Oshimpungu shomapulo

◼ Nkene tatu vulu okukwathela aakokolindjila

Momumvo gwiilonga 2009 omwa lopotwa omwaalu gwaakokolindjila yondjigilile noyi ikalekelwa ye li 800 000 lwaampo. Aamwatate naamwameme mboka oya yamba po ethimbo lyawo, oonkondo dhawo niiniwe yawo opo ya taandelithe onkundana ombwaanawa yUukwaniilwa. (Omayel. 3:9) Jehova okwa panda oonkambadhala dhawo ndhoka. Ongiini tatu vulu okuholela Jehova mokukwathela aakokolindjila ya kale ya nyanyukilwa iilonga yawo nokwiidhidhimika opo ya tsikile?

Oohapu dhetu dha dhiladhilwa nawa otadhi vulu oku ya tsa omukumo ya tsikile niilonga yawo. (Omayel. 25:11) Mbela itatu vulu okuninga omalongekidho tu longe nayo muukalele? Ngele otu wete kutya omukokolindjila ota mono iihuna, otatu vulu oku mu kwathela niiniwe yetu opo a vule okutsikila niilonga ye. Uuna tatu ende miiyenditho yawo, otatu vulu oku ya pa omaambidhidho ya vule okwiikwatha nago.(1 Kor. 13:5; Fil. 2:4) Otatu ke ya ambidhidha wo moku ya yakula noku ya hiya ye ye ya lye pamwe natse. — 1 Pet. 4:8, 9.

Omanyolo oga shilipaleka kutya Jehova ota ka pa mboka taya pititha komeho Uukwaniilwa iipumbiwa yawo. (Eps. 37:25; Mat. 6:33) Omukalo gumwe moka he shi ningi okupitila maamwatate naamwameme yopaKriste. (1 Joh. 3:16-18) Odhoshili kutya aakokolindjila inaya tegelela ya silwe oshimpwiyu pashimaliwa kuyalwe. Otashi vulika nokuli kaaye tu lombwele oompumbwe dhawo. Ihe otatu vulu oku ya kwathela ya gwanithe po oompumbwe dhawo mokukonakona oonkalo dhawo noku dhi ndhindhilika nawa. — 2 Kor. 8:14, 15.

Omumwameme Foibe, omuuvithi gwevaangeli omulaadhi gwomegongalo lyomuKenkrea ngoka a li ko methelemumvo lyotango sho a yi kuRoma, Paulus okwa lombwele aamwatate muRoma a ti: “Mu taambeni medhina lyOmuwa, ne mu mu yakule moompumbwe dhe adhihe, ongaashi sho opalela aantu yaKalunga.” (Rom. 16:1, 2) Otu na ompito okwaambidhidha aakokolindjila yondjigilile naamboka yi ikalekelwa mboka ye li megongalo lyetu notayu uvitha onkundana ombwaanawa nuudhiginini. — Iil. 5:42.