Longekidha mboka aape yi idhidhimikile omapataneko
1 Uuna oohandimwe taya tameke okukonakona Ombiimbeli, ohaya kala “ya hala okulongela Kalunga nesimaneko,” ihe Satana oha kambadhala oku ya kondjitha. (2 Tim. 3:12) Omapataneko otaga vulu okuza kaaniilonga pamwe nayo, aanasikola ooyakwawo nenge kaashiinda. Otashi vulika shi kale oshidhigu unene tuu ngele mboka aape taya patanekwa kaapambele yopopepi. — Mat. 10:21; Mark. 3:21.
2 Omapataneko oga hunganekwa: Mboka aape oye na okutseya kutya otaya ka tsakaneka omapataneko noshi li euliko kutya otaya ningi shili aalongwa yaKristus. (Joh. 15:20) Omathimbo gamwe yalwe otashi vulika ye ya pataneke omolweuvoko lya puka ndoka ye na kombinga yOonzapo dhaJehova. Kaleka momadhiladhilo kutya enyanyu enene ohali zi mokuhepekwa molwaashoka wu li omulanduli gwaJesus noho vulika kuKalunga. (Iil. 5:27-29, 40, 41) Shilipaleka mboka aape kutya Jehova ote ke ya yambidhidha. (Eps. 27:10; Mark. 10:29, 30) Otaya ka kala ya gama kombinga yaJehova nuunamapangelo we ngele oya kala ya kakatela uudhiginini wawo. — Omayel. 27:11.
3 Ontseyo yashili oyi na oshilonga: Ulukila aakonakoni yoye esimano lyokutsikila okwiilonga ontseyo yashili, nonando otashi vulika ya taalelwa komaupyakadhi. Okupitila momapataneko, Satana oha kambadhala okukeelela shoka tayi ilongo shi mene momitima dhawo dhopathaneko. (Omayel. 4:23; Luk. 8:13) Oye na okutsikila okwiilonga ontseyo yashili yOohapu dhaKalunga opo ya kale ya kolelela meitaalo. — Eps. 1:2, 3; Kol. 2:6, 7.
4 Eidhidhimiko olya pumbiwa: Eidhidhimiko olya pumbiwa monkalo kehe ondhigu notali vulu okweeta iizemo iiwanawa. (Luk. 21:16-19) Uuna mboka aape tayi idhidhimikile omapataneko otashi ke ya etela uuwanawa nosho wo yalwe. Otaya ka mona nkene Jehova ha laleke nuuyamba mboka tayi idhidhimike. — Jak. 1:12.
5 Omuyapostoli Paulus okwa li a nyanyukilwa ehumokomeho lyopambepo lyaamwahe yomuTessalonika. Okwa li a pandula Kalunga sho a kwathele oyendji yomuyo ye ye moshili. (2 Tes. 1:3-5) Otatu ka nyanyukwa wo uuna tatu kwathele aakonakoni yetu ya taalele omapataneko nokuga idhidhimikila.