Omapulo ga za kaaleshi
Mbela otatu vulu ngaa tu tseye kutya Jesus okwa li a alelwa pongapi?
Epulo ndika ohali holoka omolwomahokololo ngoka ga fa taga kondjithathana ngoka ga nyolwa kuMarkus nokomuyapostoli Johannes kombinga yeso lyaJesus. Markus okwa ti: “Otundi ndjoka [aakwiita] ye mu alele [komuti gwomahepeko, NW] oya li ontitatu.” (Mark. 15:25, KB) Omanga Johannes a nyola kutya ‘potundi ontihamano’ Pilatus okwa gandja Jesus kAajuda a ka alelwe. (Joh. 19:14-16, KB) Aakonakoni yiiningwanima yOmbiimbeli oya gandja omafatululo ga yoolokathana sho taya kambadhala okukandula ekondjithathana ndjoka ye wete li li po. Ihe mOmbiimbeli kamu na uuyelele wa gwana wu yelithe eyooloko ndyoka li li pokati komahokololo ngoka gaali. Nonando ongaaka, ngele otwa tala kunkene aantu ya li ya tala ko ethimbo monakuziwa otashi vulu oku tu kwathela.
Pethimbo lyaJesus kapwa li pu na oowili, onkee ano, aantu oya li haya tala ketango opo ya tseye kutya otundi ongapi. Kakele kaashono, etango ohali piti nohali ningine pomathimbo ga yoolokathana momumvo. Onkee ano, aantu oya li owala haya tengeneke ethimbo. Omanyolo gopaKriste gOshigreka oga popya kombinga yiiningwanima tayi ningwa potundi ontitatu, ontihamano, nenge ontimugoyi, sha hala okutya lwopethimbo ndyoka. (Mat. 20:3, 5; Iil. 10:3, 9, 30, yelekanitha NW.) Uuyelele owundji wokondandalunde, ngaashi ‘otundi ontine’ nenge “yotango” owa li owala wa gandjwa uuna sha li sha pumbiwa ku ulikwe kutya oshiningwanima shoka osha ningwa pethimbo lini.—Joh. 1:39; 4:52.
Omavaangeli otaga tsu kumwe kutya opotundi yini iiningwanima ya li ya ningwa mesiku lyeso lyaJesus. Omavaangeli agehe gane otagu ulike kutya ongula sho kwa shi aayambi naakuluntu yoshigwana oya li ya gongala noya gandja Jesus kuPontius Pilatus, omuleli Omuroma. (Mat. 27:1; Mark. 15:1; Luk. 22:66; Joh. 18:28) Mateus, Markus naLukas ayehe oya nyola kutya okuza potundi ontihamano sho Jesus e li komuti gwomahepeko, moshilongo omwa li mwa ningi omilema ‘sigo opotundi ontimugoyi.’—Mat. 27:45, 46, KB; Mark. 15:33, 34, KB; Luk. 23:44, KB.
Oshinima shimwe shoka tashi vulika sha li sha ningitha aanyoli yomavaangeli ya nyole omathimbo ga yoolokathana kutya Jesus okwa alelwa ethimbo peni ooshoka kutya, okudhengwa okwa li kwa talika ko ku li oshitopolwa shokwaalelwa. Omathimbo gamwe okudhengwa hoka okwa li kunyanyalitha tashi vulika nakudhengwa a se. Osha yela kutya Jesus naye okwa li a dhengwa shinyanyalitha, nomolwaashono omulumentu gumwe a li e na okuhumbata ko komuti gwe gwomahepeko. (Luk. 23:26; Joh. 19:17) Ngele okudhengwa okwa li kwa talika ko ku li oshitopolwa shokwaalelwa, opwa li pu na okupita ethimbo manga Jesus inaa mbambangelwa komuti gwomahepeko. Oohandimwe oya li taya vulu okugandja omathimbo ga yoolokathana kutya Jesus okwa alelwa pongapi, shi ikwatelela kethimbo ndyoka kehe gumwe a li a ndhindhilike oshiningwanima shoka.
Omuyapostoli Johannes okwa li a nyola ehokololo lye konima yoomvula omilongo sho aanyoli yOmavaangeli yalwe ya nyola nale gawo. Onkee ano, otashi vulika a li a lesha omahokololo gawo. Odhoshili kutya, Johannes okwa nyola ethimbo inaali faathana naandyoka lya nyolwa kuMarkus. Shika otashi gandja uuyelele wa yela kutya Johannes ka li a tapa mehokololo lyaMarkus. Johannes naMarkus ayehe oya li ya nwethwa mo kuKalunga. Nonando kapu na uuyelele wopamanyolo wa gwana wu yelithe eyooloko ndyoka, otatu vulu okwiinekela omahokololo gOmavaangeli.