Otu shi shi ngiini kutya Kalunga oku na ko nasha natse shili?
EPULO ndika lyonale nolya simana, olya kala nokupulwa kaantu uule womayovimimvo: Ngele Kalunga oku tu hole, omolwashike ano pu na okumona iihuna okundji noonkondo? Otashi vulika nangoye to tsu kumwe nasho kutya ngele owu hole omuntu gwontumba, ito ka kala wa hala a mone iihuna, nongele e li muupyakadhi oto ka kala wa hala oku mu kwathela. Molwaashoka muuyuni omu na okumona iihuna okundji, oyendji ohaya dhiladhila kutya Kalunga ke na ko nasha natse. Onkee ano, osha simana tu tale tango uunzapo mboka tawu ulike kutya Kalunga oku tu hole lela noku na ko nasha natse.
Eshito otali ulike kutya Kalunga oku na ohole
Jehova Kalunga oye “Omushiti gwegulu nevi nefuta naashihe shoka sha kala muyo.” (Iilonga 4:24) Ngele tatu tedhatedha kwaashoka Jehova a shita, otu na okuthika lela pehulithodhiladhilo kutya Kalunga oku na ko nasha natse. Pashiholelwa, dhiladhila owala kiinima mbyoka hayi ku nyanyudha. Mbela owu hole iikulya iiwanawa? Jehova okwa li ta vulu oku tu pa owala oludhi lumwe lwiikulya opo yi tu kaleke nomwenyo. Pehala lyaashoka, Kalunga okwa shita iikulya yomaludhi gi ili nogi ili mbyoka tatu vulu okunyanyukilwa. Sha faathana, Jehova okwa shita evi lyo opala li na omiti, oongala nosho wo omushitilo omukumithi opo onkalamwenyo yi kale yinyanyudha noyihokitha kutse.
Dhiladhila wo nkene twa shitwa. Nonando uukwatya wetu wokuvula okukala twa nyanyukwa, okunyanyukilwa omusika nosho wo okunyanyukilwa eopalo lyiinima iiwanawa inayi pumbiwa lela opo tu kale nomwenyo, ayihe oyi li omagano ga za kuKalunga ngoka ha ningitha onkalamwenyo yetu yi kale ombwanawa. Dhiladhila ishewe kombinga yekwatathano lyoye nayalwe. Mbela olye ihaa nyanyukilwa eendathano lyopahole nookuume aawanawa nenge okupapatelwa kugumwe ngoka tu hole noonkondo? Okukala tu na ohole yokuhola yalwe, kaku li tuu omagano ga za kuKalunga omunahole! Molwaashoka Kalunga omuntu okwe mu shita e na uukwatya wohole, shoka otashi ulike kutya Kalunga naye oku na uukwatya mboka.
Ombiimbeli otayi tu shilipaleke kutya Kalunga oku na ohole
Ombiimbeli otayi tu lombwele kutya Kalunga oye ohole. (1 Johannes 4:8) Ohole ye itayi ulikwa owala meshito, ihe oyi iwetikile wo nomOohapu dhe, Ombiimbeli. Pashiholelwa, Ombiimbeli otayi gandja wo omisindalandu ndhoka tadhi humitha komeho uukolele notadhi tu kumagidha tu kale nondjele miinima ayihe, notadhi tu londodha shi na ko nasha nuunkolwe nosho wo nuufukedhi.—1 Aakorinto 6:9, 10.
Ombiimbeli otayi tu pe wo omayele gopandunge ge na ko nasha nokweendathana naantu yalwe sho tayi tu kumagidha tu kale tu holathane nokuungaunga nayalwe nesimaneko nonombili. (Mateus 7:12) Otayi pangula iilonga nomikalo ndhoka hadhi eta okumona iihuna, olwiho, oluhoko, ondumbo, eyonondjokana nokudhipaga. Ngele kehe gumwe okwa kambadhala okuvulika komayele omawanawa ngoka taga adhika mOmanyolo, osha yela kutya otapu ka kala okumona iihuna okushona muuyuni auhe.
Ihe Kalunga oku ulike ohole ye momukalo gwa dhenga mbanda sho a gandja Omwana, Jesus, a kulile aantu. Johannes 3:16 ota ti: ‘Kalunga okwa kala e hole uuyuni nokwa gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.’ Kungawo, Jehova okwa kala a longekidha nale okuhulitha po eso nokumona iihuna akuhe sigo aluhe.—1 Johannes 3:8.
Osha yela kutya opu na uuyelele owundji mboka tawu ulike kutya Jehova oku tu hole. Ano oshi li pandunge kutya Kalunga iha kala a nyanyukwa ngele tatu mono iihuna. Ota ka katuka onkatu opo a hulithe po okumona iihuna. Katu na okutengeneka shi na ko nasha noshinima shika, Ombiimbeli otayi tu lombwele lela nkene Kalunga ta ka hulitha po okumona iihuna.
[Ethano pepandja 4]
Okukala tu hole yalwe, oko omagano ga za kuKalunga omunahole