“Tu kwathela wu tu thaneke”

Mesiku etiyali lyoshigongi shoshitopolwa shoka sha li moQuerétaro, Josué ngoka ha longo moBetel yaMexico, okwa li ta pashiyona moshilando shoka. Aapashiyoni aaihokani Javier naMaru ya za koColombia mboka nayo ya li taya talele po oshilando shoka, oya li ya pula Josué e ya thaneke. Molwaashoka ye nookuume ke, nayo Oonzapo, oya li ya zala nawa noya li ye na uukalata wawo woshigongi, aaihokani mbaka oya li ye ya pula ngele otaya zi kezaleko lyomaguwo nenge koshituthi shontumba shi ikalekelwa. Josué okwe ya lombwele kutya otaya zi koshigongi shoshitopolwa shOonzapo dhaJehova nokwa li e ya hiya ye ye ko mOsoondaha.

Aaihokani mbaka oya li yu uvite kutya otaya ka kala ya sa ohoni ngele oya yi ko molwaashoka kaya li ye na oonguwo tadhi opalele. Nonando oongawo, Josué okwe ya pe edhina lye nonomola yongodhi yokoshitayimbelewa hoka ha longo.

Josué okwa li a kumwa shi li sho Javier e mu dhengele konima yoomwedhi ne. Aaihokani mbaka oya li ya kala poshigongi noya li ya hala Oonzapo dhaJehova dhi ye dhi ya talele po moMexico City, moka ya li haya kala pethimbo ndyoka. Nziya Javier naMaru oya tameke okukonakona Ombiimbeli nokuya kokugongala. Konima yoomwedhi omulongo, oya ningi aauvithi. Nonando oya tembukile koToronto, moKanada, oya tsikile okuninga ehumokomeho lyopambepo e taya ninginithwa nokuli.

Konima, Josué okwa mono ontumwafo ya zi kuJavier moka a popi kutya oshike sha li she ya inyengitha ya taambe ko oshili. “Manga inaatu ya koshigongi shoka shoshikandjo, ngame nomukulukadhi gwandje otwa adhikile opo twa popi kutya otwa pumbwa ewiliko lyopambepo. Sho twe mu mono mwa zala nawa nookuume koye, otwa li tatu dhiladhila kutya otashi vulika ta mu zi komutumba gwi ikalekelwa. Poshigongi, otwa li twa kuminwa omukalo gwopahole ngoka tu ungaungiwa nagwo naasho tu ulukilwa mpoka tatu kuutumba, nkene tatu vulu okulandula mOmbiimbeli, notwa li wo twa kumithwa keihumbato lyaamboka ya li po. Oya li owala ya fa kaaye wete kutya otwa zala iikutu yaapashiyoni.”

Josué ka li tuu a mono uushili woohapu dhomukwaniilwa Salomo ndhoka tadhi ti: “Kuna oombuto dhoye ongula, ngoye ino vululukitha wo iikaha yoye komatango, oshoka ino tseya, oyi ni po tayi ka mena, oondjika nenge ndjiyaka, nenge adhihe mbali tadhi ka mena.” (Omuuv. 11:6) Mbela ito vulu okukuna oombuto mokulongitha oompito wu hiye aantu koshigongi tashi landula ko nenge koshipopiwa shomontaneho? Jehova otashi vulika e ku longithe wu nanene aantu mboka ya sa ondjala noya sa enota lyopambepo kehangano lye ngaashi Javier naMaru ya li ya nanwa.—Jes. 55:1.

[Ethano pepandja 32]

Okuza kolumuho: Alejandro Voeguelin, Maru Pineda, Alejandro Pineda, Javier Pineda, naJosué Ramírez poshitayimbelewa shaMexico