Oshimpungu shepulo

◼ Oonzapo dhaJehova odhi na mbela okutaandelitha iipopiwa mbyoka ya kwatwa muungalo nenge ya nyolwa komuntu mwene?

Iipopiwa yOmbiimbeli ohayi tu ladhipike noku tu tsa omukumo. (Iil. 15:32) Oshi li paunshitwe okukala wa hala wu lombwele gumwe ngoka kaa li kokugongala shoka sha tiwa ko. Omolwiilongitho oyindji yopashinanena mbyoka tu na kunena, oshipu okukwata iipopiwa noku yi tumina yalwe. Opu na yamwe ye na natango iipopiwa yonalenale mbyoka ya kwata nohaye yi pe yalwe ya ka pulakene ko nenge ya ningile ookuume kawo mboka ye hole ookopi. Yalwe ohaya tumine iipopiwa ko-internet hoka kehe gumwe ta vulu oku yi tapa.

Nashi uviwe ko kutya kapu na ngoka i indikwa okukwata iipopiwa mbyoka ta ka pulakena ye mwene nenge pamwe nuukwanegumbo we. Aakuluntugongalo otaya vulu wo okukwata iipopiwa noku yi pa iilyo yegongalo mbyoka itaayi vulu okukala pokugongala omolwuuwehame. Ihe opu na omatompelo omawanawa kutya omolwaashike kaatu na okutaandelitha iipopiwa mbyoka ya kwatwa muungalo nenge ya nyolwa komuntu mwene.

Molwaashoka iipopiwa olundji ohayi gandjwa shi ikolelela koompumbwe dhegongalo, oshipu okuuva ko iinima yimwe papuko miipopiwa mbyoka ya kwatwa molwaashoka itatu ka tseya naanaa kutya omolwashike omupopi ta tile ngawo. Natango, oshidhigu okumona kutya olye a gandja oshipopiwa shoka nuunake, opo omuntu wu kale nuushili kutya uuyelele mboka owu li pethimbo nowu li metsokumwe noshili yOohapu dhaKalunga. (Luk. 1:1-4) Natango ishewe, iipopiwa mbyoka ya kwatwa muungalo nenge ya nyolwa kugumwe otayi vulu okuningitha yamwe ya gandje eitulomo lya pitilila komuntu noku mu simaneka. — 1 Kor. 3:5-7.

Omupiya omudhiginini nomunandunge oha longo nopwaahe na oluthuwo opo a gandje iikulya yopambepo “pethimbo lyayo.” (Luk. 12:42) Shika osha kwatela mo iipopiwa mbyoka yi na okugandjwa momagongalo gOonzapo dhaJehova nosho wo uuyelele mboka tatu vulu okutapa ko-internet kondjukithi yehangano jw.org Web site. Otu na einekelo shili kutya omupiya omudhiginini nomunandunge nOlutuwiliki lwe otaye ke tu pa shoka twa pumbwa opo tu kale twa kola meitaalo. — Iil. 16:4, 5.