Oshinima 4

Hogolola ookuume koye noondunge

OMBIIMBELI OTAYI LONGO SHIKE? “Enda pamwe naanawino, u likole owino”—Omayeletumbulo 13:20.

ESHONGO LINI LI LI PO? Ookuume ketu otaya vulu oku tu ningitha tu kale tu uvite twa gwanenwa nenge inaatu gwanenwa. Iikala yawo noonkundathana dhawo natse, otayi ka nwetha mo etaloko lyetu nkene twa tala ko onkalamwenyo.—1 Aakorinto 15:33.

Pashiholelwa, tala ehokololo lyOmbiimbeli tali popi aalumentu 12 mboka ya li ya galuka koku ka ndaadha evi lyaKaanana. Oyendji yomuyo oya li ya “taandelitha omutoto mokati kAaisraeli omolwevi ndyoka ya ka ndaadhele.” Nokuli nonando ongaaka, yaali yomuyo oya li ya popile muuwanawa evi lyaKaanana, ye li ithana “evi ewanawa.” Ihe iikala iiwinayi yoondadhi dhilwe omulongo oyi ihanene maantu. Ehokololo otali ti: ‘Egongalo alihe olya tameke okunyenyeta.’—Numeri 13:30–14:9.

Sha faathana, nokunena aantu oyendji otaya “ngungutulile iipewa yawo ye yi na.” (Judas 16, KB) Oshidhigu okukala wa gwanenwa uuna wu na ookuume mboka ihaaya gwanenwa nando.

OSHIKE TO VULU OKUNINGA? Konakona shoka hamu popi nookuume koye. Mbela ookuume koye olundji ohayi itadhele iinima mbyoka ye na nenge ohaya kala aluhe taya nyenyeta molwiinima mbyoka kaaye na? Owu li kuume a tya ngiini kuyo? Mbela oho ya ningitha ya kale ye ku sila ondumbo nenge oho ya ladhipike ya kale ya gwana naashoka ye na?

Tala oshiholelwa shoka sha tulwa po kuDavid ngoka a li e li pokuninga omukwaniilwa nosho wo kuJonatan, omwanamati gwomukwaniilwa Saul. David okwa li a kala ontauki mombuga. Omukwaniilwa Saul okwa li e wete te etelwa oshiponga kuDavid nomolwaashono a li a hala oku mu dhipaga. Nonando Jonatan otashi vulika a li ta ka ninga omukwaniilwa ta landula ko, okwa li a ningi gumwe gwomookuume kaDavid kopothingo. Jonatan okwa li a zimine kutya Kalunga okwa hogolola David oye a kale omukwaniilwa ta landula ko nokwa li a ambidhidha kuume ke nehalo ewanawa.—1 Samuel 19:1, 2; 20:30-33; 23:14-18.

Owa pumbwa ookuume ya tya ngaaka, mboka haya lalakanene okukala ya gwanenwa noye ku halela shoka oshiwanawa. (Omayeletumbulo 17:17) Dhoshili, opo aantu yi inyengithwe ya kale ya hala okuninga ookuume koye, nangoye owa pumbwa okukala wu na iikala ya fa yawo.—Aafilippi 2:3, 4.

[Ethano pepandja 7]

Mbela ookuume koye otaye ke ku gwedhela ko kokukala wa gwanenwa nenge otaye ke ku ningitha wu kale wu uvite kutya shoka wu na inashi gwana?