Jehova oha gandja oonkondo
1 Oshike to dhiladhila kombinga yomuyapostoli Paulus? Uuna tatu lesha embo lyIilonga yAayapostoli, ohatu kala tu uvite ko nkene ye a longa nuudhiginini miilonga yaJehova. Ongiini mbela Paulus a li a tsakanitha ayihe mbyoka a longo? Okwa ti: “Ayihe otandi yi vulu munguka ta koleke ndje.” (Fil. 4:13) Natse wo otatu vulu okumona uuwanawa moonkondo ndhoka Jehova ha gandja. Ngiini? Omokulongitha omasiloshimpwiyu gahamano ngoka he tu ningile ga kale tage tu monunitha oonkondo noku tu koleka pambepo.
2 Oohapu dhaKalunga: Ngaashi naanaa tu na okulya iikulya opo tu kale twa kola palutu, otu na okwiipalutha tse yene nOohapu dhaKalunga opo tu kale nomwenyo pambepo. (Mat. 4:4) Ombimbeli otayi tu pe oonkondo oku tu kaleka nomwenyo pambepo. Okukaleka po uulaadhi wetu nehwamo lyetu omolwoshili, otwa pumbwa okukala tu na ombinga mekonakono lyopaumwene tali ti sha nosho wo okutedhatedha, esiku kehe ngele tashi wapa. — Eps. 1:2, 3.
3 Egalikano: Osha simana okuhedha popepi naJehova, unene tuu pomathimbo goompumbwe dhi ikalekelwa. Kekwatho lyombepo ye, oha gandja oonkondo kwaamboka taye dhi mu pula megalikano. (Luk. 11:13; Ef. 3:16) Omanyolo otage tu ladhipike tu ‘dhiginine megalikano.’ (Rom. 12:12) Oho shi ningi mbela?
4 Egongalo: Ohatu mono wo oonkondo neladhipiko pokugongala kwegongalo nomokweendathana kwohole hoka hatu nyanyukilwa pamwe naamwatate naamwameme. (Heb. 10:24, 25) Uuna tu uvite nayi, yo ohaye tu kwatha moku tu ladhipika noku tu kwathela nohole. — Omayel. 17:17; Omuuv. 4:10.
5 Iilonga yomomapya: Okukutha ombinga ihaaku faula miilonga yomomapya otaku tu kwatha tu kale tatu ukitha eitulomo lyetu kUukwaniilwa nomalaleko nuuyamba gawo. Uupambepo wetu otau yambuka po uuna tatu kwathele yalwe yi ilonge shi na sha naJehova. (Iil. 20:35) Haatuhe tatu vulu okutembuka tu ka longe hono ku na ompumbwe onene nenge okukutha ombinga miilonga yethimbo lyu udha, ihe otatu vulu okukutha ombinga tayi ti sha momikalo dhilwe muukalele. — Heb. 6:10-12.
6 Aatonateli yopaKriste: Ohatu kwathelwa keladhipiko nosho wo kekwatho ndyoka aakuluntugongalo haye tu pe. Jehova okwe ya pa iilonga yokulitha oshigunda shaKalunga ye shi pewa uusita. (1 Pet. 5:2) Aatonateli aayendi ohaya tungu omagongalo moka haya longo, nokuli ngaashi Paulus a li a ningi methimbo lye. — Rom. 1:11, 12.
7 Iiholelwa yaamboka aadhiginini: Oshindjangeka okutala iiholelwa tayi ladhipike yaalongi ooyakwetu aadhiginini, methimbo lyonale nolyonena. (Heb. 12:1) Uuna wa pumbwa okukala wa monununa oonkondo, omolwashike itoo lesha limwe lyomomahokololo taga ladhipike gonkalamwenyo yaamwatate miifo yetu, olopota tayi tungu moYearbook, nenge gamwe gomomahokololo ga tuntula gondjokonona yethimbo lyonena yOonzapo dhaJehova membo Proclaimers?
8 Omumwatate gumwe, ngoka ngashingeyi e li mokati kethimbo lyoomvula 90, okwa taamba ko oshili sho a li okamatyona. Manga a li natango okamatyona, eitaalo lye olya li lya makelwa. Tangotango, yamwe mboka ya li haye endathana negongalo nokulonga pamwe nalyo oya thigi po ehangano lyaJehova. Opo nduno opwa li iilonga yegumbo negumbo, mbyoka a li a mono iidhigu. Nonando ongaaka, okwa kala aluhe i inekela Jehova. Nziya okwa nyanyukilwa iilonga yomomapya. Ongiini nena? Nonando ke na we uukolele, ye oku li natango oshilyo shuukwanegumbo waBetel moBrooklyn, ta longo mOlutuwiliki. Iti ipe nando uusama sho a kakatela kehangano lyaJehova.
9 Omumwameme gumwe ngoka e li oshilyo shuukwanegumbo waBetel moBritania okwa li a ninginithwa sho e na oomvula 13. Okwa li a tameke okukokola ondjila pamwe nomumwayinamati omvula ya landula ko, nokonima yomvula, he okwa tulwa mondholongo molwokukala kwe kee na ombinga mIita Iitiyali yUuyuni. Okwa tsikile okukala i inekela Jehova e mu pe oonkondo, nokwa tsikile okulongela Kalunga kashili. Konima yethimbo, okwa hokanwa komumwatate omudhiginini, noya tsikile okulonga ehalo lyaJehova pamwe. Konima yondjokana yoomvula 35, omusamane gwe okwa si ombadhilila. Okwa mono ishewe oonkondo kuJehova, nokwa kala ta tsikile okulongela Jehova sigo ongashingeyi, e na etegameno okulonga aluhe e li oshilyo shuukwanegumbo wehangano lyaJehova lyokevi.
10 Jehova oha kwatha noha pe oonkondo aapiya ye aadhiginini. “Oye ta tsu omukumo onakuvulwa naangoka, kee na oonkondo, oonkondo dhe ote dhi indjipalitha odhindji.” Otatu vulu okumona oonkondo monzo ndjika kaayi na ongamba yoonkondo mokulongitha omauwanawa agehe gahamano ga tumbulwa metetekelo. Dhimbulukwa: “Oomboka haa inekele Omuwa, oyo haa mono aluhe oonkondo oompe . . . Oyo taa matuka noitaa loloka, taa ende noitaa [vulwa].” (Jes. 40:29-31) Paulus okwa li i inekela thiluthilu muJehova e mu pe oonkondo, nosho tu na okukala ngawo.