Okuhwepopaleka uunkulungu wetu muukalele — Okugandja embo Omalongo gOmbiimbeli

Omolwashike sha simana?: Embo Omalongo gOmbiimbeli olya simanenena mokulonga aantu. Ihe manga inaatu li longitha tu konakone nomuntu, otu na oku mu li mu pa tango. Onkee ano, atuheni otu na okukala tu shi nawa oku li gandja. (Omayel. 22:29) Opu na omikalo odhindji ndhoka tatu vulu okulongitha, naauvithi oye na okulongitha ndhoka omiwanawa kuyo.

Nkene tatu vulu oku shi ninga:

Pula omunegumbo epulo tali pendutha ohokwe ndyoka lya yamukulwa kontopolwa yontumba membo. Oto vulu wu hogolole epulo limwe lyomwaangoka ge li petameko lyontopolwa kehe. Ngele omunegumbo a yamukula, lesha enyolo tali opalele. Mu ulukila okatendo hoka ke na eyamukulo noku ka kundathana paufupi.
Oto vulu okulongitha omapandja gopetameko wu penduthe ohokwe yomuntu. Konima yaashono, mu ulukila membo mpoka pu na omayamukulo okuza mOmbiimbeli. Oto vulu wu popye oshiningwanima shoka wu uva moonkundana. Mu yelithila kutya aantu oyendji ohayi ipula kombinga yomapulo ngoka ge li pepandja 3. Nenge wu tye, oto talele po aantu wu ya lombwele onakuyiwa ombwanawa ndjoka twa tegelela. Mu ulukila omathano ngoka ge li pepandja 4-5. Opo ihe mu pula to ti: “Omauvaneko geni gomwaangaka wa hala ga gwanithwa?” Nenge wu tye, oto talele po aantu wu ya kwathele ya mone omayamukulo gomapulo ga simanenena monkalamwenyo. Mu ulukila omapulo ngoka ge li pevi lyepandja e ti-6. Mu pula kutya olini a hala mu kundathane.
Longitha omukalo gumwe ngoka tagu ku kwathele wu tameke ekonakonombiimbeli pethimbo ndyoka. Oto vulu wu tye: “Otatu pe aantu embo ndika tali ya kwathele ya konakone Ombiimbeli. Mbela owe li mona nale? [Tegelela a yamukule.] Ngele owu na ethimbo, onda hala ndi ku ulukile nkene hali longithwa tatu longitha Ombiimbeli yoye.”

Kambadhala oku shi ninga momwedhi ngu:

Iyendithii po pethimbo lyelongelokalunga lyuukwanegumbo.
Uuna mu li muukalele, lombwela mukweni shoka to ka tya. (Omayel. 27:17) Lundulula efalomo lyoye ngele itali pondola.