“Omutonateli omwaanawa nakuume omuholike”

JOHN (JACK) BARR, ngoka a li oshilyo shOlutuwiliki lwOonzapo dhaJehova, okwa li a mana oondjenda dhe kombanda yevi ongula yOlyomakaya mu 4 Desemba 2010. Okwa li e na oomvula 97. Okwa kala ha popiwa e li “omutonateli omwaanawa nakuume omuholike.”

Omumwatate Jack Barr okwa valelwa muAberdeen, shaScotland, oya li ya valwa yatatu noye a li onkelo. Aavali ye oya li aagwayekwa. Omumwatate Barr okwa li aluhe ha popi nenyanyu kombinga yonkalamwenyo yomuukwanegumbo wawo manga a li omushona, okwa li a pandula oshiholelwa sha dhenga mbanda shoka aavali ye aaholike ya li ye mu tulile po.

Sho a thiki mepipi lyoomvula omulongo nasha, omugundjuka Jack okwa li e shi mono oshidhigu okupopya naantu mboka kee shi. Ihe nonando ongaaka, okwa li a longo nuudhiginini opo a sinde uupyakadhi mboka, nomOsoondaha yimwe ethimbo lyomutenya mo 1927 sho e na oomvula 14, okwa li a lombwele he kutya ota vulu okuya naye miilonga yokuuvitha yegumbo negumbo. Ndyoka olyo lya li etameko lye lyokulongela Jehova. Okuza mesiku ndyoka sigo eso lye, omumwatate Barr okwa kala omuuvithi omudhiginini gwonkundana ombwanawa.

Jack ngoka a li omushona okwa li a ningithwa a dhiladhile muule kombinga yelalakano lyonkalamwenyo, konima yoshiponga oshinene shoka shaale shi faalele omwenyo gwayina, nomo 1929 okwa li i iyapulile Jehova, nokwa li e shi ulike montaneho mo 1934. Mo 1939 okwa li a ningi oshilyo shuukwanegumbo waBetel, moLondon shaEngland. Kungawo, okwa li a tameke iilonga ye yethimbo lyu udha moka a li a kala uule woomvula 71.

Mo 29 Kotoba 1960, Omumwatate Barr okwa li a panga uukuume mboka a li a ti kutya owu li “ekwatathano lyi ikalekelwa li na ondilo,” sho a hokana naMildred Willet, omukokolindjila nomutumwa omulaadhi gwethimbo ele. Omumwatate nOmumwameme Barr oya li ya tseyika ye li oshiholelwa oshiwanawa, aaihokani aadhiginini, noya kala ngaaka sigo Mildred a mana oondjenda dhe kombanda yevi muKotoba 2004. Oya li haya lesha Ombiimbeli pamwe esiku kehe mondjokana yawo.

Mboka ya li ye mu shi, edhina Jack Barr ohali ya dhimbulukitha omulumentu ngoka a li ha gandja omayele ga dhiladhilwa nawa, sha hala okutya, he ga gandja pandjele, te shi ningi nolukeno nokwi ikolelela kOmanyolo. Okwa li ha longo nuudhiginini, e na ko nasha nayalwe, omutonateli omwaanawa, nakuume omwiinekelwa. Omatyokosha, iipopiwa ye nomagalikano ge oga li gu ulike kutya okwa li e na uupambepo uuwanawa nosho wo ekwatathano lyopothingo naJehova.

Nonando otatu ka kala nokuyuulukwa omumwatate omuholike Barr, otatu nyanyukwa pamwe naye sho ta mono omagano gokwaahasa, sha hala okutya, uuthembahenda mboka a kala nale a hala nokwa li ha popi kombinga yawo olundji. Shoka osho a li a halelela.—1 Kor. 15:53, 54.a

[Enyolo lyopevi]