‘Uunongo ohawu hololwa kiilonga’
1. Euvoko lya puka lini aantu yamwe ye na kombinga yOonzapo dhaJehova?
1 Ethimbo limwe ohatu tsakaneke aanegumbo mboka taye tu yamukula nayi molwaashoka ye na euvoko lya puka nenge ya lombwelwa iifundja kombinga yOonzapo dhaJehova. Otashi vulika taya popi iinima mbyoka ya lesha miifokundaneki. Miilongo yimwe Oonzapo odha talika ko dhi li “oshimpaga sha nika oshiponga.” Otu na okuninga shike uuna twa taalela omalundilo goludhi ndoka?
2. Oshike tashi ke tu kwathela twaaha teke omukumo uuna tatu popilwa muuwinayi?
2 Ino teka omukumo: Iilonga yaJesus noyaapiya yaJehova yalwe yomethelemumvo lyotango olundji kaya li yu uvitiwe ko noya li ya popilwa muuwinayi. (Iil. 28:22) Nonando ongaaka, kaya li ya sa ohoni iilonga yawo yuukalele. Jesus okwa ti: ‘Uunongo ohawu hololwa kiilonga.’ (Mat. 11:18, 19) Okwa tsikile okulonga ehalo lyaHe nuulaadhi e na einekelo kutya onkundana ombwanawa otayi ka thika kwaamboka taya kongo oshili. Itatu ka teka omukumo, molwaashoka Omwana gwaKalunga naye okwa li a ningilwa sha faathana.
3. Omolwashike omapopyo omawinayi nomapataneko kaayi na oku tu kumitha?
3 Jesus okwa li e shi popi kutya aalongwa ye otaya ka kala ye tondike kuuyuni ngaashi wa li wu mu tonde. (Joh. 15:18-20) Onkee ano, omapopyo omawinayi nomapataneko ngoka tatu ningilwa kunena kage na oku tu kumitha. Osha yela kutya iinima mbyoka otayi ka kala ya ha sho onkalelo yiinima ndjika yaSatana tayi ende yu uka kehulilo naasho ondjahi ye tayi ende tayi dhimuka. (Eh. 12:12) Shika otashi tu nyanyudha molwaashoka otashi ulike kutya uuyuni waSatana owu li pokuhula po.
4. Otu na okuyamukula ngiini ngele otwa adha omuntu te tu ula nayi?
4 Yamukula nombili: Ngele tatu ulwa nayi natu yamukule aluhe noohapu oombwanawa nodhombili. (Omayel. 15:1; Kol. 4:5, 6) Ngele omunegumbo ote shi pitike, natu mu yelithile kutya Oonzapo dhaJehova ohadhi lundilwa olundji nenge tu mu pule kutya omolwashike e tu tonde. Ngele otwa yamukula nombili, omunegumbo otashi vulika a kale a limbililwa kwaashoka u uva nale kombinga yetu nota ka kala a hala okupulakena ngele tatu mu talele po oshikando tashi landula. Ihe ngele omunegumbo okwa geya noonkondo oshi li nawa tu mu thige po nombili. Otu na uushili kutya Jehova okwa lenga uukalele wetu, nonando aantu oya kale taya ti ngiini. — Jes. 52:7.