Owe shi tseya ngaa?
Aantu yonale oya li haya kutha peni ‘oongodhi oontiliganembwilili’ ndhoka dha popiwa muEksodus?
▪ Ombiimbeli otayi hokolola kutya omalapi ngoka ga li ga tungithwa etsalihangano niiyelo yalyo, moka Aaisraeli yonale ya li haya galikanene, oga li ga tungilwa “oongodhi oombulau, oombwilili, noontiliganembwilili.” (Eksodus 26:1; 38:18) ‘Oonguwo oondjapuki’ dhaasaaseri nadho odha li dha tungilwa ‘oongodhi oontiliganembwilili.’—Eksodus 28:1-6.
Olwaala olutiliganembwilili olwa li halu zi mondomo ndjoka ya li hayi ningitha iinima yi kale iitiligane tyetyetyetye nenge tu tye iitiliganembwilili. Ondomo ndjoka oya li hayi kuthwa muupuka uukiintu womoludhi lwo-Coccidae. Uupuka mbuka kaawu na omawawa ohawu kala komuti gwedhina kermes oak (Quercus coccifera), ngoka hagu mene paunshitwe kUuzilo woPokati nokOmunkulofuta gwEfuta lyoPokati. Olwaala ndoka olutiliganembwilili ohalu kala momayi ngoka haga kala mokapuka okakiintu. Uuna okapuka hoka ke na omayi, ohaka kala konyala ka fa ompundu, nohaka kala ke li komafo nokuutayigona womuti ngoka. Ngele wa likolwa ko e ta wu nyanyulwa, uupuka mboka ohawu zi olwaala olutiliganembwilili ndoka halu kwatathana nawa nomeya nohalu gandja nawa olwaala ndoka kiiyata. Omunandjokonona omuroma Pliny gwomukuluntu okwa popi kutya olwaala olutiliganembwilili olwa li lumwe lwomomalwaala ngoka ga li ge holike noonkondo pethimbo lye.
Aanyoli yeni yOmanyolo gopaKriste gOshigreka ya li po pOpentekoste momumvo 33 E.N.?
▪ Otashi vulika pwa li aalumentu yahamano yomaalumentu yahetatu mboka ya nyola oshitopolwa shika shOmanyolo.
Pahokololo lyembo lyIilonga yAayapostoli, Jesus okwa li a lombwele aalongwa ye a ti: “Inamu za mo muJerusalem, ihe tegeleleni, mu pewe omagano ngoka Tate e ga uvaneka.” (Iilonga 1:4) Ehokololo olyo tuu ndyoka otali holola kutya aanyoli yOmbiimbeli ngaashi Mateus, Johannes naPetrus oya li ya vulika kelombwelo ndika e taya kala “peha limwe” naalongwa ooyakwawo. Aamwayinamati yaJesus nayo opo ya li. (Iilonga 1:12-14; 2:1-4) Yaali yomuyo, Jakob naJudas, oya ka nyola omambo gaali gOmbiimbeli ngoka ge ya lukilwa.—Mateus 13:55; Jakob 1:1; Judas 1.
MEvaangeli lye, Markus okwa popi kombinga yomugundjuka gumwe ngoka a li a yi ontuku ongulohi ndjoka Jesus a kwatwa po. Osha yela kutya okwa li ti ipopi ye mwene, molwaashoka aalongwa ooyakwawo oya adhika nale ye mu thiga po e taya yi ontuku. (Markus 14:50-52, yelekanitha NW.) Nomolwaasho osha fa shi li ngeyi kutya Markus okwa li omulongwa gwaJesus okuza petameko notashi vulika opo a li pOpentekoste.
Aanyoli yalwe yaali yOmanyolo gopaKriste gOshigreka ga nwethwa mo oyo Paulus naLukas. POpentekoste yomomumvo 33 E.N., Paulus ka li natango omulanduli gwaKristus. (Aagalati 1:17, 18) Lukas okwa fa kaa li po naye shaashi oku ulike kutya ka li gumwe gwomwaamboka “ya li ya mono nomeho gawo” iilonga yaJesus yokuuvitha.—Lukas 1:1-3.
[Ethano pepandja 20]
Uupuka mboka hawu ningithwa ondomo
[Edhina lyomuthaneki]
Courtesy of SDC Colour Experience (www.sdc.org.uk)
[Ethano pepandja 20]
Petrus ta popi poPentekoste yomomumvo 33 e.n.