Oshike hashi tu inyengitha tu uvithe?
1. Ohole nosho wo iilonga yetu yuukalele oya pambathana ngiini?
1 Okuuvitha onkundana ombwanawa yUukwaniilwa waKalunga okwo oshilonga sha simanenena shoka tatu vulu okulonga kunena. Sho tatu longo iilonga mbika oshi li euliko kutya otatu vulika kiipango iyali iinene, shotango okukala tu hole Jehova, noshitiyali okukala tu hole aantu ooyakwetu. (Mark. 12:29-31) Ohole oyo hayi tu inyengitha unene tu longe nuulaadhi muukalele. — 1 Joh. 5:3.
2. Iilonga yetu yokuuvitha ohayi ulike ngiini kutya otu hole Jehova?
2 Ohole yokuhola Jehova: Ohole yokuhola Kuume ketu kopothingo, Jehova, ohayi tu inyengitha tu popye ko pehala lye. Satana okwa kala nokulundila Jehova uule woomvula 6 000 lwaampo. (2 Kor. 4:3, 4) Onkee ano, aantu oyi itaala kutya Kalunga ohu umbile aaluunde momulilo gwoheli nosho wo kutya ye Omukwatatu nonokutya ke na ko nasha naantu. Oyendji oya thika nokuli pehulithodhiladhilo lya pukilila kutya Kalunga ke ko. Ihe tse otwa halelela aantu ya tseye oshili kombinga yaKalunga. Oonkambadhala ndhoka hatu ningi tu gandje uunzapo wu na ko nasha naKalunga ohadhi mu nyanyudha noonkondo nohadhi yemateke unene Satana. — Omayel. 27:11; Heb. 13:15, 16.
3. Omomukalo guni uukalele wetu tawu ulike kutya otu hole aantu ooyakwetu?
3 Ohole yokuhola aantu ooyakwetu: Ethimbo kehe tatu pe omuntu uunzapo otatu ulike kutya otu mu hole. Molwaashoka otu li momathimbo omadhigu okukaliwa, aantu oya pumbwa lela okuuva onkundana ombwanawa. Oyendji oya fa Aaninive yopethimbo lyaJona mboka ya li “kaaye shi nando eyooloko pokati kolulyo nolumoho.” (Jona 4:11, NW) Uukalele wetu ohawu kwathele aantu ya mone nkene taya vulu okukala ya nyanyukwa noye na onkalamwenyo tayi ti sha. (Jes. 48:17-19) Uuna tatu ya uvithile ohashi ya pe etegameno. (Rom. 15:4) Ngele oya pulakene ketumwalaka lyetu nokutula miilonga shoka tayi ilongo otaya ka “hupithwa.” — Rom. 10:13, 14.
4. Oshike shoka Jehova itaa ka dhimbwa nando?
4 Otu na okukala tu hole Jehova ethimbo alihe, ngaashi aanona ye hole aavali yawo nohaya kala ye yi inekela ethimbo alihe. Ohole yetu yokuhola Jehova nosho wo aantu ooyakwetu otayi ke tu inyengithe tu kale twa tonata tu konge oompito dhokugandja uunzapo ethimbo kehe, ihe hapoompito owala ndhoka twi ilongekidha oku ke wu gandja. Molwaashoka otu hole Jehova otatu ku uvitha nopwaahe oluthuwo. (Iil. 5:42) Ohole ya tya ngaaka Jehova ite ke yi dhimbwa nando. — Heb. 6:10.