Nghee hatu dulu okuhanauna po eehotengulu odo tadi faneke omahongo oipupulu
1 Oule womafelemido, Satana okwa kala ta longifa omahongo oipupulu nekonda opo a pukife ovanhu vahapu. Okwa kala ta tandavelifa omahongo ngaashi ehongo lOukwatatu, omwenyo ihau fi nosho yo omundilo woheli. Okwa kuna omalimbililo movanhu shi na sha nongeenge oku na tuu shili Omushiti nonokutya Kalunga oye tuu shili omushangi wOmbibeli. Oukwamuhoko noukwashiwana oi li yo imwe yomoinima oyo tai imbi ovanhu va tambule ko oshili. (2 Kor. 4:4) Ongahelipi hatu dulu okukwafela ovanhu va efe po omahongo oipupulu oo e va nwefa mo neenghono? — 2 Kor. 10:4, 5.
2 Omahongo oipupulu okwa nwefa mo omaliudo ovanhu: Omahongo oipupulu, oo omalongelokalunga a kala taa hongo ovanhu, okwa kala a talika ko oshili nokwa nwefa mo neenghono omaliudo ovanhu. Ovanhu vamwe ova hongwa omahongo a tya ngaho a puka okudja kounona wavo. Opo tu kwafele ovanhu va tya ngaho, otu na okupopya navo nelungi nomonghedi oyo tai ulike kutya otwa fimaneka omataleko avo. — 1 Pet. 3:15.
3 Ohatu ka ulika kutya otwa fimaneka ovanhu va tya ngaho, moku va pa omhito va yelife osho va itavela nonokutya omolwashike ve shi itavela. (Jak. 1:19) Otashi dulika va kanyatela kehongo olo kutya omwenyo ihau fi, molwaashi va filwa ovaholike vavo nova halelela oku va mona. Ile otashi dulika hava dana omafiku omafudo molwaashi ove udite kutya oyo omhito iwa okuhafela pamwe nomaukwaneumbo avo. Okupwilikina komatyekosha avo otashi ke tu kwafela tu shiive kutya ove udite ngahelipi, nokungaho ohatu ka dula oku va kwafela monghedi tai pondola. — Omayel. 16:23.
4 Shikula oshihopaenenwa shaJesus: Jesus okwe tu tulila po oshihopaenenwa sha denga mbada monghedi omo a li a nyamukula omapulo omulumenhu umwe oo a li e shii nawa Omhango. Jesus ka li a nyamukula omulumenhu oo odikilila. Otashi dulika ngeno okwa ningile ngaho, ngeno osha ningifa omulumenhu oo a kale ina tambula ko enyamukulo laye, molwaashi omulumenhu oo okwa li a nwefwa mo neenghono kwaasho a itavela. Ponhele yaasho, Jesus okwa li a longifa Omishangwa, nokwa li a pula omulumenhu oo a popye etaleko laye nopo nee okwa longifa efaneko opo e mu kwafele a fike pexulifodiladilo li li pandunge. — Luk. 10:25-37.
5 Eendjovo daKalunga otadi dulu okukwafela ovanhu va manguluke ko komahongo omalongelokalunga oipupulu oo e va nwefwa mo neenghono. (Heb. 4:12) Ngeenge otwa kala hatu hongo vamwe oshili nelididimiko, oshili otai ka hanga omitima davo notava ka efa po omahongo oipupulu noku tambula ko oshili oyo tai ke va mangulula ko komahongo oipupulu. — Joh. 8:32.