Mbela osha simana ngaa okutseya eyamukulo?

“Onda li nda tameke okukala ndi na aamati sho ndi na oomvula omulongo. Petameko, otwa li owala hatu ikwata moonyala nokuhupitathana. Mokweendela ko kwethimbo, otwa li twa tameke okwiikwatakwata kiilyo yoluvalo, niikando niikando otwa kala hatu ningi iinima mbyoka tayi hilile momilalo. Sho nda li ndi na oomvula 15 onda li nda tameke iilonga, naalumentu oyendji yomiilonga yetu oya li haya pula ndje ndi ye nayo momilalo. Onda li kaandi na ko nasha nonda tameke okuninga shoka aaniilonga pamwe nangame haya ningi. Onda li nda hala ndi kale nda taambiwa ko kwaamboka handi endathana nayo, shoka nokuli sha li sha ningitha ndje ndi nayipale mokukutha ombinga miinima mbyoka tayi kokele momilalo.”—SARAH,a AUSTRALIA.

MBELA oto ka kala wa kumwa ngele owu uvu kutya Sarah okwa putudhwa kaavali aatilikalunga? Aavali ye oya li ya ningi ngaashi taya vulu opo ye mu tekule a kale e na omikalo dhi li metsokumwe nomakotampango gOmbiimbeli. Ihe Sarah okwa li a tsu mo dhe.

Oyendji otashi vulika ya kale ye wete kutya shoka Sarah a li a ningi oshi li mondjila. Oyi itaala kutya shoka Ombiimbeli tayi popi shi na ko nasha nomilalo oshi li oshinima shonkulu yonale. Yalwe oye wete kutya otaya vulu okukala ye li melongelokalunga ya pwila mo, ihe natango otaya vulu okukala haya yi momilalo ngaashi ya hala.

Mbela osha simana ngaa okutseya kutya Ombiimbeli otayi ti ngiini shi na ko nasha nomilalo nokukala metsokumwe naashoka tayi tu longo? Ombiimbeli otayi ipopi yo yene kutya ‘oya nyolithwa kombepo yaKalunga noyi na oshilonga shokulonga oshili.’ (2 Timoteus 3:16) Kutya nduno owi itaala kutya Kalunga oye a shita aantu nenge hasho nosho wo kutya Ombiimbeli oyi li Oohapu dha nwethwa mo nenge hasho, osha simana wu tseye shoka tayi popi.

Shoka tashi etitha ohenda ooshoka kutya aantu oyendji kaye shi shi lela kutya Ombiimbeli otayi ti shike kombinga yomilalo. Aasita yomalongelokalunga mboka haya ti kutya oya simaneka Ombiimbeli, ohaya longo aantu iinima tayi kondjithathana shi na ko nasha nomilalo. Nokuli oshinima sha tya ngaaka oshe eta etopoko moongeleka odhindji moka mu na aantu oyendji.

Pehala lyokwiitaala owala shoka yalwe taya ti kombinga yomilalo, omolwashike itoo longitha ominute dhontumba wu konakone ngoye mwene ngele shoka oshoshili? Oshitopolwa tashi landula otashi yamukula omapulo omulongo ngoka haga pulwa olundji kombinga yaashoka Ombiimbeli tayi ti shi na ko nasha nomilalo. Moshitopolwa moka oto ka mona mo omayamukulo gomondjila gi ikolelela kwaashoka Ombiimbeli tayi ti shili. Oshitopolwa shahugunina shomiitopolwa mbika ya pambathana otashi ke tu ulukila nkene sha simanenena okuninga ehogololo lyomondjila.

[Enyolo lyopevi]