“Naku ze ishewe limwe”

ALLEN okwa tameke okulongitha nayi iikolitha sho a li e na oomvula 11.a Ye nookuume ke oya li taya dhana miihwa, taya yelekele aantu mboka haya mono taya dhana mookino. Aantu mboka taya yelekele kaya li taya nu iikolitha yolela, ihe Allen nookuume ke oya li taya nu iikolitha yolela.

Tony okwa li e na oomvula 40 sho a tameke okunwa sha pitilila kashona na kashona, okuza pokahalasa kamwe nenge uyali sigo opuuhalasa utano nenge uhamano ongulohi kehe. Konima yethimbo ka li we ha kala e shi kutya oha nu uuhalasa ungapi mesiku.

Allen okwa li a kongo ekwatho omolwuupyakadhi we wokunwa sha pitilila. Tony okwa li a tindi ekwatho ndyoka a pewa kuyandjawo nokookuume ke mboka ya li ye mu hole. Allen oku li natango momwenyo nokwa vula okuhokolola kombinga yondjokonona ye, ihe Tony okwa sila moshiponga shoshihauto oomvula dhontumba dha pita sho a li ta hingi a kolwa.

Nokuli nando omuntu oha nu sha pitilila oye awike, iilanduliko yokunwa kwe ohayi gumu onkalamwenyo yaantu yalwe nolundji ohayi kala ya nika oshiponga. Okulongitha nayi iikolitha ohaku etitha omadhengo, omatukano, omaponokelo naantu oyendji ohaya sile miiponga yiihauto nayamwe ohaya monene iiponga miilonga molwaashoka ya kolwa nohaku etitha wo uunkundi wopalutu. Okunwa sha pitilila ohaku pula aakwashigwana iimaliwa oyindji noonkondo omumvo kehe, kakele kaashono, ohaku etele wo oohandimwe, omaukwanegumbo nosho wo aanona uupyakadhi wopamaiyuvo.

Nonando ongaaka, ehangano National Institutes of Health moAmerika olya ti: “Itashi ti kutya kehe gumwe ngoka ha nu olundji oye ombwiyi, noombwiyi odhindji ihadhi nu kehe esiku.” Oyendji mboka kaaye shi oonkolwe ohaya kokeke ondjigilile yokunwa sha pitilila inaaye shi tseya. Yalwe ohaya nu omalupita, ihe otashi vulika ya nwe uuhalasa utano poshikando.

Ngele oho nu iikolitha, oshike tashi ulike kutya oho nu sha pitilila? Ongiini to vulu okutseya kutya inashi pumbiwa we ku ze limwe? (Omayeletumbulo 23:29, 30) Iitopolwa tayi landula otayi tu pe uuyelele tawu kwathele moshinima shika.

[Enyolo lyopevi]