Oshimpungu shepulo
◼ Otu na okukaleka shike momadhiladhilo ngele otwa hala yimwe nenge ayihe yomomaliko getu yi thigululwe po kehangano lyaJehova?
Ngele omuntu a si iha vulu we okukala ta pangele eliko lye. (Omuuv. 9:5, 6) Onkee oyendji ohaya nyola omatestamendi ngoka ga yelitha kutya oya hala omaliko gawo ga topolwe ngiini. (2 Aak. 20:1) Omukanda nguka gwopaveta ohagu ulike wo kutya olye omuthigululithi nenge ngoka i inekelwa u ungaunge niinima. Ngele kagu po, oveta oyo tayi ka tokola kutya omaliko ngoka oge na okupewa aakwanezimo yeni notayi ga topola naanaa ngaashi yu uvite kutya osho shi na okuningwa. Onkee ano, ngele otu na omaliko gokondandalunde nenge twa hala agehe ga ye kehangano lyaJehova, osha simana tu nyole omukanda gwopaveta tagu shi popi e tatu hogolola kutya olye twi inekela lela oye u ungaunge niinima nenge oye a kale omuthigululithi. Shilipaleka wo kutya owa kundathana oshinima shoka noyaandjeni, unene tu ngele kaye shi Oonzapo. Shika otashi ka keelela opo aanegumbo kaaya ka kale taya pataneke shoka sha nyolwa metestamendi ngele oyu uvite kutya omaliko oge na okuthigilwa aanegumbo.
Ngoka i inekelwa oye u ungaunge niinima nenge a kale omuthigululithi oku na oshinakugwanithwa sha kwata miiti. Shi ikolelela kuuwindji weliko otashi vulika shi ke mu pule ethimbo olindji opo a gongele uuyelele mboka tawu ke mu kwathela e li topole. Natango, olundji aakwanambelewa yopaveta oye na omilandu ndhoka odho dhi na okulandulwa, onkee ano otashi vulika wu kale wa pumbwa omuntu ngoka a pyokoka miikwaveta pamwe nando oahende nenge omuyaluli gwiimaliwa (accountant) opo e ku kwathele. Hakehe gumwe megongalo ta ka vula okuhogololwa u ungaunge niinima nenge oye a kale omuthigululithi. Otu na okuhogolola omuntu ngoka tu wete kutya ota vulu oshinakugwanithwa shoka, e shi okwiinekelwa, noku na ehalo lyokulandula ashihe shoka sha nyolwa momukanda moka.—Tala oshitopolwa “The Wisdom and Benefits of Estate Planning,” shi li mo-Awake! 8 Desemba 1998.
Ngele owa pulwa wu ninge omuthigululithi nenge wu ungaunge niinima: Ngele owa pulwa wu ninge omutonateli gweliko lyomuntu gwontumba ngele a si, tango shilipaleka kutya owa yalula shoka sha kwatelwa mo nokutokola pamwe negalikano ngele oto vulu ngaa okugwanitha po oshinakugwanithwa shoka. (Luk. 14:28-32) Ngele omuntu ngoka a si, oto ka pumbwa okutseyithila aathigululi ayehe ya nyolwa momukanda. Otashi ka kala oshinakugwanithwa shoye okutopola omaliko ngoka shi ikolelela kompango nosho wo naanaa ngaashi sha popiwa metestamendi. Ngoka i inekelwa u ungaunge niinima nenge omuthigululithi oku na okukala e shi kutya, kutya nduno eliko olindji nenge eshona, ke na okukonda shoka sha nyolwa metestamendi. Omagano kehe ngoka taga pewa ehangano li li paveta ndyoka hali longithwa kOonzapo dhaJehova oga yapulilwa Jehova noga ninga gehangano lye.—Luk. 16:10; 21:1-4.