Omapulo Ga Za Kaaleshi

Omolwashike Oonzapo dhaJehova hadhi thaneke omuyapostoli Paulus e na ongwala nenge uufufu uushona momutse?

Omathano gaPaulus ngoka ge li miileshomwa yetu otaga thaneke owala Paulus, ihe inaga kankamena kuuyelele waalafululi.

Nonando ongawo, opu na uuyelele wontumba kombinga yeholokopo lyaPaulus. Pashiholelwa, oshifo Zion’s Watch Tower shomesiku 1 Maalitsa 1902, osha popile sha ti: ‘Kombinga yeholokopo lyaPaulus: “Mo-Acts of Paul and Thecla,” ndjoka ya nyolwa lwomo A. D. 150, omu na uuyelele kombinga yaPaulus, mboka tashi vulika wu li dhingi nowu li paushili pandjokonona. Paulus okwa popiwa mo e li omulumentu ‘gwokashendjelutu, e na ongwala momutse, e na omatsatsagulu, e na uutanga, e na iikulugumbo ya tsakanena nosho wo eyulu ele.’”

O-The Oxford Dictionary of the Christian Church (yomo 1997) oya popya kombinga yaashoka oshifo sha ti, ya ti: “Itashi vulika o-The Acts of Paul and Thecla yi kale kaayi na uuyelele wontumba wondjokonona wu li paushili.” O-Acts of Paul and Thecla oya li ya simanekwa lela momathelemimvo gotango, ngaashi sha kolekwa kuuyelele mboka tawu adhika momanyolwakaha gomOshigreka ge li 80 nosho wo mOombiimbeli dhomomalaka galwe. Onkee ano, omathano ngoka hatu thaneke, oge li metsokumwe nuuyelele wumwe wopethimbo lyonale kombinga yeholokopo lyaPaulus.

Kaleka momadhiladhilo kutya opu na iinima yilwe ya simanenena yi vule eholokopo lyaPaulus. Nokuli naasho Paulus a li i ipyakidhila nuukalele we, yamwe yomwaamboka ya li taye mu pe uusama oya ti kutya “ngele ta holoka ye mwene, omutalala noohapu dhe kadhi na omupondo gwasha.” (2 Kor. 10:10) Inatu dhimbwa kutya Paulus okwa ningi Omukriste pashikumithalonga shoka sha ningwa kuJesus. Natu dhiladhile wo kombinga yaashoka Paulus a pondola po e li ‘ngoka a hogololwa kuKristus e mu longele ye a tseyithile oshigwana edhina lye.’ (Iil. 9:3-5, 15; 22:6-8) Tala wo nkene tatu vulu okumona uuwanawa momambo gOmbiimbeli, ngoka Jehova a nwetha mo Paulus a nyole.

Paulus ka li i inomene iinima mbyoka a pondola po manga inaa ninga Omukriste, ye natango ka li a popi kutya oku na ondjelo ya tya ngiini. (Iil. 26:4, 5; Fil. 3:4-6) Okwa ti: “Ngame ondi vulike kaayapostoli ayehe noinandi gwana, ndi ithanwe omuyapostoli.” (1 Kor. 15:9) Konima okwa nyola a ti: “Ngame tuu nguka, omufupi ndi vulike kaantu yaKalunga ayehe, onda pewa kesilohenda, ndi uvithile aapagani elaka etoye lyuuyamba waKristus waa shi kuyelekwa.” (Ef. 3:8) Etumwalaka ndyoka olya simanenena li vule omaipulo kehe kombinga yankene Paulus a li a tya.