Ontumwafo ya za kolutuwiliki
Kaalongeli yaJehova ooyakwetu:
Ethimbo ndika kali shi tuu lituntula! Enyanyu oli thike peni! Otwa nyanyukwa shili okulonga pamwe nane aamwatate naamwameme aaholike tu neni ‘edhiladhilo limwe,’ mokugandja uunzapo uunene ethimbo alihe kombinga yaTate yetu yomegulu, Jehova. — Sef. 3:9; Joh. 14:12.
Enyanyu ndyoka tu na mokulongela Jehova itali ti kutya katu na omaupyakadhi ga kwata miiti. Omumvo gwiilonga gwa piti yamwe yomune omwa li mwa mono omaupyakadhi omolwomakakamo gevi, omafundja iikungulu yombepo nenge yomvula niiponga yilwe yopaunshitwe tayi pula omwenyo. (Mat. 24:7) Oyendji yomune ohamu ungaunga esiku kehe nuuvu mboka we mu nkundipaleka nuukulupe. Atuheni otu na okwiidhidhimikila ‘ooyayee dhuudhigu.’ (Mat. 24:8, NW) Miilongo oyindji mwa kwatelwa Armenia, Eritrea naKorea lyokuumbugantu, oyendji yomaamwatate oya tulwa moondholongo omolweitaalo lyawo. — Mat. 24:9.
Oshike sha li she tu kwathele tu kale twa nyanyukwa nonando opwa li oonkalo ndhika oondhigu? Enyolo lyokomumvo lyomo 2010 olya li lye tu dhimbulukitha oshinima shimwe sha simana kutya “ohole ohayi idhidhimike sigo okehulilo. Ohole itayi hulu po.” (1 Kor. 13:7, 8) Oshoshili kutya ohole yetu yokuholathana noyokuhola Jehova ohayi tu nkondopaleke tu idhidhimike nomupondo.
Aantu oyendji mboka tayi iti Aakriste oya kuminwa iilonga yetu yokuuvitha mbyoka hayi longwa ethimbo alihe nokehe pamwe. Nonando aantu yamwe ihaya zimine eitaalo lyetu nomalongo getu, oyi inyengithwa ya popye kutya “ne ohamu longo iilonga mbyoka natse tu na okukala tatu longo.” Oshinima shimwe shoka hashi kwathele Oonzapo dhaJehova dhi tsikile nokuuvitha esiku nesiku oshini? Osho ohole. Ngaashi owala Tate yomegulu, inatu hala pu ka kane nando ogumwe. (2 Pet. 3:9) Uushili kutya otwa hala ayehe yi itedhulule owu ulikwa moshitsa oshipe shaauvithi 7 508 050 momumvo gwa zi ko gwiilonga. Mbela opu na ngaa elongelokalunga lilwe li na aakalele oyendji ye thike mpono haya kutha ombinga nehalo ewanawa miilonga mbika yohole nohayi iyamba okukwathela yalwe pambepo?
Otwa ladhipikwa tu tale egwanitho lyehunganeko tali tsikile li li muJesaja ndyoka tali ti: “Momasiku tage ke ya kondundu hoka kwa tungilwa otempeli, otayi ka ninga ondeendeka yi vule adhihe, otayi ka lelepala kombanda yoondundu adhihe. Iigwana oyindji otayi ke ya tayi matukile kuyo.” (Jes. 2:2-4) Yamwe yomwaamboka ya mbombolokele kegumbo lyaJehova ye li 294 368, oyo mboka ya li ya ninginithwa momumvo gwiilonga gwa zi ko. Aaholike mbaka otwe ya taamba ko mehangano lyetu. Ohole yetu yopaKriste nayi tu inyengithe tu tsikile oku ya kwathela ya kondjithe omutondi gwetu Satana Ondiaboli. — 1 Pet. 5:8, 9.
Oshitsa shopombanda shaamboka ya li pEdhimbuluko ye li 18 706 895 metiyali, mo 30 Maalitsa 2010, otashi ulike kutya opu na natango aantu omamiliyona mboka tashi vulika ye ye ya longele Jehova pamwe natse. Inatu nyanyukwa tuu sho Jehova inaa hulitha po natango uuyuni mbuka wa kolokosha! Sigo ongashingeyi, ohole yetu ohayi tu kwathele tu idhidhimike. — 2 Tes. 3:5.
Iigongi yoshitopolwa “Kala popepi naJehova!” mbyoka oyindji yomuyo ya li ya ningwa muuyuni auhe mo 2010, oya li ya nkondopaleke ekwatathano lyetu naTate yetu yomegulu, Jehova. Oohapu dhomupisalomi kadhi shi tuu dhoshili ndhoka tadhi ti: “Oshigwana shi na OMUWA, oye Kalunga kasho, oshi na elago.” (Eps. 144:15) Kashi na nduno mbudhi kutya onakuyiwa otayi ka kala ya tya ngiini, otu na omukumo kutya ngele otu na Jehova, itatu ka tila nando osha. (Eps. 23:4) Masiku Jehova ota ka longitha Omwana a “hanagule po iilonga yomuhindadhi.” (1 Joh. 3:8) Dhoshili, otwa hala esiku ndyoka li thike, ihe ngashingeyi otu na iilonga oyindji mbyoka twi ipyakidhila nayo. — 1 Kor. 15:58.
Kaleni nuushili kutya ohatu “mú dhimbulukwa” aluhe momagalikano getu. (Rom 1:10) Ano ‘ikalekeni mohole yaKalunga mokutegelela kweni, Omuwa gwetu, Jesus Kristus pasilohenda lye e mú pe omwenyo gwaaluhe.’ — Jud. 21.
Otu mu hole amuhe.
Aamwaho
Olutuwiliki lwOonzapo dhaJehova