Kala wu na omukalondjigilile gwokuthika pethimbo
1. Jehova okwe tu tulila po oshiholelwa shini shi na ko nasha nokuthika pethimbo?
1 Jehova oha kala aluhe pethimbo. Pashiholelwa oha ‘kwatha aapiya ye pethimbo lyo opala.’ (Heb. 4:16) Ohe ya pe wo ‘iikulya yopambepo pethimbo lyo opala.’ (Mat. 24:45) Onkee ano otatu vulu okukala neinekelo kutya esiku lyondjahi ye ndyoka tali ya ‘itali dhikala.’ (Hab. 2:3) Itatu mono tuu uuwanawa mokukala kwaJehova ha kala pethimbo! (Eps. 70:5) Ihe omolwomaipyakidhilo, nokwaahagwanenena, okukala pethimbo otaku vulu okukala eshongo lela kutse. Omolwashike tu na okukala tu na omukalondjigilile gwokuthika pethimbo?
2. Omolwashike okuthika pethimbo haku simanekitha Jehova?
2 Okuthika pethimbo okwa pumba momasiku ngaka gahugunina moka aantu oyendji yi ihole yo yene nokaaye na eipangelo. (2 Tim. 3:1-3) Onkee ano, uuna Aakriste taya thiki pethimbo kiilonga, uuna ya ninga oshilage, pokugongala kehe, yamwe ohaye shi ndhindhilike nohashi simanekitha Jehova. (2 Pet. 2:12) Mbela ohatu thiki pethimbo kiilonga yokwiikongela omboloto, ihe olundji ohatu thiki twa lata piiningwanima yopaKalunga? Okuthika kuyele pokugongala kehe kwopaKriste, mwa kwatela eimbilo negalikano lyotango, ohaku ulike kutya otu na ehalo lyokuholela Tate yetu gwomegulu ngoka e na elandulathano. — 1 Kor. 14:33, 40.
3. Omolwashike okuthika pethimbo haku ulike kutya otu na ko nasha nayalwe?
3 Natango okuthika pethimbo ohaku ulike wo kutya otu na ko nasha nayalwe. (Fil. 2:3, 4) Pashiholelwa, ngele ohatu thiki pethimbo pokugongala kehe kwopaKriste, mwa kwatelwa okugongala kwiilonga yomomapya, ooitaali ooyakwetu itaya ka piyaganekwa inaashi pumbiwa. Oshikwawo, ngele ohatu lata aluhe, otashi ka ningitha yalwe ya dhiladhile kutya otu wete owala ethimbo lyetu olyo lya simana li vule lyayalwe. Okuthika pethimbo ohaku ulike kutya otu li aainekelwa naadhiginini, uukwatya mboka hawu pandulwa kwaamboka yopopepi natse.
4. Ngele ohatu lata olundji, ongiini tatu vulu okuninga omalunduluko?
4 Ngele oho lata olundji, ipula kutya omolwashike. Iyunganeka nawa e to itulile po elandulathano ndyoka tali ke ku pa ompito wu vule okumana iilonga yoye pethimbo. (Omuuv. 3:1; Fil. 1:10) Pula ekwatho kuJehova. (1 Joh. 5:14) Okuthika pethimbo oku li omukalo gumwe gwokuulika olupandu lwiipango iyali ya simanenena yomompango, mbyoka yi li okuhola Kalunga nosho wo ooyakwetu. — Mat. 22:37-39.