Oshimpungu shomapulo

◼ Mbela aavali ayehe oye na okuyalula ethimbo ndyoka haya longitha pekonakono lyuukwanegumbo?

Nonando aasamane oyo unene ye na oshinakugwanithwa ‘shokuputudha aanona yawo mevuliko nomekumagidho lyOmuwa,’ aavali ayehe oye na okukutha ombinga mokuputudha aanona yawo. (Ef. 6:4) Ombiimbeli otayi ladhipike aanona tayi ti: “Mumwandje, pulakena omakumagidho gaho, ngoye ino ekelahi omapukululo ganyoko.” (Omayel. 1:8) Omukalo gumwe gwa simana gwokuputudha aanona ogwo okupitila mekonakonombiimbeli lyuukwanegumbo.

Nale, omuvali ngoka ta kwatele komeho ekonakono lyuukwanegumbo tali ningwa naanona mboka inaaya ninginithwa oye owala e na okunyola ethimbo ndyoka a longitha polopota ye, nonando aavali ayehe oya li ya kwatelwa mo moonkundathana ndhoka. Ihe shika osha lunduluka ngashingeyi. Ngele aavali ayehe oya kutha ombinga mokulonga aanona yawo pekonakono lyuukwanegombo, nena ayehe oye na okuyalula owili yimwe ayike moshiwike. Odhoshili kutya aavali ohaya longitha ethimbo olindji li vule powili yimwe moshiwike okulonga aanona yawo. Okuputudha aanona okwa kwatela mo aluhe oonkambadhala dhaavali ayehe. (Deut. 6:6-9) Ihe olopota yokomwedhi oyi na okukwatela mo unene oowili ndhoka dha longwa momapya. Onkee ano, kaye na okuyalula ethimbo li vulithe powili yimwe moshiwike, nonando otashi vulika ekonakono hali ningwa ethimbo lya konda powili nohali ningwa shi vulithe oshikando shimwe moshiwike kehe nenge haya konakona naanona poompito dha yoolokathana. Ihe omuvali owala gumwe e na okulopota ekonakono lyuukwanegumbo neishunoko limwe oshiwike kehe moka ekonakono lya li lya ningwa.