Otaa itaale ngiini?
1. Omolwashike iilonga yokuuvitha tashi vulika yi kale iidhigu nomolwashike tu na okutsikila nayo?
1 Molwaashoka esiku lyaJehova otali hedha popepi, opu na ompumbwe ye endelela yokukwathela yalwe ya mone ontseyo yashili kombinga yaKalunga nelalakano lye li na ko nasha naantu. (Joh. 17:3; 2 Pet. 3:9, 10) Shika otashi vulu okukala oshidhigu omathimbo gamwe molwaashoka oyendji oye na okatongo nenge tashi vulika ye tu sheke omolwiilonga yetu yokuuvitha. (2 Pet. 3:3, 4) Nonando ongaaka, otu na okwiitaala kutya opu na yamwe moshitopolwa shetu mboka taya ka taamba ko onkundana ombwanawa ngele ye yi uvu. Oohandimwe mboka otaya ka uva ngiini, ngele kapu na ngoka te ya uvithile? — Rom. 10:14, 15.
2. Oshiholelwa shomuyapostoli Paulus otashi tu ladhipike ngiini?
2 Uuna twa taalela omapataneko: Omolwoyendji mboka ya hala okuuva etumwalaka kombinga yUukwaniilwa waKalunga, katu na okwiimbwa komapataneko. Oshilando Filippi muEuropa osho sha li shu uvu tango onkundana ombwanawa ndjoka omuyapostoli Paulus a li u uvitha. Sho ye naSilas ya li ya lundilwa oya li ya dhengwa noongola nokutulwa mondholongo. (Iil. 16:16-24) Ihe shoka inashi ningitha Paulus a shune monima kuumbanda. Sho a li a talele po oshilando shaTessalonika molweendo lwe lwuutumwa okwa li ‘a pewa omukumo kuKalunga.’ (1 Tes. 2:2) Oshiholelwa shaPaulus mbela itashi tu pe etompelo kutya omolwashike kaatu na ‘okuvulwa’? — Gal. 6:9.
3. Oshike tashi vulu okulundulula iikala yayamwe nonando nale kaya li ye na ohokwe?
3 Oyendji mboka ya li ya tindi okupulakena ketumwalaka lyetu omimvo dha pita oya lundulula iikala yawo. Egwopevi lyombadhilila lyiimaliwa, omikithi, eso lyoshilyo shuukwanegumbo nenge oonkundana oombwinayi dhiiningwanima yuuyuni otayi vulu okweeta elunduluko ndyoka. (1 Kor. 7:31) Yamwe mboka aavali yawo ya li haya pataneke etumwalaka lyetu, oya koka noya hala okupulakena. Okutsikila kwetu nokuuvitha otaku gandja ompito kuyo yi ‘ithane edhina lyOmuwa’ manga ethimbo inaali pwa po. — Rom. 10:13.
4. Oshike tashi tu ladhipike tu tsikile muukalele ‘nopwaahe na okweetha’?
4 “Inaa etha”: Ohole yetu yokuhola Kalunga naantu ooyakwetu otayi ke tu inyengitha tu tsikile ‘nopwaahe na okweetha’ okuuvitha nokuninga aantu aalongwa ngaashi aayapostoli methelemumvo lyotango. (Iil. 5:42, OB-1954) Oyendji kunena otaya ‘keme noya lulilwa molwiihuna ayihe’ mbyoka tayi ningwa. (Hes. 9:4) Itaya ka kala tuu ye na etegameno noya pepelelwa ngele yu uvu onkundana ombwanawa! Nonando aantu oyendji inaya hala okupulakena, otu na eshilipaleko lyopamanyolo kutya Jehova okwa hokwa oonkambadhala dhetu. — Heb. 13:15, 16.