Iizemo yinyanyudha yiilonga yomomapya

Aauvithi 2 004 moNamibia oya li ya gandja oolopota dhawo muJanuali 2013. Omwaalu nguka ogu li eindjipalo lyoopelesenda hamano okuyelekanitha nuupokati womiyalu dhomimvo dha ka pita. Namibia okwa lopota wo oshitsa oshipe shopombanda shaakokolindji yondjigilile 229. Ihe okutala owala komwalu gwaakonakonimbiimbeli 3 712 mboka ya lopotwa muJanuali, oshi li euliko kutya natango opu na oshindji shoka shi na okulongwa moshilongo moka hamu popiwa omalaka ogendji. Aauvithi Aanamibia mboka ya li kiilongo yilwe oya galukila moshilongo, noye li taya nyanyukilwa iizemo iiwanawa. Mbela opu na natango aauvithi mboka ya hala ‘okutaagulukila’ koNamibia ye ye ya kwathele? — Iil. 16:9.