Tameka oonkundathana momukalo tagu pendutha ohokwe
1. Oshike tatu ilongo kunkene Aakriste yopetameko ya li haya ningi omafalomo?
1 Aakriste yopetameko oya li haya uvithile aantu yomomaputuko nomalongelokalunga gi ili nogi ili onkundana ombwanawa. (Kol. 1:23) Nonando ayehe oya li haya uvitha kombinga yUukwaniilwa waKalunga, oya li haya ningi omafalomo ga yoolokathana shi ikolelela kwaamboka taya popi nayo. Pashiholelwa, sho Petrus a li ta popi nAajuda mboka ya li ya simaneka noonkondo Omanyolo, okwa li a tameke oonkundathana dhe noohapu dhomupolofeti Joel. (Iil. 2:14-17) Mepingathano naashono tala nkene Paulus a li a tompathana nAagreka ngaashi sha nyolwa mIilonga 17:22-31. Kunena momahala ogendji aantu oya simaneka Omanyolo, notatu vulu okupopya kombinga yago twa manguluka sho tatu longo egumbo negumbo. Ihe otashi vulika tu na okukala twa kotoka sho tatu popi naamboka kaaye na ohokwe mOmbiimbeli nenge melongelokalunga nenge mboka kaaye li melongelokalunga lyopaKriste.
2. Ongiini tatu vulu okulongitha iileshomwa mbyoka tayi gandjwa momwedhi gwontumba tu kwathele mboka ya simaneka Ombiimbeli naamboka inaaye yi simaneka?
2 Longitha nawa iileshomwa mbyoka tayi gandjwa momwedhi gwontumba: Momumvo nguka gwiilonga iileshomwa mbyoka tayi gandjwa momapya otayi kala hayi lunduluka konima yoomwedhi mbali, notayi kala ya kwatela mo iifo, uutraktate nuubroshure. Ihe nonando aantu moshitopolwa shetu ihaya kala aluhe ye na ohokwe mOmbiimbeli, otatu vulu tu popye oshinima shimwe shi ili shoka tashi pendutha ohokwe muyo. Otashi vulika itaatu ke ya leshela enyolo petalelopo lyotango nenge tu popye twi ikolelela kOmbiimbeli, ihe mpoka aantu yu ulika ohokwe otatu vulu okushuna ko nelalakano lyokukwathela omunegumbo a koleke eitaalo lye mOmushiti nosho wo mOohapu dhe dha nwethwa mo. Uuna tatu uvithile aantu mboka ya simaneka Ombiimbeli, otatu vulu okulongitha iileshomwa yetu nokuninga omafalomo ngoka tage yo opalele. Nokuli otatu vulu oku ya pa embo Omalongo gOmbiimbeli nenge okabroshure Kala ho pulakene kuKalunga opo wu ka kale nomwenyo sigo aluhe nonando hayo tayi gandjwa omwedhi ngoka. Oshinima sha simana, okulongitha omukalo ngoka tagu pendutha ohokwe.
3. Omomukalo guni omitima dhaantu moshitopolwa shetu dha fa evi?
3 Longekidha mpoka wu na okukuna oombuto dhoye: Omutima gwomuntu ogwa fa evi. (Luk. 8:15) Evi limwe otali pumbwa okulongwa nawa opo oombuto dhoshili yOmbiimbeli dhi vule okumena mo. Aauvithi yomethelemumvo lyotango oya li ya pondola okukuna momavi gi ili nogi ili, naashika osha li she ya mbilipaleke noku ya etela enyanyu. (Iil. 13:48, 52) Natse otatu vulu okumona oshizemo sha faathana ngele otwa kala tatu gandja eitulomo kunkene hatu ningi omafalomo.