Oshike hashi ku “nyanyudha”?
1. Oshike hashi ku nyanyudha kehulilo lyomwedhi kehe?
1 Oshike hashi ku “nyanyudha” kehulilo lyomwedhi kehe, uuna twa pulwa tu gandje oolopota dhetu dhiilonga yomomapya? (Gal. 6:4, NW) Kutya nduno otu li aakokolindjila yi ikalekelwa hatu longo oowili 130 muukalele nenge pamwe tu li aauvithi mboka ya pitikwa okulopota nando ominute 15, atuhe otwa pumbwa okukala hatu nyanyukilwa iilonga yetu mbyoka hatu longele Jehova. — Eps. 100:2.
2. Omolwashike tu na okulonga nuudhiginini miilonga yaJehova?
2 Jehova ngoka e li Omuwa Omunamapangeloagehe okwa gwana okupewa ashihe shoka oshiwanawelela. (Mal. 1:6) Otwe mu igandjela tu longe ehalo lye, molwaashoka otu mu hole. Onkee ano, kehulilo lyesiku nenge lyomwedhi ngele otu uvite kutya Jehova otwe mu pa ‘oshipe’ shethimbo lyetu, shoshitalenti shetu nosho wo shoonkondo dhetu miilonga ye, nena ohatu kala twa nyanyukwa. (Omayel. 3:9) Ihe ngele eiyuvo lyetu otali tu tamaneke, otu na okutala kutya oshike tatu vulu okuninga tu hwepopaleke iilonga yetu. — Rom. 2:15.
3. Omolwashike kaashi li pandunge okwiiyelekanitha nayalwe?
3 ‘Inatu yelekanitha iilonga yetu niilonga yayakwetu’: Kashi li pandunge okwiiyeleka nayalwe nenge okuyelekanitha shoka twa li hatu longo nale sho twa li tu na oonkondo naashoka hatu longo ngashingeyi. Oonkalo ohadhi lunduluka. Sho ishewe, aantu oye na iipewa ya yoolokathana. Ngele otwi iyeleke nayalwe, otatu ki iyadha tatu thigathana po nayo nenge tu uvite inaatu gwana. (Gal. 5:26; 6:4) Jesus ka li ha yelekanitha oshilonga shomuntu noshamukwawo. Pehala lyaashono, okwa li ha pandula aantu omolwoshilonga kehe shoka ya longa. — Mark. 14:6-9.
4. Otatu ilongo mo shike sha simana meyele lyaJesus lyiitalenti?
4 Meyele lyaJesus lyiitalenti, omulongi kehe okwa li a pewa oshitalenti “sha yeleka uupenda we.” (Mat. 25:15) Sho omuwa gwawo a galuka e te ya pula ya popye kutya iitalenti yawo oye yi longitha shike, mboka ya adhika ya longa nuudhiginini sha yeleka puupenda wawo nokoonkalo dhawo, oya li ya pandulwa nokuya menyanyu lyomuwa gwawo. (Mat. 25:21, 23) Natse otatu ka kala twa nyanyukwa notu na omukumo kutya Kalunga okwe tu hokwa ngele otwa kala hatu longo nuudhiginini miilonga yUukwaniilwa.