Olupandu okupandula esilohenda lyaKalunga
1 Manga omuyapostoli Paulus inaa ninga Omukriste, okwa li a pataneke noonkondo adhihe okutaandela kUukriste. Ihe molwashoka okwa li e shi ningi mokwaashisha, okwa silwa ohenda. Jehova oku ulike esilohenda lye inaali longelwa, na Paulus okwa li a pewa oshilonga shokuuvitha. Oshilonga shika okwa li e shi pandula noonkondo. (Iil. 26:9-18; 1 Tim. 1:12-14) Olupandu okupandula esilohenda lyaJehova olwi inyengitha Paulus i igandje mokugwanitha uukalele we. — 2 Kor. 12:15.
2 Molwesilohenda lyaKalunga, tse wo otwa pewa iilonga yuukalele. (2 Kor. 4:1) Ngaashi Paulus, otatu vulu okuulika olupandu lwetu okupandula ohenda ndjoka twa silwa mokulonga noonkondo opo tu kwathele yalwe ya hume komeho pambepo. Omukalo gumwe tatu vulu oku shi ninga ogwo mokutameka okuninga omakonakonombimbeli.
3 Okutameka omakonakonombimbeli: Omukalo gwokutameka omakonakonombimbeli ogwo okutota po ondjila yiifo. Ngele tatu talele po aluhe mboka hatu faalele iifo, otatu kala tu shi nawa iimpwiyu yawo. Konima yethimbo, oshitopolwa mushimwe shomiifo otashi vulika shi longithwe shi li etameko lyokuulika nkene ekonakonombimbeli hali ningwa mokabroshure Ota Pula. Pomatalelopo taga landula, otashi vulika tashi ka kala tashi wapa okutsikila noonkundathana mokabroshure Ota Pula uuna to gandja iifo komunegumbo.
4 Egalikano nosho wo oonkambadhala oya pumbiwa: Egalikano ndyoka tali endele pamwe noonkambadhala otali ka humitha komeho iilonga yetu yokuuvitha. Omumwameme gumwe omukokolindjila ngoka a li e na ekonakonombimbeli limwe alike okwa li a galikana opo Jehova e mu yambekele okukala e na ogendji. Okwa li wo a longo metsokumwe nomagalikano ge. Okwa konakona uukalele we nokwa mono kutya ka li ha pula aantu ya tameke ekonakonombimbeli uuna ta ningi omaishunoko. Okwa tameke oku shi ninga nokwa mono nziya omakonakono gaali.
5 Kashi shi tuu uuthembahenda okukala tu na ombinga mokutseyitha “evaangeli lyesilohenda lyaKalunga”! (Iil. 20:24) Olupandu okupandula esilohenda lyaKalunga nali tu inyengithe tu kale aalaadhi mokukwathela yalwe ya mone uuwanawa mesilohenda lye inaali longelwa.