Mona enyanyu miilonga yoye iiyapuki
1 Oya galuka “nenyanyu.” Ehokololo lyOmbimbeli otali hokolola nkene aalongwa 70 ya li ye uvite sho ya galukile kuJesus ye mu tseyithile nkene oshikonga shawo shiilonga yokuuvitha miitopolwa oyindji she ende. Oya li ya mono enyanyu lyopamutima molwashoka oya li ya longo ehalo lyaKalunga. (Luk. 10:17) Oshike mbela tashi vulu oku ku kwathela u mone enyanyu lya faathana miilonga iiyapuki?
2 Iikala iiwanawa: Ou na uuthembahenda wa gandjwa kuKalunga okulombwela aantu elalakano ewanawa noonkondo lyaJehova. Okupitila miilonga yoye yokuuvitha, oto vulu okukwathela omuntu a manguluke komikalo dha shunduka dhomuuyuni mbuno nosho wo momalyenge gelongelokalunga lyiifundja. Oto vulu okupa aantu etegameno lyomwenyo muuyuni wa manguluka kekuthathanopo ndyoka lye tu dhingoloka nena. Dhiladhila kenyanyu ndyoka Jehova e na sho to kunu oombuto dhoshili nomupondo momutima gu na ehalo. Kala u na einekelo uuna to galikana ombepo yaKalunga yi imike oshiyimati shenyanyu mungoye manga to tsikile okulonga muukalele nomutima gwoye aguhe.
3 Edheulo li na oshilonga: Omutumba gwoku ya longa ngoka Jesus a ningi naalongwa 70 otagu yelekanithwa nOkugongala kwoPailonga kwonena. Okwe ya dheula opo ya vule okulonga nomupondo iilonga yawo yomomapya. (Luk. 10:1-16) Nena Okugongala kwoPailonga otaku ku longo nkene u na okupopya naantu, nkene to tameke oonkundathana nonkene to tameke omakonakonombimbeli gopegumbo nosho wo nkene to ga ningi. Ngele to igandja mwene moshinima shika nokuhwepopaleka uunkulungu woye wokuuvitha, oto ka mona kutya omaiyuvo kehe gokuuva inoo manguluka nenge inoo gwana mbyoka tashi vulika wa kala u na otayi ka shonopala notayi ka pingenwa po keinekelo nosho wo kenyanyu.
4 Tala konakuyiwa: Jesus okwa li a nyanyukilwa iilonga ye iiyapuki nonando okwa li i idhidhimikile okumona iihuna. Omolwashike? Omolwashoka omeho ge okwa kala e ga taalelitha naanaa komayambeko nokomauthembahenda gomonakuyiwa. (Heb. 12:2) Ngoye oto vulu okuninga sha faathana mokukaleka omadhiladhilo goye nomutima gwoye ya taalela kedhina lyaJehova nokomayambeko gomonakuyiwa muuyuni uupe waKalunga. Shika otashi ki indjipaleka enyanyu lyoye notashi ka tya sha kuukalele woye.
5 Okulongela Jehova iilonga iiyapuki oko uuthembahenda uunene mboka to vulu okukala u na nena. Onkee ano oto vulu okutya: “Okugwanitha ehalo lyoye, Kalunga kandje, okwo enyanyu lyandje.”—Eps. 40:9.