Tseyitha edhina lyaJehova kombanda yevi alihe
1 Sho Jesus a lombwele aalongwa ye ya kale oonzapo ‘osigo okooha dhuuyuni,’ okwa adhika e ya tulila po nale oshiholelwa shoka ye na okulandula. Ethimbo kehe noshaa mpono a adha aantu, okwa li a popi nayo kombinga yelalakano lyaKalunga shi na ko nasha naantu. Mokuholela Jesus, ongundu yomupiya omudhiginini otayi longitha omikalo omiwanawa dhi ili nodhi ili okutseyitha edhina lyaJehova “kombanda yevi alihe.” — Jes. 12:4, 5.
2 Shoka sha li sha ningwa methimbo lyonale: Moomvula dha piti, omauvitho oga li ga nyanyangidhwa miifokundaneki; o“Photo-Drama of Creation” oya li ya totwa po noya li yu ulukilwa aantu omamiliyona; iihauto tayi popi nomambako oya li ya longithwa; nokwa li kwa longithwa unene oongalamafona nosho wo uule wethimbo, oradio — ayihe oya li omolwokuuvitha onkundana ombwanawa. Dhoshili, omuthindo ogwa li gwa tsuwa aluhe kokuninga ekwatathano paumwene naantu opo ku vule okuningwa omaishunoko tago opalele kwaamboka taya monika ye na ohokwe. Onkee ano, uukalele wegumbo negumbo owa ningi oshinima shi na omupondo noonkondo shokutseyitha edhina lyaJehova shaa mpono. — Iil. 5:42.
3 Shoka tashi ningwa methimbo lyetu: Mokulunduluka kwethimbo uuyuni otau inyenge neendelelo, nomomahala ogendji halundji to adha mo aantu momagumbo. Aashona ye na egamo okulongitha ethimbo mokulesha nokutedhatedha iinima yopambepo. Onkee ano otu na okulundulula omukalo gwetu gwokulonga muukalele metsokumwe naashoka. Kakele kokutsikila nokulonga egumbo negumbo moshitopolwa, otwa ladhipikwa okuya mpoka aantu taya adhika notu “adhike aluhe” tu shi okupopila etegameno ndyoka tu na. (1 Pet. 3:15) Shika otashi ti okukambadhala okuuvithila aaniilonga ooyakwetu, aanasikola ooyakwetu, aantu mboka tatu adha momapandaanda nosho wo mopaaka nenge momahala gomapaakingo, ositola nositola, noshaa mpono tashi vulika aantu taya vulu okwaadhika. Kekwatho lyaJehova, oonkambadhala dhetu otadhi ke shi pondola nawa. Ou na mbela ombinga mokuthika kaantu shaa mpono ye li?
4 Inatu thiga nando emanya lya tentekwa kekwawo uuna tashi ya pokutseyitha edhina lyaJehova moshitopolwa shetu. Otatu vulu okumona enyanyu enene mokugwanitha thiluthilu uukalele wetu, manga tatu tala kuJehova okuhila mo aantu yomitima omiwanawa. — Joh. 6:44.