“Oohapu dheni nadhi kale aluhe . . . dha toyala omongwa”
1. ‘Okutoyaleka oohapu dhetu nomongwa’ otashi ti shike?
1 Aakolossa 4:6 (OB-1954) otaya ti: “Oohapu dheni nadhi kale aluhe oombwanawa, dha toyala omongwa, ne mu kale mu shi shi, mu na okuyamukula omuntu kehe.” Okutoyaleka oohapu dhetu nomongwa otashi ti kutya okupopya iitya tayi opalele nosho wo momukalo ngoka tagu hokitha aapulakeni yetu. Osha simana unene oku shi ninga ngele tu li muukalele.
2. Ongiini Jesus a li a gandja uunzapo komukiintu Omusamaria?
2 Oshiholelwa shaJesus: Sho Jesus a li ta vululukwa po pomuthima, okwa li a popi nomukiintu Omusamaria ngoka a li e ya okuteka omeya. Omanga ya li taya kundathana, omukiintu okwa li a popi oohapu dhimwe ndhoka tadhi ulike uutondwe mboka wa kala ethimbo ele pokati kAajuda nAasamaria. Okwa li wo a popi kutya Aasamaria oye li oluvalo lwaJakob, nonando Aajuda kaya li ye shi itaala. Pehala lyokuuvithwa nayi kwaashoka, Jesus okwa kala ta popi kombinga yaashoka tashi hokitha. Oshizemo, okwa li a gandja uunzapo mboka wa li wa kwathele omukiintu nosho wo oyendji yomAasamaria. — Joh. 4:7-15, 39.
3. Ongiini tatu vulu okulandula oshiholelwa shaJesus uuna tu li muukalele?
3 Ngele tu li muukalele, otu na okudhimbulukwa kutya elalakano lyetu olyo ‘okuuvitha onkundana ombwanawa.’ (Rom. 10:15, OB-1954) Otwa hala okukundathana nomunegumbo omadhiladhilo taga hokitha notaga tungu okuza mOmbiimbeli, ihe hakuponokela eitaalo lye. Ngele okwa popi sha shoka sha puka, inashi pumbiwa tu mu lombwele mbalambala kutya okwa puka. Mbela mwaashoka a popi omu na sha shoka tatu vulu okutsa kumwe nasho nenge shoka tatu vulu oku shi pandula? Otashi vulika manga inoo lesha enyolo wu mu pule to ti: “Mbela shika tatu ka lesha menyolo ndika otashi wapa ngaa?”
4. Otu na okuninga shike ngele omunegumbo ota longitha elaka lya honga?
4 Ongiini ngele omunegumbo ota longitha elaka lya honga nenge a hala owala okutsa oompata? Otu na okukala natango tu li aanambili meihumbato nomokupopya kwetu. (2 Tim. 2:24, 25) Ngele omuntu ina hala etumwalaka lyUukwaniilwa, otu na oku mu thiga po nomukalo omwaanawa. — Mat. 7:6; 10:11-14.
5. Ongiini omumwameme gumwe a li a mono iizemo iiwanawa omolweyamukulo lyombili?
5 Iizemo iiwanawa: Sho omumwameme gumwe a li a ningi onkambadhala okuuvithila omushiinda she, mushiinda she okwa li e mu ngwenyuukile nokwa li e mu ula nayi. Omumwameme okwa li a popi nohenda ta ti: “Ombili unene kwaashoka. Uhala po nawa.” Konima yiiwike iyali, mushiinda ngoka okwa li a konkola pegumbo lyomumwameme nokugandja ombili omolweihumbato lye nokwa li e mu lombwele kutya okwa hala okupulakena kwaashoka a li e ya oku mu lombwela. Eyamukulo lyombili olundji ohali eta iizemo iiwanawa. — Omayel. 15:1; 25:15.
6. Omolwashike sha simana okulongitha oohapu dha toyala omongwa uuna tu li muukalele?
6 Kambadhala okulongitha oohapu dha toyala omongwa uuna tu uvitha onkundana ombwanawa. Nonando omunegumbo ina hala okupulakena, esiku limwe otashi vulika a ka pulakene kOonzapo dhaJehova ngele tadhi ende po ishewe.