Onkundana ombwanawa oshike?
“Elaka ndika etoye . . . ”—MATEUS 24:14.
AAKRISTE ohayu uvitha “elaka ndika etoye” nenge onkundana ombwanawa yUukwaniilwa mokulombwela yalwe kombinga yawo, mokuyelitha kutya Uukwaniilwa owo epangelo lyomonakuyiwa ndyoka tali ka pangela uuyuni pauyuuki. Ihe nonando ongaaka, uutumbulilo “elaka ndika etoye” owa longithwa wo momikalo dhilwe mOmbiimbeli. Pashiholelwa, owa popiwa wu li “onkundana ombwanawa yehupitho” (Episalomi 96:2, NW); ‘elaka etoye lya zi kuKalunga’ (Aaroma 15:16) nosho wo “elaka etoye tali popi Jesus Kristus.”—Markus 1:1.
Oku shi popya paunathangwa, onkundana ombwanawa oya kwatela mo ooshili adhihe ndhoka Jesus a popya naandhoka aalongwa ye ya nyola. Manga inaa londa a ye megulu, okwa li a lombwele aalongwa ye kutya: “Indeni ano, ka ningeni aantu ayehe aalongwa yandje, mu ya [ninginithe, NW] medhina lyaHe nolyOmwana nolyOmbepo Ondjapuki, ne mu ya longe okudhiginina ayihe mbyoka nde yi mú lombwele.” (Mateus 28:19, 20) Onkee ano, iilonga yAakriste yashili kayi shi owala okulombwela yalwe kombinga yUukwaniilwa, ihe ohaya kambadhala wo okuninga aantu aalongwa.
Oongeleka otadhi shi enditha ngiini moshinima shika? Aantu oyendji kayu uvite ko kutya Uukwaniilwa oshike nomolwaashoka ihaaya vulu okulonga yalwe shoka shi li naanaa mondjila kombinga yawo. Kakele kaashono, ohayu uvitha omauvitho ngoka ga nuninwa okuuvitha nawa aantu, molwaashoka ohaya popi unene kombinga yedhiminopo lyoondjo neitaalo muJesus. Ohayi itedhululitha wo aantu mokukambadhala okuhwepopaleka okukalamwenyo kwawo nenge okutunga iipangelo, oosikola nomagumbo goohepele. Nonando oonkambadhala dha tya ngaaka ohashi vulika dhi ningithe oongeleka dhawo dhi kale niilyo oyindji, ihadhi yi longo yi kale Aakriste yashili mboka haya kambadhala okukala metsokumwe naashoka Jesus a longa.
Omuteolohi gumwe okwa nyola a ti: “Aalongwantu oyendji nenge aakwatelikomeho yUukriste oye shi zimina kutya otwa li tu na okuninga aantu aalongwa nenge aalanduli yaJesus noku ya longa ya ninge ashihe shoka e ya lombwela. . . . Kakele kaashono, omalombwelo ngoka Jesus a gandja moshinima shika oga yela nawa. Ihe tse ihatu ningi shoka a popya noihatu kambadhala twa mana mo. Osha yela kutya katu shi nkene tu na oku shi ninga.”
Sha faathana, omakonakono ngoka ga li ga ningwa kAakatoolika mIilongo yaHangana oge shi ulike kutya oopelesenda 95 odhe shi zimina kutya okuuvitha onkundana ombwanawa oku li oshitegelelwa sheitaalo lyawo. Ihe konyala ayehe oya li yu uvite kutya omukalo omwaanawa oku shi ninga, ogwo okwaaha popya kombinga yasho, ihe okukaleka owala onkalamwenyo yawo momukalo ngoka tagu ku ulika kutya oye li oshiholelwa kuyalwe. Omukiintu gumwe gwomwaamboka ya li ya pulwa okwa ti: “Okupopya kombinga yOnkundana Ombwanawa hako ku li omukalo dhingi gwokuuvitha. Pehala lyaashono, okutula po oshiholelwa oshiwanawa oko unene kwa simana.” Oshifo U.S. Catholic, shoka sha li sha ningi omakonakono ngaka osha popi kutya oyendji ihaya popi kombinga yeitaalo lyawo, molwaashoka ongeleka oyi na ethano ewinayi, mokutala koshiningwanima shimwe shelongithonayi lyomilalo dhisitha ohoni shoka opo sha ningwa nosho wo uupyakadhi womalongo gadho.”
Omumbisofi gumwe Omumetodiste okwa popi a nika oluhodhi kutya oongeleka dhe odha topoka nodha ngwangwana, kadhi na omukumo okulonga iilonga yadho niilyo yadho ohayi ihumbata ngaashi iilyo yoongeleka dhilwe. Okwa pula neyeme a ti: “Oolye ano ye na oshinakugwanithwa shokuuvitha evaangeli lyUukwaniilwa?”
Omumbisofi ngoka ina gandja eyamukulo kepulo lye. Ihe eyamukulo opo li li. Otali ka gandjwa moshitopolwa tashi landula.
[Oshimpungu pepandja 6]
Onkundana ombwanawa otayi popi kombinga yUukwaniilwa waKalunga nehupitho ndyoka tali zi mokwiitaala Jesus Kristus