Longitha Ethimbo Lyoye Nawa
1 Atuheni otu na ethimbo li thike pamwe moshiwike kehe. Okatopolwa hoka tatu longitha mokutaandeleka onkundana ombwanawa oke na unene oshilonga molwashoka oko ethimbo ndyoka tali longithwa miilonga tayi hupitha omwenyo. (Rom. 1:16) Otatu ulike olupandu lwetu lwaashika mokwiilongekidhila nawa iilonga yomomapya, okuthika pokugongala kwiilonga yomomapya pethimbo nosho wo okuthika mbalambala koshitopolwa. Otwa hala okuuvitha, hakutegelela. Molwashoka Jehova okwe tu longa kutya “shaashoka oshi na ethimbo lyasho,” ethimbo ndyoka twa tulila po uukalele womomapya otwa pumbwa oku li tala ko li na oshilonga.—Omuuv. 3:1.
2 Longitha Ethimbo Lyoye nOondunge: Ohatu mono omayambeko ogendji uuna twa dhiginina elandulathanothaneko ndyoka tali tu pitika tu kale nombinga ihaayi faula muukalele womomapya. Dhoshili, iizemo iiwanawa mbyoka tatu mono muukalele oyi na okuthikithwa pamwe nethimbo ndyoka tali longithwa miilonga yomomapya. Ngele otwa ningi omalunduluko omashona gontumba melandulathano lyetu, itatu vulu nando mbela okulongitha ethimbo olindji miilonga yomomapya? Pashiholelwa, konima yiilonga yokulonga niifo mOlyomakaya, itatu vulu mbela okulongitha ethimbo lya gwedhwa po okuninga omaishunoko gamwe? Konima yokulonga uule wokathimbo momapya Osoondaha, itatu vulu mbela okulongitha wo ethimbo lyontumba okuninga omaishunoko nenge okuninga ekonakonombimbeli? Itashi wapa mbela piilonga yetu yegumbo negumbo tu gwedhe po okugandja uunzapo mepandaanda? Momikalo ndhika nenge dhilwe, otatu vulu okuhwepopaleka iilonga yetu yomomapya.
3 Uuna tu li momapya, otatu vulu okukanitha ethimbo ndyoka li na ongushu ngele inatu kotoka. Dhoshili, uuna ku na ombepo ondhigu, okufudha po okathimbo okafupi otaku ke tu nkondopaleka notaku tu kwatha tu tsikile. Ihe kala pandjele, oshoka okufudha po kwa tya ngaaka otashi vulika inaaku pumbiwa aluhe.
4 Moomvula opo dha piti osha ningi oshidhigu noonkondo okwaadha aantu megumbo. Opo ku kondjithwe onkalo ndjika, aauvithi oyendji ohaya longo iilonga yawo yokugandja uunzapo egumbo negumbo pomathimbo gi ili nogi ili omutenya. Omolwashike itoo kambadhala okugandja uunzapo komatango lela nenge kongulohi?
5 Oshi li nawa kaatu kundathane manga tatu longo iilonga yomepandaanda. Pehala lyaashono, thikameni mwa topoka opo mu vule okutameka oonkundathana naantu. Kungeyi ethimbo otali longithwa nawa noonkondo niilonga yomomapya otayi ke eta enyanyu enene.
6 Kwata Nawa Oompito dhOkugandja Uunzapo: Sho omunegumbo a ti kutya ye ke na ohokwe, Onzapo oye mu pula ngele megumbo omu na gumwe ngoka tayi vulu okupopya naye. Shika osha fala sigo omokukundathana nomusamane mwene gwegumbo, ngoka a kala te ehama uule woomvula odhindji nokwa li ha kala unene tuu mombete. Etegameno lyOohapu dhaKalunga olya pepaleke ohokwe ye monkalamwenyo. Konima yokathimbo kowala okwa zi mo mombete nokwa yi kokugongala kOshinyanga shUukwaniilwa nosho wo okwa tseyithile yalwe etegameno lye ndyoka opo a mono!
7 Omumwameme omugundjuka gwoomvula omulongo nasha okwa longitha eetopo okuya momapya manga inaa ya kEkonakono lyEmbo lyomEgongalo. Pegumbo mpoka a yi tango, okwa adha po okakadhona koomvula 13 hoka ka pulakene neitulomo noka kutha iinyolomwa. Esiku lya landula kosikola, omumwameme nguka omugundjuka okwa mono okakadhona oko tuu hoka. Nziya konima yaashoka, okwa ti okwa hala okuninga ekonakonombimbeli nako, nokakadhona oke li zimine.
8 Ethimbo Ndyoka To Longitha Nali Kale Tali Ti Sha: Okukala nombinga ihaaku faula miilonga yomomapya otaku tu kwatha tu humithe komeho uunkulungu wetu mokugandja onkundana ombwanawa. Oto vulu mbela okuhwepopaleka uunkulungu woye wokutameka oonkundathana pegumbo mokulongitha efalomo ewanawa? Oto vulu mbela okuninga omulongi onkulungu noonkondo adhihe uuna to ningi ekonakonombimbeli lyopegumbo? Moku shi ninga, oto vulu okulongitha shili ethimbo lyoye miilonga yomomapya pamukalo tagu ti sha nokuninga uukalele woye tau eta po sha noonkondo.—1 Tim. 4:16.
9 Molwashoka “ethimbo olyo efupi,” onkalamwenyo yetu oyi na okukala yi ipyakidhila niilonga yopaKriste. (1 Kor. 7:29) Okulongitha ethimbo miilonga yokuuvitha oku na okukala oko twa pititha komeho momusholondondo gwiinima yetu mbyoka tu na okuninga. Natu kale ano nokukutha ombinga nuulaadhi okuwanawa muukalele womomapya. Ethimbo olyo oshiniwe oshikumithi shoka Jehova e tu pa. Li longitha aluhe noondunge opo li kale tali ti sha.
[Oshipungu pepandja 4]
Tala Omaetopo Ngaka:
◼ Thika pokugongala kwiilonga yomomapya pethimbo.
◼ Ngele tashi vulika, oongundu dhokugandja uunzapo nadhi kale oonshona.
◼ Yanda okukakadhala okuthika koshitopolwa.
◼ Longa oshitopolwa uuna aantu oyendji ye li pegumbo.
◼ Longa ongoye awike poompito dhimwe, ngele kashi li oshiponga oku shi ninga.
◼ Ninga omaishunoko moshitopolwa shopopepipepi naampoka wa longa egumbo negumbo.
◼ Kala wi ipyakidhila niilonga yomomapya uuna yalwe mongundu ya shelelelwa megumbo lyontumba.
◼ Mpoka tashi wapa, shi ikolelela koonkalo, longa ethimbo li vulithe powili yimwe ayike.