninga ekonakono lyuukwanegumbo.