“Onda li nda hala okuninga omupristeli”

ONAKUZIWA YANDJE:

Onda valelwa mokamukunda kedhina Texcoco. Ethimbo ndyoka oondjila kadha li dhi na oteya. Otwa li hatu mono aluhe aantu taya zi komikunda dhopopepi ye ya okulanditha iinima yawo ya humbatwa kuusino. Otwa li aanona omugoyi twa za megumbo lya hepa nayi, ngame onda li omutiheyali. Tate okwa li ha pangele oosandala opo e tu sile oshimpwiyu. Ihe okwa mana oondjenda manga ndi na oomvula heyali. Okuza mpoka, meme oye a kala ta kambadhala oku tu sila oshimpwiyu.

Kuku gwomusaane okwa li ha hiki okafioli nokwa li omuwiliki gwongundu yaahiki yiihikomwa ndjoka hayi hiki omusika yongeleka. Konyala kehe gumwe maandjetu okwa li ha hiki oshihikomwa. Meme okwa li mongundulwiimbo omanga tatekulu omumwayina gwameme a li omwiimbi noha dhana okahumba. Otwa li tu hole iinima yongeleka. Ngame onda li handi yakula koaltari sho nda li okamatyona nonda li nda hala okuninga omutumwa gwaKatoolika. Ihe onda li wo ndi hole okutala oomuvi dhokarate, ndhoka dha li dha ningitha ndje omuhahu.

Sho nda yi kuPuebla, onda tameke osikola yongeleka, ndjoka ya li ya fa oseminari. Elalakano lyandje olya li okuninga omupristeli gwaKatoolika. Ihe momvula yandje yahugunina, onda li ndu uvithwa nayi kiinima mbyoka hayi ningwa mongeleka. Osesta yimwe oya li ya hala okuya momilalo nangame. Onda li nda sindi emakelo ndyoka, ihe oshinima shika osha li sha pendutha mungame ehalo lyokuhokana. Oshikwawo, onda li nda koneke kutya aapristeli oyendji aafudhime. Shika osha ningitha ndje ndi ethe po elalakano lyandje lyokuninga omupristeli.

Onda tokola ndi ki ilonge omusika koNational Conservatory of Music koMexico City. Sho nda mana, onda hokana, notwa li twa mono aanona yane. Onda li handi imbi pEmisa mongeleka yaKatoolika, opo ndi vule okusila aanegumbo lyandje oshimpwiyu.

Okuza petameko, ondjokana yetu kaya li tayi ende nawa. Otwa li hatu ningathana nayi, unene tuu molwuukodhi. Petameko otwa li owala hatu iyula nayi ihe konima otwa ka tameka hatu dhengathana. Hugunina, konima yoomvula 13, otwa topoka nokonima otwa hengana.

NKENE OMBIIMBELI YA LUNDULULA ONKALAMWENYO YANDJE:

Onda li nda tsakanene nOonzapo dhaJehova oshikando shotango manga inaatu topoka nomukulukadhi gwandje. Paandjetu opwa li pwe ya Oonzapo mbali nodha pula dhi kundathane natse Ombiimbeli. Onda li ndi shi ondi shi oshindji kombinga yelongelokalunga, onkee ano, onda li nda hala oku dhi ulukila kutya odha puka. Onde dhi pula omapulo omadhigu ngoka nda li ndi shi itadhi vulu oku ga yamukula. Ihe onda li nda kumwa sho dha li dha pe ndje omayamukulo omawanawa ga kankamena kOmbiimbeli. Onda mono kutya kanda li ndi shi oshindji. Ihe molwaashoka omukulukadhi gwandje okwa li he dhi ihumbatele nayi, omanga ngame nda li handi kala ndi ipyakidhila noonkondo, odhe etha oku tu talela po.

Konima yoomvula ntano sho nda ka tsakanena ishewe nOonzapo dhaJehova oshikando oshitiyali onda adhika ndi na po omukulukadhi gulwe, Elvira. Elvira ka li e tonde Oonzapo, onkee osha li sha ningile ndje oshipu okukonakona Ombiimbeli pandjigilile. Ihe nonando ongaaka, osha li sha pula ndje oomvula dhontumba ndi lundulule onkalamwenyo yandje.

Onda mono kutya ngele onda hala okulongela Jehova nomutima aguhe, ondi na okuninga omalunduluko ga kwata miiti. Tango onda li ndi na okweetha po okwiimba pEmisa mongeleka yaKatoolika. Shika osha li tashi ti kutya ondi na okukonga iilonga yilwe. (Ehololo 18:4) Otwa li wo tu na okuhokana paveta naElvira.

Shimwe shomiinima iidhigu mbyoka nda li ndi na okweetha po, ongeyo yandje ombwinayi. Oovelise mbali tadhi landula odha li dha kwathele ndje noonkondo: Episalomi 11:5 ndyoka tali popi kutya Jehova oku tonde uukakombwiilitha nenge uukolokoshi nosho wo 1 Petrus 3:7 ngoka a li a kwathele ndje ndi tseye kutya ngele onda hala omagalikano gandje gu uvike kuJehova, ondi na okukala nda simaneka omukulukadhi gwandje. Sho nda kala handi tedhatedha koohapu ndhoka nokugalikana Jehova a kwathele ndje, onda li nda vulu okupangela ongeyo yandje.

NKENE SHA KWATHELA NDJE:

Ngashingeyi otu na ombili megumbo. Ohandi ningi oonkambadhala ndi kaleke po ishewe ekwatathano lyetu naamwandjemati yomondjokana yandje yotango nokukwathela aanegumbo lyandje tu kale neitaalo lya kola.

Sho nda li okanona onda li nda hala okuninga omupristeli nokukala handi kwathele aantu. Ngashingeyi onkalamwenyo yandje otayi ti sha. Opo ndi kwathele yaandjetu painiwe ondi na iilonga yokulonga aantu omusika. Ohandi pandula Jehova sho i idhidhimikile ndje nokupa ndje ompito ndi lundulule onkalamwenyo yandje nondi ninge omuntu omwaanawa.