Hedha popepi naKalunga

Oha kongo uuwanawa momuntu

1 AAKWANIILWA 14:13 (KB)

“OMADHILADHILO getu agehe noondjulukwe dhetu adhihe [Jehova] oku dhi shi.” (1 Ondjalulo 28:9) Oohapu ndhoka dha nwethwa mo odha li dha nyolwa nelalakano lyoku tu kwathela tu kale tu na olupandu molwaashoka Jehova e na ko nasha natse. Jehova oha kongo uuwanawa momitima dhetu nonando inatu gwanenena. Shika oshi iwetikile moohapu dhe ndhoka a li a popi kombinga yaAbija, ndhoka tadhi adhika mAakwaniilwa yotango 14:13.

Abija okwa li a kala muukwanegumbo wa kolokosha. He Jerobeam oye a li omukwatelikomeho gwezimo lyaakwaniilwa aashunimonima.a Jehova okwa li a lalakanene okukomba po egumbo lyaJerobeam ‘ngaashi oonyata’ tadhi kombwa po. (1 Aakwaniilwa 14:10) Ihe Kalunga okwa li a gandja elombwelo kutya oshilyo owala shimwe shuukwanegumbo waJerobeam, Abija ngoka a li te ehama unene oye owala a li ta ka ningilwa efumviko li shi okusimanekwa.b Omolwashike? Kalunga okwa yelitha ta ti: “Mezimo alihe lyaJerobeam [muye awike] mwa monika sha shoka tashi opalele Omuwa, Kalunga kaIsraeli.” (1 Aakwaniilwa 14:1, 12, 13, KB) Oohapu ndhika otadhi tu lombwele shike kombinga yaAbija?

Ombiimbeli inayi popya kutya Abija okwa li omulongeli gwaKalunga omudhiginini. Ihe nonando ongaaka, muye omwa li mu na uuwanawa wontumba. Uuwanawa mbuka owa li okuninga sha ‘shoka tashi opalele Kalunga,’ tashi vulika shi na ko nasha nelongelokalunga lye. Aanyoli aarabbi oya ti kutya otashi vulika Abija a li a ningi olweendo okuya kotempeli muJerusalem nenge a li a kutha po aakeeleli mboka ya li ya tulwa potempeli kuhe opo ya keelele Aaisraeli kaaya ye kuJerusalem.

Nonando katu shi lela kondandalunde kutya uuwanawa wuni a li a longo, uuwanawa waAbija owa li uundhindhilikwedhi. Shotango, owa li washili. Uuwanawa mbuka owa li ‘muye,’ sha hala okutya, momutima gwe. Oshitiyali, owa li wa yooloka. Abija okwa li e na uuwanawa mbuka nonando okwa li ‘gwomezimo lyaJerobeam.’ Omulongwantu gumwe okwa ti: “Oshi shi okupandulwa noonkondo kaantu ya kale aawanawa omanga ye li momahala nomomaukwanegumbo omawinayi.” Gulwe okwa ti ishewe kutya uuwanawa waAbija owa li “wi iwetikile . . . , ngaashi owala oonyothi hadhi kala tadhi adhima unene mewangandjo uuna ku na omilema nosho wo omisendeli ohadhi kala omiwanawa kaaku na we ngele dha kundukidhwa komiti kaadhi na omafo.”

Oshinima sha simanenena, oohapu dhAakwaniilwa yotango 14:13 otadhi tu longo oshinima oshiwanawa kombinga yaJehova naashoka ha kongo mutse. Dhimbulukwa kutya oshinima oshiwanawa osha li sha ‘monika’ muAbija. Osha yela kutya Jehova okwa li a panapana momutima gwaAbija sigo a mono mo uuwanawa. Omulongwantu gumwe okwa ti kutya okuyelekanitha nuukwanegumbo waandjawo, Abija okwa li a fa okamanya kondilo “ke li mokati kondumba yomamanya.” Jehova okwa li a nyanyukilwa uuwanawa mbuka nokwa li a gandja ondjambi mokuulukila ohenda oshilyo shika shimwe shuukwanegumbo mbuka wa kolokosha.

Mbela itashi shilipaleke ngaa okutseya kutya Jehova oha tala kongushu nokuuwanawa mboka wu li mutse nonando inatu gwanenena? (Episalomi 130:3) Okutseya oshinima shika oshi na oku tu inyengitha tu hedhe popepi naJehova Kalunga ngoka ha konakona nawa omitima dhetu opo a mone nokuli nuuwanawa uushona mboka wu li mutse.

[Omanyolo lyopevi]