Elandulafano lipe lokwoongala kweongalo
1, 2. Otapa ka ningwa omalunduluko elipi e na sha nokwoongala okudja muJanuali 2009?
1 Moshivike sho 21-27 Aprili 2008 omwa li mwa ningwa eshiivifo litunhula momaongalo opaKriste mounyuni aushe. Eshiivifo olo ola ti: “Ekonakono lEmbo lomEongalo otali ka hengumukila mumwe nOfikola yOukalele woPauteokratika nosho yo Okwoongala kwoPailonga okudja mu 1 Januali 2009. Edina lEkonakono lEmbo lomEongalo otali ka lunduluka ndele tali ningi Ekonakonombibeli lEongalo.”
2 Nghee elandulafano lokwoongala oko kwokoshivike tali ka kala: Okwoongala oko otaku kwata oule wovili nominute omilongo nhe nanhano (1:45), mwa kwatelwa omaimbilo nosho yo omailikano. Okwoongala oko otaku ka kala haku hovele neimbilo neilikano (ominute 5), taku landula Ekonakonombibeli lEongalo (ominute 25). Ofikola yOukalele woPauteokratika (oyo tai ka kwata oule wominute 30) otai ka landula ko diva konima yEkonakonombibeli lEongalo, nopehe na eimbilo pokati. Opo nee, otaku ka imbwa eimbilo (ominute 5) olo tali twala mo Okwoongala kwoPailonga (ominute 35). Okwoongala oku na okuxulifwa neimbilo nosho yo neilikano (ominute 5). Otaku ka kala haku pitifwa elandulafano lokwoongala oko mokafo koukalele omwedi keshe, elandulafano lEkonakonombibeli lEongalo, lOfikola yOukalele woPauteokratika nosho yo lOkwoongala kwoPailonga. Osho otashi ke mu kwafela mu lilongekidile okwoongala oko.
3. Ekonakonombibeli lEongalo otali ka kala hali kwatelwa komesho ngahelipi?
3 Ekonakonombibeli lEongalo: Ekonakonombibeli olo oli na okukala hali ningwa monghedi ya faafana nekonakono lOshungonangelo. Inashi pumbiwa okuhovela Ekonakonombibeli to endulula osho sha li sha konakonwa oshivike sha pita. Ponhele yaasho, ou na ashike okuninga etwalemo li li pauxupi. Osho otashi ka yandja omhito kovapwilikini va dule okuyandja omatyekosha avo e li pauxupi. Omupashukili omuunganeki oku na okukala ha ningi elandulafano li na sha novakulunhuongalo ovo tava kwatele komesho Ekonakonombibeli lEongalo opo va kale tava ningi omalufo. Ekonakonombibeli olo oli na okukwatelwa komesho komukulunhuongalo umwe e lili oshivike keshe.
4. Omalunduluko elipi taa ka ningwa po shi na sha nOkwoongala kwoPailonga?
4 Okwoongala kwoPailonga: Okwoongala kwoPailonga otaku twikile ku li ngaashi shito, ashike oitukulwa otai ka kala ixupi. Omashiivifo otaa ka kala haa kwata oule wominute nhano. Efimbo olo ola henena okuninga omashiivifo a fimana nokulesha eenhumwafo donhumba odo hadi di koshitaimbelewa. Omashiivifo makwao, ngaashi elongekido lokuya moukalele, elandulafano lokuwapaleka, omushangwahokololo u na sha nelongifo loimaliwa nosho yo eenhumwafo odo hadi di alushe koshitaimbelewa, inaa pumbwa okuleshwa komutune. Ndele ponhele yaasho, omashiivifo a tya ngaho oku na okutulwa kekafa opo ovamwatate ve ke lileshele vo vene. Aveshe ovo va pewa oitukulwa mokwoongala oko ove na okulilongekida nawa, okulandula omalombwelo oo va pewa nokulongela kefimbo olo la ufwa.
5. Elandulafano lokwoongala otali ka kala ngahelipi pefimbo letalelepo lomupashukilishikandjo?
5 Etalelepo lomupashukilishikandjo: Elandulafano lomupashukilishikandjo lokoshivike itali ka lunduluka. MEtivali otamu ka kala hamu ningwa Ofikola yOukalele woPauteokratika nOkwoongala kwoPailonga, opo nee taku imbwa eimbilo. Konima yeimbilo olo, omupashukilishikandjo ota ka yandja oshipopiwa shaye moule wominute 30. Ngaashi ashike hashi ningwa paife ngeenge omupashukilishikandjo ta talele po eongalo, ope na okuhoololwa vali efiku limwe konguloshi omo tamu ka ningwa Ekonakonombibeli lEongalo. Opo nee, otaku ka imbwa eimbilo, ndele omupashukilishikandjo ta ka yandja oshipopiwa shaye shoilonga. Okwoongala oko otaku ka xulifwa neimbilo nosho yo eilikano.
6. Ovapashukili veengudu doilonga yomomapya otava ka kala tava dana onghandangala ilipi?
6 Okwoongala ku na sha noilonga yomomapya: Ovapashukili veengudu, sha hala okutya, ovamwatate ovo tava ka kala tava kwatele komesho eengudu doilonga yomomapya nokulifa eedi odo di li meengudu davo, otava ka ulikwa kolutu lovakulunhuongalo. Ngeenge omuyakuliongalo oye ta kwafele shi na sha noshinakuwanifwa osho, ota kala ha ifanwa “omuyakuli wongudu.”
7. Omauwa elipi hatu ka mona pokwoongala kweongalo oko?
7 Ngaashi sha kundafanwa metetekelo, omalongekido aeshe oo okwa nuninwa oku tu kwafela opo tu hongwe notu tungwe pamhepo pokwoongala oko kwokonguloshi. Osho otashi ke tu kwafela tu ninge ovaudifi novahongi va pyokoka, nopo tu imike oiimati moukalele. — Ef. 4:13, 14; 2 Tim. 3:17.
8. Ongahelipi okulilongekida komesho yefimbo taku dulu oku tu etela ouwa pauhandimwe nosho yo Ovakriste vakwetu?
8 Okulilongekidila okwoongala oko komesho yefimbo otashi ke tu kwafela tu kaleke momadiladilo oitwa ya fimana oyo tai ka kundafanwa pokwoongala keshe. Atusheni ohatu ka kala tu na omhito yokuyandja omilombo detu, opo tu twaafane omukumo. (Rom. 1:11, 12; Heb. 10:24) Atusheni otu na okulitulila po elalakano tu kale tu shii “okulongifa nawa eendjovo doshili,” nopo ‘okweehena kwetu komesho ku monike kuaveshe.’ — 2 Tim. 2:15, NW; 1 Tim. 4:15.
9. Otwa tokola toko okuninga po shike nomolwashike?
9 Nopehe na omalimbililo, otwa hafa neenghono omolwomalunduluko oo a ningwa po e na sha nokwoongala kweongalo. Natu twikileni okukala hatu wilikwa ‘komupiya omudiinini nomunaendunge’ nokweehena popepi nOmufita wetu Munene oo te tu longekida opo tu ka pite “moudjuu” munene oo u li poduka. — Mat. 24:21, 45; Heb. 13:20, 21; Eh. 7:14, NW.