Omapulo ga za kaaleshi

Omiyalu ndhoka hadhi kala molopota yiilonga yokomumvo otu na oku dhi uva ko ngiini?

Omumvo kehe, ohatu kala twa tegelela olopota yiilonga ndjoka hayi kala mo-Yearbook nosho wo mUukalele Wetu wUukwaniilwa. Ohashi kala shinyanyudha okumona shoka oshigwana shaJehova shi li ongundu sha longa muuyuni auhe miilonga yokuuvitha Uukwaniilwa noyokulonga aantu. Ihe opo tu mone mo uuwanawa molopota, otwa pumbwa euvoko lyomondjila lyaashoka shi li mo nosho wo etaloko li li pandjele lyomiyalu. Tala kiiholelwa yimwe po.

Omumvo gwiilonga. Ohagu tameke muSeptemba sigo Auguste gwomumvo gwa landula. Mo-Yearbook nosho wo mUukalele Wetu wUukwaniilwa ohamu kala olopota yiilonga yomumvo gwaya. Onkee ano, membo lyo 2011 Yearbook nosho wo mUukalele Wetu wUukwaniilwa waFebuluali 2011, omu na olopota yiilonga yomumvo 2010, ndjoka ya tameka me 1 Septemba 2009 sigo 31 Auguste 2010.

Oshitsa shopombanda shaauvithi nuupokati waauvithi. Omwaalu “gwaauvithi” yUukwaniilwa ohagu kala gwa kwatela mo Oonzapo dhaJehova ndhoka dha ninginithwa nosho wo aauvithi inaaya ninginithwa. “Oshitsa shopombanda shaauvithi,” oshi li omwaalu gwopombanda ngoka gwa lopotwa omwedhi kehe gwomumvo gwiilonga nohashi vulika shi kale sha kwatela mo oolopota dha lata ndhoka dha li inaadhi gandjwa pethimbo omwedhi gwa za ko. Omolwoshinima shoka ohashi vulika iilonga yaauvithi yamwe yi yalulwe lwaali. Ihe omwaalu gwoshitsa shopombanda ihagu kala gwa kwatela mo omwaalu gwaauvithi mboka ya kutha ombinga muukalele noya dhimbwa okugandja oolopota dhawo. Shika otashi kwathele omuuvithi kehe a mone kutya osha simana okugandja olopota ye nziya omwedhi kehe. “Uupokati waauvithi,” ohawu kala omiyalu dha yoolokathana dhoowili ndhoka aauvithi haya longo muukalele omwedhi kehe.

Oowili adhihe kumwe. Oonzapo dhaJehova odha longa muukalele oowili dhi vulithe pebiliyona 1,6 palopota ndjoka ya gandjwa mo 2011. Ihe omwaalu nguka inagu kwatela mo oowili adhihe ndhoka dha longithwa miilonga yetu ayihe yelongelokalunga, ngaashi omatalelopo guusita, okugongala, ekonakonakono lyopaumwene nokutedhatedha.

Iimaliwa mbyoka ya longithwa. Momumvo gwiilonga 2010, Oonzapo dhaJehova odha longitha oodola dhaNamibia dhi vulithe pebiliyona limwe, okusila oshimpwiyu aakokolindjila yi ikalekelwa, aatumwa naatonateli aaendi miilonga yawo. Omwaalu nguka inagu kwatela mo iimaliwa mbyoka ya longithwa okunyanyangidha iileshomwa ya kankamena kOmbiimbeli nosho wo mbyoka ya longithwa mokusila oshimpwiyu aaiyambi yaBetel ye vulithe 20 000 muuyuni auhe.

Aakuthimbinga pEdhimbuluko. Nguka omwaalu gwaamboka ya ninginithwa noya kutha ombinga mokulya nokunwa pEdhimbuluko muuyuni auhe. Mbela omwaalu nguka ogwa kwatela mo aagwayekwa ayehe mboka ye li kombanda yevi? Hasho naanaa. Opu na iinima mbyoka tayi vulu okuningitha aantu ya dhiladhile papuko kutya oye na eithano lyomegulu, ngaashi omalongelokalunga moka ya li nale, omadhiladhilo nenge omaiyuvo gawo ngoka kaage li pehala. Itatu vulu naanaa okutseya omwaalu gwaagwayekwa kondandalunde mboka ye li kombanda yevi noina tu pumbwa oku gu tseya. Olutuwiliki ihalu pungula omwaalu gwaayehe mboka ya kutha ombinga, molwaashoka ihalu ningi omakwatathano naagwayekwa ayehe mboka ye li muuyuni.a

Oshinima shimwe shoka tu shi osho kutya kombanda yevi otaku ka adhika aagwayekwa yamwe, “aapiya yaKalunga,” sho oombepo oohanaguli dhuudhigu uunene tadhi ka ethwa. (Eh. 7:1-3, KB) Sigo opethimbo ndyoka, otaya ka kala taya kwatele komeho iilonga yokuuvitha noyokuninga aantu aalongwa inaayi monika nando onale mondjokonona yaantu mbyoka hayi kala ya nyolwa molopota yomumvo gwiilonga.

[Enyolo lyopevi]