“Onda tameke okudhiladhila muule kutya onkalamwenyo yandje oyu uka peni”

ONAKUZIWA YANDJE:

Onda putukile mokandoolopa okashona ke li kuushayi kedhina Warialda, moNew South Wales. Aakalimo yomoWarialda ohaya munu oonzi noongombe nohaya kunu iilya nosho wo iikwamboga. Okandoolopa oka yela nokamu na omiyonena odhindji.

Molwaashoka ongame osheeli onda li ndi na okukonga iilonga sho ndi na oomvula 13, opo ndi kwathele yaandjetu. Ihe molwaashoka inandi mana osikola, onda li owala handi longo moofaalama. Sho nda gwanitha oomvula 15, onda tameke okulitha iimuna nokudheula oonkambe.

Okulonga moofaalama okwa li ku na uuwanawa nuuwinayi. Kombinga yimwe onda li handi nyanyukilwa iilonga yandje nosho wo omudhingoloko. Onda li handi tokelwa tandi huhulukwa pomulilo, tandi tala komwedhi nokegulu lyu udha oonyothi sho okapepo kokongulohi taka pepe ko taka eta ezimba ewanawa lyiimeno yomomudhingoloko. Ote dhimbulukwa tandi dhiladhila kutya opu na owala okukala Omuntu ngoka a shita iinima ayihe mbika iiwanawa. Ihe mofaalama omwa li wo omanwethomo omawinayi. Onda li handi uvu omatukano olundji nomakaya oga li ga ha. Nziya onda tameke okuhila omakaya nokutukana.

Sho nda gwanitha oomvula 18 onda tembukile koSydney. Onda li nda hala okuya muukwiita, ihe eindilo lyandje olya tindwa, molwaashoka inandi mana osikola. Onda mono po iilonga yilwe moSydney moka nda kala uule womvula. Pethimbo mpoka opo nda li nda tsakanene nOonzapo dhaJehova. Onda li nda zimine okuya kokugongala kwadho, nonda mono kutya omalongo gadho oge na oshili.

Ihe nziya onda li nda shuna kuushayi. Ondi iyadha ndi li moGoondiwindi, shaQueensland. Onda mono iilonga e te hokana, ihe mupyamunene onda tameke okunwa sha pitilila.

Otwa mono aanona yaali. Konima sho aamwandjemati ya valwa, onda tameke okudhiladhila muule kutya onkalamwenyo yandje oyu uka peni. Onda dhimbulukwa shoka nda li ndu uvu pokugongala kwOonzapo moSydney e tandi tokola ndi ninge po sha.

Onda li nda mono oshifo oshikulu shOshungolangelo shoka sha li shi na ondjukithi yoshitayimbelewa shOonzapo dhaJehova moAustralia. Onde ya nyolele ontumwafo tandi pula ekwatho. Oya tumine ndje Onzapo yi na ombili noyi hole aantu yi talele ndje po. Nziya okwa tameke okukonakona nangame Ombiimbeli.

NKENE OMBIIMBELI YA LUNDULULA ONKALAMWENYO YANDJE:

Sho nda konakona Ombiimbeli, onda mono kutya onda pumbwa okulundulula onkalamwenyo yandje thiluthilu. Ovelise yOmbiimbeli ndjoka ya li ya gumu ndje noonkondo oondjoka yi li 2 Aakorinto 7:1. Otayi tu ladhipike tu ‘iyoge shaa shoka tashi nyateke olutu.’

Onda tokola kutya otandi etha po omakaya nokunwa sha pitilila. Kasha li oshipu okuninga omalunduluko ngaka, molwaashoka onda kala handi ningi iinima mbika ethimbo ele. Ihe onda li nda tokola toko okunyanyudha Kalunga. Okwiiyutha kekotampango ndyoka li li mAaroma 12:2, okwa li kwa kwathele ndje noonkondo. Otali ti: “Inamu faathana nonkalo yuuyuni mbuka, aawe, Kalunga ne mú shitulule meni lyeni nomomadhiladhilo geni.” Onda dhimbulula kutya ondi na tango okulundulula okudhiladhila kwandje opo nawa ndi vule okulundulula iikala yandje noku yi tala ko kutya oya nika oshiponga ngaashi Kalunga he yi tala ko. Kekwatho lye onda li nde etha po omakaya nokunwa sha pitilila.

Ihe shoka sha li unene eshongo kungame okweetha po okutukana. Onda li ndi shi omayele ngoka ge li mAaefeso 4:29, ngoka taga ti: “Inamu popya oohapu oombwinayi.” Ihe nonando ongaaka, onda li nda nyengwa okweetha po omatukano. Osha li ekwatho enene okutedhatedha koohapu dhaJesaja 40:26. Ovelise ndjoka otayi popi ngeyi shi na ko nasha noonyothi dhokegulu: “Tala owala utale kegulu! Olye a shiti oonyothi ndhoka wa tala? Oye ngoka te dhi enditha dha fa etangakwiita. Adhihe okwe dhi tseya nawa, nokehe yimwe ote yi tumbula kedhina lyayo! Oonkondo dhe oonenenene, odha kolelela nokape na ndjoka e yi hunutha po.” Onda li handi tompathana kutya ngele Kalunga oku na oonkondo dhokushita ewangandjo enenenene ndyoka ndi hole okutala, nena ota vulu okupa ndje oonkondo ndhoka nda pumbwa ndi ninge omalunduluko opo ndi mu nyanyudhe. Onda li handi galikana nda mana mo nokuninga oonkambadhala, nomokweendela ko kwethimbo onda tameke okupangela elaka lyandje.

NKENE SHA KWATHELA NDJE:

Sho nda li handi litha iimuna moofaalama, kanda li handi mono ompito yokupopya naantu, molwaashoka kamwa li mu na aantu oyendji. Ihe edheulo ndyoka handi pewa pokugongala kwOonzapo dhaJehova olya kwathela ndje ndi kale ndi shi okupopya. Olya li wo lya kwathele ndje ndi vule okukala handi popi nayalwe kombinga yonkundana ombwanawa yUukwaniilwa waKalunga.—Mateus 6:9, 10; 24:14.

Uule woomvula dhontumba, onda kala ndi li omukuluntugongalo. Onde shi tala ko shi li uuthembahenda okulonga kehe shoka tandi vulu ndi kwathele ooitaali ooyakwetu. Ihe eyambeko enene nda mona olyo kutya otatu longele Jehova twa hangana pamwe nomukulukadhi gwandje naamwandje aaholike.

Otandi pandula Jehova sho a pitika ndje ndi longwe kuye, nonando inandi mana osikola. (Jesaja 54:13) Otandi tsu kumwe thiluthilu noohapu dhOmayeletumbulo 10:22, ndhoka tadhi ti: “Eyambeko lyOMUWA otali yambapaleke.” Ngame naanegumbo lyandje otwa halelela okwiilonga oshindji kombinga yaJehova noku mu longela sigo aluhe.